Temirqazyǵy – Mahambet, Sholpan juldyzy – Sara...

Poezııa saraıyna asqaqtaı ba­syp kirgen Farızanyń aqyn­dyq bolmysyn daralaǵan mi­nez­di de tegeýrindi ári syrshyl óleń­deri bolsa, azamattyq bolmysyn aıqynda­ǵan – aınalasyndaǵy jaqyn da, jat ta jandarǵa qamqorlyǵy edi. Ol – Ońǵarsyn áýletiniń ǵana jel jaǵyndaǵy panasy, yq jaǵyndaǵy saıasy bolǵan joq, qazaq eliniń qarapaıym perzentterine, ádebıet álemi­ne qadam basqan býyny qatpaǵan árbir jas­qa meıirimin syılap, olardy qoltyǵynan ­demegen daladaı darqan júrektiń ıesi.

Bala kúnimde úıde «Shilde» degen tysy qońyr kitap boldy. Sol kitapta alǵy­sóz ornyna «Syrymdy saǵan aıtam...» dep atalatyn jazba usynylǵan. Ol jazbany aqynnyń kimge, qaı dosyna arnap jazǵanyn bilgim kelgeni, «Nege ol jan dosynyń atyn atamaǵan?» dep oılaǵanym esimde. Taǵy bir kitapty qyzyǵa oqy­dym, aty – «Arýlar otty jyldarda», munyń da tysy qońyr. Bul eki kitaptan da kórgenim – Farıza Ońǵarsynovanyń aty-jóni. «Arýlar otty jyldarda» degen kitaptyń qurastyrýshysy, «Shilde» kitabynyń avtory. Áýelgide kóbirek, qaıtalaı oqyǵa­nym – Ońǵarsynovanyń qurastyrýyndaǵy kitap. Qazaqtyń qaharman arýlary Mánshúk pen Álııanyń, maıdan keshken basqa da názik jandardyń taǵdyr talaıy arqaý bolǵan bul kitaptyń maǵan áseri erekshe boldy.

Keıinnen Almatydaǵy Qazaq ýnıver­sıtetinde stýdent bolyp júrgende arman­daı bolǵan aıryqsha adammen tany­sý­dyń sáti tústi. Basylymdar úıindegi «Pıoner» jýrnalynyń redaksııasyna, aqyn aǵam Svetqalı Nurjanǵa jary Bıbaı­sha ekeýimiz, taǵy da bir-eki adam bar­dyq. Farıza apaıdy túrli poezııalyq keshterden kórip júrgenimizben, baryp amandasýǵa batylymyz jetpeıtin. Redaksııanyń qabyldaý bólmesinde turǵanymyzda redaktordyń kabınetinen Meıirhan aǵa Aqdáýlet pen Svetqalı aǵa shyqty. Olarmen birge Farıza apaı da shyǵyp keledi eken. Túri susty jannyń adamdy yqtyryp turatyn bir aıbary bar edi. Muqaǵalıdaı nar aqyn qurmet tutyp, jyr arnaǵan Farızamen jaqyn júzdesý sol kezde jıyrmaǵa endi jetken men úshin qanshalyqty mańyzdy oqıǵa ekenin qalam ustaǵan ár adam seziner.

Bıbaıshanyń sálemin alǵan soń, jigit­terge zildi sóılep, zekigendeı bolǵan aqyn apam maǵan burylyp: «Myna bala kim?» dep jup-jumsaq ún qatty. Jópeldemede eshteńe deı almadym. Sasqalaqtaǵanym bolar: «Svetqalı aǵaǵa kelip edik», deppin. Farıza apamyz jyly jymıdy. «Bul qyzyńyz óleń jazady. Buıyrsa aqyn bolmaq», dep Svetqalı aǵa tanystyryp jatyr. «О́zi bir japyraq, óleń qaı jerinen shyǵady myna balanyń?» dep apam taǵy da jyp-jyly sóıledi. Qor­qynyshym seıilip, qysylǵan qalyptan erkindeý alańǵa qaraı shyqqandaı boldym. Farıza apaı osydan soń birneshe óleńimdi «Pıoner jýrnalynyń aıqarma betine jarııalaǵan edi. Sol óleńdermen qosa berilgen sýretimdi redaksııaǵa arnaıy shaqyryp, fotografqa túsirtti.

Oqý bitirip, «Jeltoqsan jeliniń» ek­pi­nimen aýyl jaqqa kettim. 1990 jyldyń jazynda sińlim Lázzat ekeýimiz Alma­ty­ǵa qydyryp keldik. Almatyǵa, QazMÝ qalashyǵyna ańsarymyz aýyp turýshy edi. Arnaıylap Farıza apaıǵa bardym. Kabınetinde Ábıirbek Tinálıev (alǵash kórýim), taǵy basqa biraz jastar otyr eken. Ábıirbek aǵanyń Muqaǵalıdyń sózine jazylǵan «Farızaǵa» ánin tuńǵysh osy jerde tyńdadym. Apaı halimdi, qaı­da júrgenimdi surastyryp jatyr. «О́leńderiń bar ma qolyńda?» dep surady. Aq paraqqa qolmen jazyp daıyndap ákelgen birneshe óleńimdi aldy. «Búgin jaqsy bir kesh bolady. Soǵan mindetti túrde qatys», dedi. Bul keshte Tabyldy Dosymov án saldy. О́leń oqyldy. Ábıirbek manaǵy biz tyńdaǵan «Farızaǵa» ánin oryndaǵanda zal dúr silkingendeı boldy. Ánniń sahnada alǵash oryndalýy eken. Kesh aıaqtalǵan soń, qoshtasarda Farıza apaı: «Joǵalyp ketpe, ózińdi joǵaltyp alma! Habarlasyp tur», dedi shegelep.

Aýylda ol kezde radıo habarlardyń taralýy óte jaqsy deńgeıde. Arada aı ótpeı óleńderim radıodan oqyldy. Poshta arqyly ájeptáýir kólemde qalamaqysy da keldi. Farıza apaıǵa redaksııa telefonyna habarlasqanymda «О́leńderińdi tyńdadyń ba? Qalamaqyńdy aldyń ba?» dep surady. «Iá, apaı» deımin. «О́leń­nen qol úzbe. Kúıbeń tirlikke baǵynyp ket­pe!» deıdi apaıym.

Arada biraz ýaqyt ótkende, 1999 jyldyń jazynda Farıza apaımen Asta­nada jolyqtyq. Baıaǵy jyly sóz, qam­qor­lyq, «aınalaıyn» degen emirenis. «О́leńińdi «Qazaq ádebıetinen» oqydym. О́zińdi joǵaltpaǵanyńa rızamyn», deıdi. Tóbem kókke tıgendeı máz boldym.

Astanaǵa qonys aýdarǵannan keıin Farıza apaımen jıirek júzdesip tur­dyq. Ol kisi Parlament Májilisiniń depýtaty bolyp júrgen kezi. Astanaǵa eli­mizdiń ár tarapynan jas aqyndar ke­lip, «Shabyt» shyǵarmashyl jastar fes­tı­valine qatysyp jatqan. Apaı maǵan sol aqyndardy uıymdastyryp, bir dámhana­ǵa óziniń atynan shaqyrýdy tapsyr­dy. Jas­tar bul shaqyrýǵa barynsha qýandy. Farıza apaı on besteı jas aqyndy qonaq etip, ádemi bir otyrys ótkizdi. Bul – eki myńynshy jyldardyń basy. Keıinnen birneshe jyl qatarynan festıvaldyń «Poezııa» atalymy boıynsha qazylar alqasynyń tóraǵasy boldy. Júldeli oryndar, ataýly syılyqtardy «Talantty jastar kóp eken, taǵy da bólseńizder», dep uıymdastyrýshylarǵa bedelin salyp júrip alǵanyna kýá boldyq.

Biz, ózinen keıingi jastar, óleńdegi sińlileri Farıza apaıdy barynsha jaq­sy kórdik. Talaı ret úıinde bolyp, das­tarqanynan dám tattym. Baýyrsaǵyn pisirip, shaıdy baptap ózi quıatyn. Shaı ús­tindegi áńgimesi óleń, jastar poezııasy týraly bolatyn. Farıza apaıdyń adam­gershilik beınesi, qaıratkerlik tulǵasy qalyń qazaqqa barynsha belgili. О́ıtkeni ol únemi halyqtyń ortasynda júrdi. Men ózime qatysty bar bolǵany birdi-ekili oqıǵany ǵana baıan ettim. Aqyn apaıymnyń mundaı qamqorlyqtaryn áli de tizbelep aıta berýge bolady.

F.Ońǵarsynovanyń aqyndyq bolmysy men qaıratkerlik tulǵasy onyń ómirdegi ózindik aıryqsha beınesin daralady. Eger ol baıaǵy amazonkalar dáýirinde ómir súrgen bolsa, sózsiz olardyń patshaıymyna aınalar edi. О́ıtkeni onyń ór de qaısar bolmysy qaharly jaýdan qaımyqpaı qaharmandyq saltpen ómir súrgen erjúrek arýlarǵa kósem bolýǵa ábden laıyq.

Aqyndyq ǵumyr alańynda ótken men búgin, búgin men bolashaq toǵysady. Izgilik pen zulymdyqtyń máńgilik kúresi júrip, Abaısha aıtqanda «mahabbat pen ǵadaýat» maıdandasady. Osy máńgilik maıdannyń biregeı jaýyngeri bola bilgen Farıza jyrlarynyń aıshyǵy minez edi.

HH ǵasyrdyń 60-jyldarynan bastap qazaq poezııasyna tyń serpin, jańa lep ákelgen aqyndar shoǵyrynyń ishinde Farıza Ońǵarsynovanyń esimi erekshe atalatyny belgili. Onyń poezııasy qazaq óleńiniń kókjıegin jańa boıaý­men túrlendirip, oqyrman júregine jol tapqan týyndylardan túzilgen. Aqyn lırıkasy adamnyń kóńil kúı quby­ly­syn, jan syryn, ómirdiń ár alýan sát­terin, izgilik, jaqsylyq, meıirim sııaqty adamı qundylyqtardy arqaý etýimen erek­shelenedi. On alty-on jeti jastaǵy boıjetken «Unatyp em» óleńinde:

«Jasymnan unatyp em bir jigitti,

Súıýdiń qıyndyǵyn kim bilipti.

Kóz qyryn tastamaı ol óte berdi,

Júrekke arqalatyp nurly úmitti.

Ádeıi ony kúnde janap ótem,

Oıpyr-aı, ǵashyq bolǵan jaman eken,

Kóńildiń jaılaýynda saıran salyp,

Janyńdy talaı kúıge salady eken.

Sol jigit bilseń atyn óleń degen,

Jymııar: «Saǵan ońaı kónem be men!» –

Erte-kesh bolsa da bir estir me ekem

Bir sózin «Seni jaqsy kórem!» degen», –

dep óziniń óleń atty tylsym álemge ińkár­ligin syrshyldyqpen beıneleıdi. О́leńge ińkár bolmysty jigitke ǵashyq bolǵan balaýsa boıjetken túrinde sýretteý – Farızadaı bolashaq talantty aqynnyń tegeýrinin tanytsa, jyldar jyljyp, sheberlik shyńdalyp, kemeldik artqan shaqtaǵy týyndylary ult poezııasynyń kórkemdik deńgeıiniń bıikteýine úles qosqan aıtýly óleńder bolyp shýmaqtaldy. «Dara kúnderi men nala túnderiniń» serigi bolǵan óleń aqyn úshin tiri rýh, shyny men syryn, qýanyshy men qaıǵysyn bóliser óziniń ekinshi syńary ispettes. О́leńge minez, sol minezdi tanytatyn tereńdik pen bıiktik kerek desek, ol Farıza óleńderine tán sıpat. Aqyn murasyna úńilgende óleń sózdiń qadir-qasıetin jan-júregimen sezinip, oǵan bar yqylasymen qulaǵan aqynnyń ózi óleńge aınalyp ketkendeı sezinesiz. О́leńdi rýhanı serigi ári demeýshisi etken aqyn:

«Kúlkimdi, jaıly kúnimdi,

Azapty, qaıǵy-muńymdy

О́zimmen bóliskeniń úshin

Qatem men jeńisterim úshin,

Meniń mynaý qıyndaý taǵdyrym bolyp

O basta kóriskeniń úshin,

О́leń, men seni aıalap ótem!» –

dep óziniń óleńmen tutasqan taǵdyryna bas ıedi.

Narynnyń qumy, Aqjaıyqtyń jaǵasy, kógalǵa tigilgen kıiz úı, júıtkı shapqan júırik, úlken ómirge balań kózben qaraǵan balaýsa qyz, boıjetkenniń alasurǵan júregi men jan dúnıesin sharpyǵan ǵashyqtyq sezim, bozbalanyń ǵashyq hali – Farıza aqynnyń kórkemdik qýaty mol óleńderiniń shyraıyn aıshyqtaǵan motıvter. Sondaı-aq el men jer tarıhy, aıtary kóp ańyzdar, qaıshylyqqa toly oqıǵalar – aqyn shabytyna nár berip, qýat syılar qaınar kóz. Mahambetteı adýyndy, jalań qylysh aqynnyń jyrlaryndaǵy erlik pen eldik muraty Farıza óleńderiniń ózegine sińgen. «Almas qylysh nemese men Mahambetpen qalaı kezdestim» óleńinde rýh jaqyndyǵyn aqyn kórgen tústegi kezdesý motıvimen beıneleıdi. Túsinde Mahambet tolǵaǵan syr, aıtar arman, qoıar talap:

«Perzenti em ańǵal dalanyń,

Jyr-semser jalǵyz jaraǵym,

Jymıyp kelgen jylpostar

Asyrdy menen amalyn:

Júrýge batpaı yǵymnan,

Susymnan qorqyp tyǵylǵan

Jansyzdar meni jaıratyp,

«Qaroıda» solaı jyǵylǵam...

О́lmesin jerde ǵumyrly án,

Otty jyr órgin muńymnan.

Úmitim sensiń, jas qusym,

Túlep ushatyn tuǵyrdan.

Tek shyndyq kútem men seniń

Aq almas júzdi jyryńnan!» –

dep beriledi. Aqyndyq asyl murat, úzilmes dástúr sabaqtastyǵy, azamattyq pozısııa Farıza jyrlaýynda osylaısha Mahambet rýhymen sýarylady. Poezııa – aqıqattyń qaınar bulaǵy desek, aqynnyń aqynǵa amanat etkeni sol aqıqatty aınymas ustanymyna aınaldyrý. О́rshil sarynnyń óktemdikke emes, azamattyq parasat bıigine nusqaýy – Farıza aqyn óleńderindegi leıtmotıv. Ol – erlik pen qaısarlyqty, izgilik pen adamgershilikti, sulýlyq pen náziktikti sheber úılestirýimen erekshelenetin sýretker. Mahambetteı arýaǵy asqan batyrmen birge erekshe taǵdyrly, názik bolmysty jandardyń da aqyn óleńiniń keıipkerlerine aınalýy – osyǵan dálel.

Mańǵystaý túbegine ańyz bolyp taraǵan Qaıyp pen Aqbóbektiń muńly mahabbatyn aqyn Farıza tebirene jyrǵa qosady. Aqbóbekti lırıkalyq keıipker ete otyryp, armandy arýdyń jan sezimin tereńnen tanytady. Aqbóbekteı aıaýly arý qyzdyń ańsaryn arqaý etken poetıka­lyq tirkesterdiń sonshalyq­ty shynaıyly­ǵyn ári kórkemdik qýatyn sezingińiz kelse, osy sıkldegi myna joldardy qaıtalap oqyńyz:

«Elesteıdi janbaǵan baǵym áli,

Sorly júrek sol kúndi saǵynady...

...Aqbóbek pen Qaıyptyń qyzyǵy dep

Toıly aýylǵa kári-jas aǵylady.

Balalar máz. Dýmanǵa kúlki ulasyp,

Jańa jerdi jatsynyp, jylqy qashyp...

Kók shalǵynǵa kómilip jas qulyndar

Jatsa-aý, shirkin, jelide shurqyrasyp!»

Aqbóbektiń monologinde arýdyń armany jadaǵaı aıtylmaıdy, qazaq dala­syndaǵy saltanatty toıdyń qalpymen tu­tastyrylady. Aqynnyń ulttyq salt-dás­túrdi barynsha qaster tutyp, jadynda jattaǵany kórkem beıneleýlerden aıqyn ańǵarylady. Arý qyzdyń qııaly­men berilgen toı sýreti kilt burylyp, bas­qa qalypqa aýysady:

«Qol jetpeske talpynar kóńil degen,

Ańsaýmenen bul kúndi ómirde men

О́temin ǵoı, qudaı-aı, qusalyqtan

Jalǵyz tamshy jas qalmaı tógilmegen»...

Aqbóbektiń oryndalmaǵan armany aldyńǵy eki jolǵa arqaý bolsa, aýyr qasi­reti sońǵy eki tarmaqty bar salmaǵymen qaıystyra janshyp tur. Aqynnyń talant qýaty men sýretkerlik sheberligi ár shýmaqtaǵy osyndaı oqyrmanyn úıirip áketetin sýretteýlerden túzilgen.

Aqbóbek taǵdyry – Farıza aqynnyń jadynda saqtalyp, júregin tolqytqan shynaıy mahabbattyń qadiri men qasıetin, muńy men qasiretin sezindirgen oqıǵa. Farıza apaı birde Aqbóbekke ǵumyr boıy ǵashyq bop ótken, artyna mahabba­ttyń qaıǵysyn shertken tamasha án qaldyr­ǵan áıgili Qaıyptyń balasymen kezdeske­nin aıtqan edi. Apaıdyń aıtyp bergen áńgimesiniń uzyn-yrǵasy: «Shymkent­ke barǵan bir saparymda Qaıyptyń balasymen tanystym. Eńgezerdeı qart adam kelip amandasyp: «Farıza, men baıa­ǵy Qaıyptyń balasymyn, atym Saqy­ber­gen», dedi. Biraz áńgimelestik. Ol kisi: «Ákeı Mańǵystaýdan ketkennen keıin kóp jerde saıa tappaı, Tájikstan jaǵyna turaqtaǵan. Sonda sheshemizben bas qosyp, biz dúnıege keldik. Ákeı ánshi, dombyrashy ári sheber kisi edi. Ara-tura teris qarap, búk túsip jatyp qalatyn derti bolatyn. Ondaıda sheshemiz: «Dabyrlamańdar, qatty sóılemeı, aqyryn júrińder. Ákeleriń jasynda Aqbóbek degen áıgili sulýǵa ǵashyq bolyp, ekeýi bir-birin súıse de qosyla almaı qalǵan. Sodan osylaı qaıǵydan qusa bolyp, ara-tura sol qusasy kúsheıip ketedi», dep eskertetin, ákeıdiń mazasyn almaýymyzdy qatań qadaǵalaıtyn», dep áńgime shertkende men mahabbattyń, ǵashyqtyqtyń osyndaı shynaıy qudiretine ári qosaǵyn túsine bilgen qazaq áıeline barynsha súısindim». Qaıyptyń keıingi bul qosaǵy – Adaıdan shyqqan Aqyl palýannyń qyzy Qalııa degen anamyz eken.

Farıza apaıdyń «Aqbóbek jyrlary» osyndaı ólmes, óshpes shynaıy súıis­pen­shilikke óleńnen qoıylǵan eskertkish.

Qazaq arýlarynyń sulýlyǵy men aınymas adaldyǵy, óneri, órligi men erligi aqynnyń poetıkalyq keńistiginde alýan túrli beıneleýlermen astasyp, árqaı­­sy­sy ózindik qaıtalanbas bolmysymen kóri­nedi. «Saıraǵan Jetisýdyń bulbuly­myn» sıklindegi Sara aqynnyń beı­nesi aqyn qalamynda jańasha túrlenedi. Bul toptamanyń «Arnaý» atty kirispesin­de Farıza aqynnyń Sara aqyndy barynsha qurmettep, «Temirqazyǵym – Mahambet bolǵanda, Sholpan juldyzym – ózińsiń» deýi, Sara taǵdyrymen óz taǵdyryn uqsas­tyrýy jaıdan-jaı emes.

«Aqyn Sara, sańlaǵy jyr-jarystyń,

Shashylǵandaı beıýaqta shyńnan ushqyn,

Armanshyldaý janymdy alaý sharpyp,

Qanatymdy jyryńa shyńdap ushtym.

Arman – jolda

Shyń-quzdar órindegi

Adastyrmaı albyrttaý kóńil meni –

Jalqy Temirqazyǵym – Mahambet te,

Jyr-Sholpanym – ózińsiń kógimdegi!

Jyr-əlemde joldar az tań nuryndaı,

Zýlap óter daýylǵa, shańǵa urynbaı,

Buralań jol, burqasyn ótkelimen

Sendik taǵdyr meniń de taǵdyrymdaı...

Bas tarttym da basqanyń soqpaǵynan,

Jol tańdadym jel uryp, shoq qaryǵan.

Adasaıyn, adassam,

Shaǵylysqan

Temirqazyq, Sholpannyń ottarynan!»

Sara Tastanbekqyzy – qazaq óneri tarı­hyndaǵy aıtýly ónerpaz tulǵa bolýmen birge, tiride basy qanshalyqta daýǵa qalsa, aqyndyq máńgi ǵumyrynda da sol daýy arylmaǵan kúrdeli taǵdyr ıesi. Saranyń aqyndyǵyna kúmán keltirgen jel sózderge Farıza aqynnyń «kózińdi ashyp qara» dep qamshymen osyp jibergendeı serpini qýatty osy jyr joldary úlken tosqaýyl bolady.

2013 jyldyń qańtarynda «Altyn qy­­ran» qaıyrymdylyq qorynyń qolda­ýymen (prezıdenti – qazaq ádebıeti men óne­riniń janashyry Islambek Salja­nov) «Sara sańlaq» atty kitap jaryq kórdi. Kitapty ázirlegen belgili jazýshy Shárbaný Beısenova edi. Sál burynyraq Shárbaný apaıdyń ótinishimen kitaptyń alǵysózin Farıza apaı jazdy. Alǵysóz «Meniń Sholpan juldyzym» dep atalady. Osy jazbasynda mynadaı joldar bar: «...Keıde Sara aqyndy túsimde kóretinmin: ústine etegi keń aq kóılek, basyna úkisi bulǵaqtaǵan taqııa kıgen suńǵaq boıly beı­nesi anandaı jerden elesteıtin. Sodan beri Sara aqyn meniń Jyr-Sholpanym bo­lyp qaldy. Meni aqyndyqqa talpyndyr­­ǵan jáne jazǵysh er-azamattardan qalys­­paýǵa úıretken – Sara apamyzdyń taǵ­­dyry, shyǵarmashylyǵy. Ádebıettiń bir shetin­de júrgen men úshin Sara apamnyń sonaý ­bala kezimde elestep, bıikterge jol silte­gen jarqyn beınesi áli kúnge deıin bir sát kómeskilenbeı, Sholpan juldyzym bolyp aldymnan sáýle shashyp turǵan­daı sezinemin». Bul joldardy oqyp oty­ryp Farıza aqynnyń burynǵy ótken óner­paz arýlarǵa degen erekshe qurmetine tánti bolasyz.

Qan maıdanda ot keship, qyrshyn ketken Mánshúk pen Álııadaı arýlardyń ańsary men armany aqyn óleńinde tiri­lerge til qatý túrinde jyrlanady. «Tyń­dańdar, tiri adamdar!» degen qos arýdyń búgingi urpaqqa aıtar sózi – aqyn sezingen, uǵynǵan, júregine sińirgen ańsarly arman, aıaýly amanat.

Farıza aqynnyń bula minezdi, býyr­qanǵan asaý jyrlary keıde kóz aldymyzǵa tuıaǵymen jer tarpyp aspanǵa atylǵan arǵymaqty elestetedi.

«Mende bir tolǵanys bar

(Keıde ózim de túsinbeımin),

Daýyl kúngi darııanyń kúshindeı bir.

Sonaý bizdiń qyrdaǵy tuıaq tilgen

Báıge alańy sekildi dúsirleımin...» –

dep tebirengen aqynnyń mazasyz júregi endi birde keń daladaǵy sheksiz erkindikti ańsaıdy: «Arǵymaqtary qaıda eken bu da­la­nyń // Báıge alańyn kórgende shy­da­madym» dep alasurǵan aqyn endi bir­de «Múlgigen meńireý tynyshtyqty tal­qan eter aq daýylǵa» aınalǵysy keledi. Osyn­shalyq býyrqanǵan ekpinge toly aqyn jany oqyrmanyn endi birde tereń syr­shyldyqqa qaraı tartyp áketedi. Qat-qabat syrǵa toly adam bolmysyn, onyń muńy men qýanyshyn, júreginde taı­talas­qan sezimder qaqtyǵysyn, ulttyq, el­dik, erlik, adamgershilik murattardy shyna­ıylyqpen, sezimtaldyqpen beınelegen óleńder – Farıza aqynnyń poezııadaǵy aıryqsha tulǵasyn aıshyqtaǵan rýhanı muramyz.

Aqyn poezııasynyń máni men mazmu­nyn, tereńdigi men bıiktigin, shynaıylyǵy men syrshyldyǵyn, shıyrshyq atqan tartysty zerttep-zerdeleý áli óz deńgeıin­de tolyq júzege asqan joq. Biz áli syrttaı qyzyqtaý men sıpattaýdan asa almaı júrgen sııaqty sezinemin keıde.

Taıaýda aqyn­nyń týǵan jeri Atyraýda, aqynnyń kózi tiri­sinde ózi bastap bergen «Farıza jáne onyń aqyn sińlileri» atty jyr merekesi ótti. Aqynnyń qurmetine uıymdastyrylǵan is-shara konferensııaǵa jalǵasty. Eńseli eskertkishke gúl qoıý rásiminde aqyn­nyń eki uly – Aıbar men Almas, sińlisi Almagúldiń qasynda turdyq. Aıbardyń anasyn saǵynǵanyn kózine irkilgen jas­tan sezindik. Apaımen qurdas bir zamandasy sóz sóılegende Almas: «Mamam tiri bolsa osylaı júrer edi ǵoı», dep qaldy. Bizdiń de kókeıimizge irkilgen sóz edi bul, Jazmyshtan ozmysh joq degen...

Aqyn ǵumyry – máńgilik. Qazaq degen el barda Farıza da jasaı beredi. Rýh ólmeıdi, rýhtyń tynysy bolǵan poezııanyń ǵumyry máńgilik. Biz osyǵan senemiz, osylaı kóńil jubatamyz.

Janat ÁSKERBEKQYZY,

fılologııa ǵylymdarynyń doktory, professor