Kúmis kúlki kómkergen Kendirli

Jańaózen qalasynan 70 shaqyrym qashyqtyqtaǵy Kendirli jeri búginde jurtshylyqqa jaqsy tanys. Teńiz múıisindegi jaǵalaýy adam shomylyp, demalýǵa qolaıly óńir Mańǵystaý oblysynda týrızm salasyn damytýǵa qatysty tańdaýǵa ıe. Qazirgi tańda munda «О́zenmunaıgaz» AQ-qa qarasty demalys úıleri men «Aqbóbek» balalar demalys ortalyǵy ornalasqan. Balalardyń teńiz sýyna shomylyp, aq qumdy jaǵalaýda demalyp sergýi úshin Kendirli taptyrmas oryn. Osylaı bolǵandyqtan «О́zenmunaıgaz» AQ jyl saıyn munaıshylar men enshiles kásiporyndar qyzmetkerleriniń balalaryn «Aqbóbekte» demaltýdy jolǵa qoıǵan. Biraq, balalar demalysyn mándi de mazmundy ótkizý ońaı jumys emes, ol úshin jan-jaqty da tııanaqty baǵdarlama, talantty da izdenimpaz tálimgerler, ushqyr uıymdastyrýshylyq orta qajet. Sondyqtan kompanııa basshylyǵy ótken jyldan bastap «Aqbóbek» balalar dema­lys ortalyǵynyń jumysyna Kókshe­degi «Baldáýren» respýblıkalyq oqý-saýyq­tyrý ortalyǵyn tartty. Respýb­lıkadaǵy betke ustar ortalyq, birneshe jyldardan beri elimizdiń myńdaǵan óren­derin demaltýdy joǵary deńgeıde uıym­dastyrýmen tanylǵan «Baldáýren» ótken jyly «Aqbóbekte» alǵash ret jumys júrgizip, senim bıiginen kórine bilgen edi. Bıyl da balalarǵa bazarlyǵy osal emes eken. «Jaz qashan bastalar eken, balalardyń demalysyn uıymdas­tyra­tyn», dep jyldyń qalǵan úsh mezgilinde qarap jatpaǵany kórinip tur. Aldymen «Aqbóbek» demalys ortalyǵyn kúrdeli jóndeýden ótkizipti, ishi biraz jańaryp qalǵan. Al ortalyq mańaıyna retpen otyrǵyzylǵan shybyqtar kúni erteń-aq záýlim taldarǵa aınalyp, ortalyq kórkine, balalardyń saıasyna aınalatyny aıan. Qyzyldy-jasyldy sahnanyń sáni naǵyz balalyq baldáýrenniń qaıǵysyz-qamsyz kúnderin elestetedi. Balalar – bolashaǵymyz desek, olar úshin jasalatyn jumystarda aýyzbirlik qajet-aq, jóndeý jumystaryn júrgizgen «Baldáýrenge» «О́zenmunaıgaz» AQ tehnıkalarmen kómek bergenin estip rıza boldyq. Bıylǵy jylǵy jańa maýsym da saltanatty jaǵdaıda ashyldy. «О́zenmunaıgaz» AQ bas dırektory Maqsat Ibaǵarov, respýblıkalyq «Baldáýren» oqý-saýyqtyrý ortalyǵy bas dırektorynyń oqý-tárbıe isi jónindegi orynbasary Birlik Barjaqsynov qatysyp, balalar demalysyna sáttilik tiledi. Bıyl ortalyq jaz boıy balalardy alty aýysymmen qabyldamaq. Ár aýysymda 8-13 jas aralyǵyndaǵy 200-den astam bala demalsa, jaz boıy 1300 balany qamtımyz dep otyr baldáýrendikter. Balalarmen birge oınap, olardy óner men oıyndarǵa úıretetin 25 tálimger jumysqa qabyldanǵan. Tálimgerlerdi jumysqa qabyldaýda jergilikti, ıaǵnı Jańaózen qalasynyń jastaryna basymdyq berilgen, qazir mundaǵy tálimgerlerdiń 90 paıyzy – jańaózendikter. – Bıyl ortalyqta tárbıe jumystaryn patrıottyq, sporttyq jáne zııatkerlik baǵytta júrgizemiz dep otyrmyz, – deıdi «Aqbóbek» balalar demalys ortaly­ǵynyń dırektory Jangeldi Ámirǵalıev. О́tken jyly «Baldáýren» basshylyǵy «Aqbóbektegi» balalarmen jumysty tek jaz mezgilindegi demalystarmen shektemeı, qys mezgilinde de áleýmettik az qamtylǵan otbasylardyń balalarymen jumys júrgizý, múgedek balalardy ońaltýǵa arnalǵan emdeý-saýyqtyrý jumystarymen jalǵastyrý jospary bar ekendigin aıtqan bolatyn. Alaıda, bıyl qys jóndeý jumystaryna arnalypty. Balalardyń demalysyn uıymdastyrýǵa bel sheshe kirisken eki tarap – «О́zenmunaı­gaz» AQ pen respýblıkalyq «Baldáýren» oqý-saýyq­tyrý ortalyǵy bul jospardy aıaqsyz qaldyrmaıtynǵa uqsaıdy. Keı­bir máselelerge qatysty bıyl júze­ge aspaǵan joba aldaǵy kúnderdiń enshi­sinde, deıdi olar. Múgedek balalaryn ońaltý-saýyq­tyrý úshin elimizdiń bir qıyryn­daǵy Kókshege, Býrabaıǵa artynyp-tartynyp jolǵa shyqpaı, ol múmkin­dik­ke Kaspııdiń jaǵalaýyndaǵy Ken­dir­lide qol jetkizse, múgedek balasy bar mańǵystaýlyqtar úshin de ońaıǵa túseıin dep tur. «О́zenmunaıgaz» AQ tarapynan senim bildirilgen respýblıkalyq «Baldáýren» oqý-saýyqtyrý ortalyǵy «Aqbóbekte» kezek­ti jazǵy demalystyń alǵashqy maýysymyn bastap ketti. Kendirli qazir balalardyń jarqyn únine shomylyp, kúmis kúlkisine kómkerilip tur. Gúlaıym ShYNTEMIRQYZY, «Egemen Qazaqstan». Mańǵystaý oblysy. Sýretti túsirgen avtor.