Foto: N.Baıbýlın
Otyrysty ashqan Senat Tóraǵasy, aldymen, Palatanyń jáne jeke óz atynan Mańǵystaý oblysynda bolǵan ushaq apatynan qaza tapqandardyń otbasylary men jaqyndaryna kóńil aıtty. Máýlen Áshimbaev tótenshe jaǵdaıǵa baılanysty Memleket basshysy Qasym-Jomart Toqaevtyń tapsyrmasymen memlekettik komıssııa qurylyp, qutqarý operasııasy aıasynda jedel qajetti sharalar qabyldanǵanyn, sondaı-aq, zardap shekkenderge tıisti kómek kórsetilip jatqanyn tilge tıek etti.
Senat otyrysynda depýtattar «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zańdy qarap, maquldady. Talqylaý kezinde aıtylǵandaı, zań tártiptik, ákimshilik jáne qylmystyq jaýapkershilik sharalarynan týyndaıtyn memlekettik qyzmetke kirýdi shekteý merzimderin, olardyń saldarlarynyń mólsherlestigin aıqyndaý, sondaı-aq, quqyq qorǵaý organdary men Qarýly Kúshterdegi basshy laýazymdardy irikteýdi jetildirý jáne olardy jasaqtaý sapasyn arttyrý, arnaýly, áskerı ataǵyn nemese joǵary basshy quram men basqalarynyń synyptyq shenin tómendetý túrinde tártiptik jaza qoldaný tártibin retteýdi jáne taǵy basqa erejelerdi aıqyndaıdy.
Sonymen qatar depýtattar «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zańdy eki oqylymda qarap, maquldady. Zań normalaryna sáıkes «qoǵamdyq jumystar» túrindegi ákimshilik jaza engiziledi. Sondaı-aq qujat ákimshilik quqyq buzýshylyq týraly isterdi qaraýǵa jáne ákimshilik jaza qoldanýǵa quqyǵy bar laýazymdy adamdar sheńberin keńeıtýdi kózdeıdi. Is qysqartylǵan is júrgizý tártibimen júzege asyrylatyn jaǵdaılarda jańadan ashylǵan mán-jaılar boıynsha isterdi qaıta qaraý tártibi de aıqyndalǵan. Jalpy, zań azamattardyń quqyqtary men bostandyqtaryn qorǵaýdy qamtamasyz etýge, ákimshilik-delıktilik zańnamany jetildirýge jáne ońtaılandyrýǵa, sondaı-aq, quqyq qoldaný praktıkasynda anyqtalǵan quqyqtyq olqylyqtar men qaıshylyqtardy joıýǵa múmkindik beredi
Senat Tóraǵasy bul Palatanyń bıylǵy qorytyndy otyrysy ekenin aıtty. Ol óz sózinde 2024 jylǵy zańnamalyq jumystyń nátıjesine toqtalyp, 2025 jylǵa arnalǵan negizgi mindetterge nazar aýdardy. Bıyl Parlament Memleket basshysynyń tapsyrmalaryn oryndaý aıasynda eldiń saıası jáne áleýmettik-ekonomıkalyq ornyqty damýyn qamtamasyz etýge, halyqtyń osal toptaryn qorǵaýǵa jáne basqa da mańyzdy mindetterdi iske asyrýǵa arnalǵan 104 zań qabyldady.
«Jyl basynan beri Parlament 104 zań qabyldady. Olar Memleket basshysynyń tapsyrmalaryn júzege asyrýǵa, sondaı-aq, elimizdiń saıası jáne ornyqty áleýmettik-ekonomıkalyq damýyn qamtamasyz etýge baǵyttalǵan. Memlekettiligimizdi nyǵaıtý, qoǵamnyń osal toptaryn qorǵaý, el ekonomıkasyn, onyń qaýipsizdigi men halyqaralyq bedelin arttyrý sııaqty kóptegen mańyzdy salalar da qamtyldy. Azyq-túlik qaýipsizdigi jáne Ekonomıkanyń óńdeýshi sektoryn damytý máselelerine arnalǵan parlamenttik tyńdaýlar ótkizildi. Demografııalyq ósý máselesine qatysty Úkimet saǵaty jáne 150-den astam dóńgelek ústel men Komıtetterdiń kóshpeli otyrystary uıymdastyryldy. Mańyzdy máseleler boıynsha Úkimetke 180-ge jýyq depýtattyq saýal joldadyq», dedi Palata Spıkeri.
Budan basqa, Máýlen Áshimbaev 2025 jylǵa arnalǵan mindetterdi belgilep berdi. Olar senatorlardyń zańnamalyq jumysyn odan ári kúsheıtýdi jáne óńirlermen ózara is-qımyldy jandandyrýdy kózdeıdi.
«Jyl aıaqtalǵanymen, depýtattyq qyzmetimiz jalǵasa bermek. Erteńnen bastap senatorlardyń óńirlerge saparlary bastalady. Sapar kezinde turǵyndardy alańdatqan ózekti máselelerge basa mán berýimiz kerek. Halyqqa qabyldanǵan zańdardyń mańyzyn da keńinen túsindirgen jón. Kelesi jyly Senat Prezıdentimiz Qasym-Jomart Kemeluly Toqaevtyń tapsyrmasyna sáıkes ázirlengen jańa Bıýdjet, Salyq, Sý, Qurylys kodeksterin qaraıdy. Bul qujattardyń elimiz úshin mańyzdy ekenin eskere otyryp, olardy muqııat pysyqtaýymyz qajet», dep, Máýlen Áshimbaev áriptesterin Memleket basshysy belgilep bergen mindetterdi iske asyrý jolynda belsendilik tanytýǵa shaqyrdy.
Palata otyrysynda senatorlar ózderiniń depýtattyq saýaldaryn da joldady.
Andreı Lýkın shekaralyq ótkizý pýnktterindegi ınfraqurylymdyq máselelerge nazar aýdardy. Senator osy baǵytta birqatar sheshim usyndy. Onyń ishinde júk kóligi úshin servıstik kútý aımaqtaryn qurý, shekara mańyndaǵy temirjol stansalaryn jańartý sııaqty sharalar bar.
Ǵalıasqar Sarybaev ǵarysh salasynyń negizgi máselelerine toqtaldy. Depýtattyń aıtýynsha, «Báıterek» jobasyn iske asyrýǵa erekshe kóńil bólgen jón.
Nurııa Nııazova «Medeý» muz aıdynynyń sporttyq dańqyn qaıta jandandyrý jóninde bastama kóterdi.
Janbolat Jórgenbaev Úkimetti Almaty oblysyndaǵy Alataý qalasynyń qurylysyna memlekettik qoldaýdy arttyrýǵa jáne qolǵa alynǵan jobalardy iske asyrý úshin 2025 jylǵa arnalǵan respýblıkalyq bıýdjetten qarajat bólýge shaqyrdy.
Bıbigúl Jeksenbaı máslıhattardy sıfrlandyrý sapasyna baılanysty máselelerdi kóterdi. Osyǵan baılanysty senator jaǵdaıdy jaqsartýǵa, qyzmetterdi alý prosesin avtomattandyrý arqyly halyqtyń qajetti aqparatqa jedel qol jetkizýin qamtamasyz etýge qatysty usynystaryn jetkizdi.
