«Jastarǵa jumys» jobasynyń maqsaty – jumys izdegen jastardy jergilikti kásiporyndarmen baılanystyrý jáne óńirdegi jumyssyzdyq deńgeıin tómendetý. Atalǵan jármeńkege 97 kásiporyn qatysyp, 700-ge jýyq bos jumys orny usynylǵan.
«Qazirgi tańda Almaty oblysynda 280 myńǵa jýyq jas bar. Olardyń 6 myńǵa jýyǵy jumyssyz retinde tirkelgen. Osyndaı jármeńkeler arqyly biz jastardy eńbek naryǵyna beıimdep, óz salalary boıynsha jumys tabýyna múmkindik jasap otyrmyz. Bul shara tek bos jumys oryndaryn usynýmen shektelmeıdi. Sonymen qatar jastarǵa eńbek naryǵyndaǵy talaptar týraly aqparat berip, kásibı daǵdysyn damytýǵa kómektesedi. Osyndaı sharalardyń nátıjesinde 109 jas maman jumysqa ornalasty, al 200-ge jýyq jas suhbattasýǵa shaqyrylyp, ózin kórsetý múmkindigin aldy», deıdi «Jastar rýhy» jastar qanatynyń Almaty oblystyq fılıaly tóraǵasy Medet Bekbergenov.
Kásiporyndar ishinde erekshe kózge túskenderdiń biri – Talǵar aýdanyndaǵy «Keruen Plus» zaýyty. Sý jáne jylytý júıelerine arnalǵan plastıkalyq qubyrlar men fıtıngter shyǵaratyn bul óndiris orny «Wuko deniz» brendimen keń tanylǵan. Zaýyttyń joǵary óndiristik áleýeti men sapaly ónimderi ishki naryqta úlken suranysqa ıe. Osy jármeńke barysynda kásiporyn 50-den asa bos jumys ornyn usynyp, jumys izdeýshilerdiń úlken qyzyǵýshylyǵyn týdyrdy.
Jumys tapqandardyń biri – 29 jastaǵy Dáýren Sábıtov. Ol jármeńkege qatysqannan keıin «Keruen Plus» zaýytynyń óndiristik bólimine jumysqa ornalasty. Buryn jumyssyz bolǵan ol bul zaýyttyń jalaqysy, jumys jaǵdaıy jáne mamandardy kásibı damytýǵa baǵyttalǵan múmkindikterine rızashylyǵyn bildirdi.
«Men zaýyt ókilderimen partııa uıymdastyrǵan jármeńkede tanystym. Olar ózderiniń óndiris úderisteri, usynatyn múmkindikteri týraly jan-jaqty aqparat berdi. Qazir óndiris ornynda tehnıkalyq maman retinde qyzmet atqaryp júrmin. Jumysym unaıdy ári osynda ósý múmkindikteri bar ekenin sezinemin», deıdi Dáýren.
Aıta ketý kerek, «Amanat» partııasy Almaty oblystyq fılıaly men «Jastar rýhy» jastar qanaty jumysqa ornalastyrý maqsatynda memlekettik qoldaý sharalaryn keńeıtip, NEET sanatyndaǵy jastardy oqytý jáne jumyspen qamtý úshin arnaıy semınarlar uıymdastyryp keledi. Sondaı-aq jyl saıyn 350 jeńildetilgen kredıt berý jáne kásiporyndarda 5 myń jas úshin ashyq esik kúnderin ótkizý josparlanǵan. Bul sharalar jastar jumyssyzdyǵyn 3,5%-dan 2,9%-ǵa deıin tómendetýge múmkindik bergeni týraly partııanyń Almaty oblystyq fılıalynyń baspasóz qyzmeti habardar etti.
Almaty oblysy
