О́ńirlik jer qoınaýyn paıdalaný, qorshaǵan orta jáne sý resýrstary basqarmasy Kýrchatov qalasynyń káriz sýlary Ertis ózenine quıylyp jatqanyn rastady. «Kýrchatov Vodokanal» mekemesine qarasty káriz júıesiniń jerastyndaǵy qubyrlary jarylyp, saldarynan qaldyq sý ózenge tolassyz aǵyp ketip jatyr.
«Kýrchatov qalasynan Ertis ózenine aǵyndy sýlardyń aǵýy jónindegi beınematerıal derekterin anyqtaý maqsatynda Abaı oblysy ekologııa departamentiniń mamandary shyǵaryndylar ornyna arnaıy bardy. Aǵyndy sýlardy aǵyzý deregi rastaldy. Osyǵan oraı «Kýrchatov Vodokanal» ShJQ KMK-ǵa qatysty tekseris júrgiziletin bolady», dep habarlady basqarmadan.
Pavlodar qalalyq sanıtarlyq-epıdemıologııalyq baqylaý basqarmasy Ertis ózeninen hımııalyq, bakterıologııalyq, parazıtologııalyq kórsetkishteri boıynsha sý synamalaryn aldy. Taldaý nátıjeleri aldaǵy ýaqytta belgili bolady. Departament mamandary Ertis ózenine kárizdiń qaldyq sýlaryn tolassyz jiberip jatqan Kýrchatov qalasynyń kommýnaldyq mekemesi buǵan deıin de birneshe márte jaýapkershilikke tartylǵanyn málimdep otyr. Jyl basynan kásiporyn ekologııalyq zańnamalardy buzǵany úshin 10 mln teńgeden astam aıyppul tólegen. «Kýrchatov Vodokanal» mekemesine birneshe márte josparly tekserý júrgizilip, birqatar zań buzýshylyq anyqtalǵan. Birinshi tekseriste káriz júıesindegi sýdy tazartqyshtar bıologııalyq tazartýdy jetkilikti deńgeıde júrgizbeıtini málim bolǵan. Ekologııa kodeksiniń 90-baby boıynsha ákimshilik is qozǵalyp, uıymǵa 258 440 teńge aıyppul salynǵan. Kelesi kezekti tekseriste Shyǵys Qazaqstan oblysy ekologııa departamentiniń zerthanalyq-taldaý baqylaý bóliminiń mamandary aǵyndy sýlardy Ertiske jiberetin №2 qubyrda káriz qaldyqtarynyń mólsheri óte kóp ekenin anyqtaǵan. Ondaǵy qaldyq mólsheri ekologııalyq ruqsat sheginde belgilenetin qorshaǵan ortaǵa emıssııalar normasynan asyp túsken. Osyǵan oraı kásiporyn 9 817 439 teńge aıyppul tólegen. Qazirde Abaı oblysyndaǵy ekologııa departamentiniń mamandary «Kýrchatov Vodokanal» mekemesine qatysty jospardan tys tekseris taǵaıyndap, bastaǵaly otyr.
Ertistiń sýyn aýyzsý retinde Pavlodar, Ekibastuz, Aqsý qalalarymen qosa, Qaraǵandy oblysy da paıdalanyp otyr. Sátbaev atyndaǵy kanal arqyly aǵatyn ózen sýy jaqyn jyldary Astana qalasyna deıin jetedi degen jospar bar. Sondyqtan bul másele ekologııalyq apat retinde baǵalanyp, dabyl qaǵylýy kerek dep oılaımyz.
Pavlodar oblysy
