Sýretterdi túsirgen – Erlan OMAR, «EQ»
Astanada «Qazaqstan týrızminiń bolashaǵy: strategııalar, syn-qaterler jáne sheshimder» atty sessııa ótti. Sharada saladaǵy negizgi syn-qater talqylanyp, bıylǵy jetistigi saralandy, keler jyldyń damý jospary aıqyndaldy. Sessııaǵa Úkimet apparaty men Syrtqy ister mınıstrliginiń ókilderi, «Kazakh Tourism, Kazakh Invest» ulttyq kompanııalarynyń basshylary, týrıstik ındýstrııanyń jetekshileri, sheteldik sarapshylar qatysty. «Marriott International, Gratiya Advisory» syndy áleýetti kompanııalardyń ókilderi sóz sóılep, álemdik tájirıbeniń ilkimdi jobalarymen bólisti.
Keleli keńes barysynda salanyń 2024 jylǵy jumysy qorytyndylandy. Bıyl sheteldik týrıster aǵyny 11,5 mıllıon adamǵa jetip, 2023 jylmen salystyrǵanda eki esege artty. Meımandardy qarsy alý, ornalastyrý, qyzmet kórsetý oryndarynyń tabysy 27%-ǵa artyp, 224 mıllıard teńgege jetti. Álemdik týrızm naryǵynda elimizdiń ımıdjin nyǵaıtýǵa yqpal etken «Qazaqstan boıynsha gıd» atty aýqymdy konkýrs aıasynda jarnamalyq jobalar júzege asyryldy.
Týrızm jáne sport vıse-mınıstri Erjan Erkinbaev salanyń órisin keńeıtý baǵytynda atqaratyn sharýa áli de shash-etekten ekenin málim etti. «Jyl basynan bastap jeke ınvestorlar men kásipkerlik sýbektilerine memlekettik qoldaý sharalarynyń tıimdiligin arttyrýǵa nazar aýdarý qajet. Sonymen qatar týrıstik salaǵa tikeleı sheteldik ınvestorlardy tartý jónindegi jumystardy jandandyrý kerek. Budan bólek, kýrorttyq aımaqtardyń ınjenerlik-ınfraqurylymdyq qamtamasyz etilýin jaqsartý, sonyń ishinde joldar, elektrmen qamtamasyz etý, sý qubyry júıelerine qatysty qajetti normatıvtik-quqyqtyq aktiler men zańnamaǵa ózgerister engizýdiń mańyzy joǵary», dedi E.Erkinbaev.
Týrızm salasyn el ekonomıkasynyń kúre tamyryna aınaldyrýda memlekettik qoldaý mehanızmderin jetildirip, ınvestısııa tartý qashanda ózekti. Jıyndy qorytyndylaı kelip, qatysýshylar elimizdiń týrızm salasyn damytý baǵytyndaǵy naqty qadamdardy aıqyndap, «Kazakh Tourism» fýnksııalaryn jetildirý, jańa qarjylandyrý tetikterin engizý, elimizdiń halyqaralyq týrıstik alańdaǵy ornyn nyǵaıtý máselelerin naqtylady.
Ishki týrızmniń de áleýeti artyp keledi. Bıyl 6 mıllınnon astam týrısten 224 mlrd teńge kiris kirgen. Týrısterdi ornalastyrý nysandarynyń sany 306 birlikke artyp, 4 315-ge deıin ulǵaıdy, olardyń syıymdylyǵy 18 myń tósek-orynǵa tolyǵyp, 226 myńǵa jetti. Bul elimizdiń ishki jáne syrttan keletin týrısterin qabyldaýǵa áleýeti jetkilikti ekenin aıqyndaı túsedi.
Týrıstik salaǵa ınvestısııa tartý da qarqyn alyp keledi. Bıylǵy 10 aıda onyń kólemi 33,6% -ǵa artyp, 668,1 mıllıard teńgege jetti. Negizgi jobalardyń ishinde quny 194 mıllıard teńge «Astananyń týrıstik aýdanynyń» jóni bólek. Aıaqtalýy 2026 jylǵa josparlanǵan joba tolyq iske qosylǵanda 2 myńǵa jýyq jumys ornyn ashady, jylyna 10 mıllıard teńge salyq túsimin aýdarady.
Ekinshi iri joba – Mańǵystaý oblysyndaǵy Kaspıı rıverasy. Birneshe bastama aıasynda «Jyly jaǵajaı» aýmaǵyn keshendi ıgerý qolǵa alynbaq. Nátıjesinde, jaǵajaı kýrorty, golf-otel, vıllalar kesheni, akvapark, oıyn-saýyq ortalyǵy ashylady. Jobanyń jalpy quny – 137,4 mlrd teńge. Josparly iske asyrý merzimi – 2026 jyl.
Týrıstik salany Úkimet tarapynan demeý kúsheıtilip keledi, bıyl memlekettik qoldaýmen maquldanǵan ótinimder kólemi 3 esege artty. 37 týrıstik nysanǵa, 6 týrıstik avtobýs satyp alýǵa 2,1 mlrd teńge bólindi.
Halyqaralyq yntymaqtastyq qashanda mańyzdy. Bıyl Qytaıda Qazaqstan týrızmi jyly jarııalanyp, osy eldiń iri qalalarynda 30-dan astam is-shara uıymdastyryldy. Sondaı-aq Astanada ótken V Dúnıejúzilik kóshpeliler oıyndary álemdik deńgeıdegi oqıǵa boldy. Dúbirli alamanǵa 89 elden 2 700 qatysýshy keldi. «Astana-Arena» stadıony, «Qazanat» ıppodromy syndy sport nysandaryn jańartý qalanyń ınfraqurylymyn jaqsartyp, týrıstik áleýetin nyǵaıta tústi. Bıyl aýyldyq týrızmdi damytýda ujymdyq eńbek elenip, Almaty oblysy, Kegen aýdanyndaǵy Saty aýylyna «Best Tourism Village Award» syılyǵy berildi. Shyǵys Qazaqstan oblysy, Qatonqaraǵaı aýdanynyń jobasyna halyqaralyq ITB Berlin 2024 konkýrsynda úshinshi oryn buıyrdy.
Salada jyl sońyna deıin jalpy quny 120,4 mlrd teńge bolatyn 119 ınvestısııalyq joba aıaqtalmaq. Nátıjesinde, 1 319 jumys orny ashylady.
