«Jańa nysan jergilikti ınfraqurylymnyń damýy men óńir turǵyndarynyń sportpen aınalysýyna sony serpin beredi. Memleket basshysynyń halyqtyń salamatty ómir saltyn jaqsartý baǵytyndaǵy tapsyrmalaryn oryndaýda Almaty oblysy da belsendilik tanytyp keledi. Qalalyq jerlerden bólek, shalǵaı aımaqtarda da sporttyq nysandardy salyp, aýyl balalarynyń tegin sport seksııalaryna qatysýyna jan-jaqty múmkindik qarastyryp jatyrmyz», degen Almaty oblysynyń dene shynyqtyrý jáne sport basqarmasynyń basshysy Erbolat Sarabekov turǵyndardy mereıli merekemen quttyqtady.
Sporttyq nysannyń saltanatty ashylýyna Parıj Olımpıadasynyń grek-rım kúresinen kúmis júldegeri Demeý Jadyraev qatysty.
«Sońǵy ýaqytta sporttyq keshender men alańdar balalardyń da, eresekterdiń de súıikti ornyna aınaldy. Halyqaralyq arenada úlken jetistikterge jetsin desek, balalardy jastaıynan sportqa beıimdeý úzdiksiz júrgizilýge tıis. Raıymbek aýdanynan bilikti sportshylar shyqqan. Máselen, Rýslan Jumabekov, Ardaq Nazarov, Beıbit Nazarov, Jasulan Qydyrbaev syndy sheber sportshylardyń esimi erekshe atalady. Aldaǵy ýaqytta da dál osyndaı sport ǵımaratynda shynyqqan jastar Olımpıada jeńimpazdary bolatynyna senimim mol», – dedi ol.
70 oryndyq qurylystyń jalpy quny 1 mln 336,6 myń teńgeni quraıdy. Sport kesheninde boks, kúres, jattyǵý zaldary, sondaı-aq komandalyq sport túrlerine arnalǵan zal qarastyrylǵan. Jalpy aýdany 2253,3 sharshy metr ǵımaratta jas sportshylar men jattyqtyrýshylarǵa barynsha qolaıly jaǵdaı jasalǵan. Munda aýyl balalary sporttyń birneshe túrinen jattyǵady.
Búginde oblysta 1891 sport nysany jumys isteıdi. 2025 jyly qolǵa alynýy tıis 15 sport nysanynyń jobalyq-smetalyq qujattamasy ázirlenip jatyr.
Almaty oblysy
