Foto: aulieatanews.kz
25 jeltoqsanda kúndiz Bakýden Groznyıǵa ushqan Ázerbaıjan áýe kompanııasynyń Embraer E190 jolaýshylar ushaǵy radardan joǵalyp ketken. Lokatorlar ushaqty sońǵy ret Aqtaýdyń ústinen ushyp ótkende anyqtaǵan. Áleýmettik jelilerde ushaqtyń apatqa ushyraǵan sátinen vıdeo taralyp jatyr.
Qazaqstannyń Tótenshe jaǵdaılar mınıstrliginiń málimetinshe, apattan aman qalǵandar bar.
Qazirgi tańda qaza tapqandar men zardap shekkender týraly aqparat naqtylanyp jatyr.
Oqıǵa ornyna ondaǵan jedel járdem kóligi shyqty.
Aqtaý áýejaıy reısterdi qabyldaý men jóneltýdi toqtatty. Qutqarý jumystary júrgizilip jatyr.
Aıta keteıik, Bakýden shyqqan ushaq Groznyıdaǵy tumanǵa baılanysty Mahachkalaǵa, odan keıin Aqtaýǵa baǵyttalǵan.
Reseıdiń Baza Telegram arnasy ushaqta 67 jolaýshy men 5 ekıpaj múshesi bolǵanyn habarlady. Ázerbaıjan áýe kompanııasy ázirge bul aqparatty rastaǵan joq.
