Sýretti túsirgen – Jeńis YSQABAI
Buqaralyq sport nysanynyń ashylýyna oblys ákimi Beıbit Isabaev, Ústel tennısi federasııasynyń vıse-prezıdenti Elsııar Qanaǵatov, Atlanta Olımpıadasynyń júldegeri Máýlen Mamyrov, elimizdiń tuńǵysh «Barysy» Ulan Rysqul bastaǵan sport ardagerleri men qala turǵyndary qatysty.
«Memleket basshysy bıylǵy Joldaýynda «Jastarymyz deni saý, myqty azamat bolyp ósýi kerek. Sondyqtan ult saýlyǵyn saqtaý úshin buqaralyq sporttyń mańyzy aıryqsha», dep atap ótti. Osy oraıda sporttyq ınfraqurylymdy jaqsartýǵa erekshe kóńil bólinip, balalar men jasóspirimderdiń sportpen shuǵyldanyp, jan-jaqty jetilýine jaǵdaı jasalyp keledi. Bul rette sporttyq nysandardy salýǵa memleketpen qatar jeke ınvestorlardyń da belsendi qatysa bastaǵany qýantady», degen B.Isabaev ortalyqty salýǵa qarjylaı qoldaý kórsetken «Jetisý qoldaý» qoǵamdyq qoryna alǵys bildirdi.
Buqaralyq sportty damytýǵa baǵyttalǵan nysan halyqaralyq talaptar men standarttarǵa sáıkes salynǵan. Munda kez kelgen deńgeıdegi jarystardy ótkizýge múmkindik bar.
Jalpy, balalar men jasóspirimderge arnalǵan oblystyq sport mektebinde 613 oqýshy tárbıelenip jatyr, sonyń 131-i ústel tennısimen aınalysady. Mektepte 24 jattyqtyrýshy jumys isteıdi. Jalpy aýdany 2193 sharshy metr bolatyn eki qabatty ǵımarattyń ústel tennısine arnalǵan úlken zalynda 12 ústel qoıylǵan, aldaǵy ýaqytta onyń sanyn kóbeıtýge de múmkindik jasalǵan, sol sııaqty 250 oryndyq trıbýnasy, shahmat pen toǵyzqumalaqqa arnalǵan zaly bar. Jattyǵý zaly, massaj bólmesi, jýynatyn bólmeler, basqa da qajetti ákimshilik, turmystyq úı-jaılar qarastyrylǵan. Jobaǵa 1,3 mlrd teńge ınvestısııalyq qarajat jumsaldy.
«Taldyqorǵandaǵy ústel oıyndary men sporttyq týrızm baǵytynda jumys istep turǵan oblystyq mektep buǵan deıin jaldamaly ǵımaratta otyrǵan. Endi kásibı jáne áýesqoı sportshylar kez kelgen yńǵaıly ýaqyt pen qolaıly jaǵdaıda ústel tennısimen aınalysyp, shahmat nemese toǵyzqumalaq oınaı alady. Munyń bári buqaralyq sportty damytýǵa, sporttyq jetistikterdi jaqsartýǵa yqpal etedi», deıdi oblystyq ústel oıyndary men sporttyq týrızm boıynsha mamandandyrylǵan balalar men jasóspirimder sport mektebiniń aǵa jattyqtyrýshysy Nurlan Dúısenbınov.
Jetisýda 233 seksııada turaqty negizde 11 592 turǵyn, sonyń ishinde jastar da ústel tennısimen aınalysady. Arnaıy seksııalar Alakól, Aqsý, Eskeldi, Qaratal, Kerbulaq, Panfılov, Sarqan aýdandarynda, Taldyqorǵan qalasynda ashylǵan. Bul seksııalarda 146 jattyqtyrýshy bar. Sondaı-aq memlekettik sporttyq shyǵarmashylyq tapsyrys negizinde ústel tennısinen 17 seksııada 583 bala aınalysady.
Bıyl jergilikti bıýdjetten 9 sporttyq nysannyń qurylysyna 3,7 mlrd teńge qarajat bólindi. Sonyń ishinde altaýynyń qurylysy aıaqtaldy. Atap aıtqanda, Sarqan aýdany Almaly aýylynda, Alakól aýdany Lepsi aýylynda, Tekeli qalasynda dene shynyqtyrý-saýyqtyrý kesheni, Panfılov aýdany Úsharal aýylyndaǵy sport kesheni, Taldyqorǵan qalasynda «Jetisý» kásibı voleıbol klýbyna arnalǵan elimizde teńdesi joq voleıbol ortalyǵy jańadan salyndy, ınvestor esebinen sportshylarǵa arnalǵan tórt qabatty turǵyn úı turǵyzyldy.
Oblysta halyqtyń myń adamǵa shaqqanda sporttyq ınfraqurylymmen qamtamasyz etilýi 64%, deneshynyqtyrý, sportpen júıeli túrde aınalysatyn halyqtyń úlesi oblys halqy jalpy sanynyń 42%-yn quraıdy. Bıyl jetisýlyq sportshylar 1344 medal jeńip alǵan.
Jetisý oblysy
