Foto: BQATÝ medıa ortalyǵy
Atap aıtqanda, ýnıversıtettiń ǵalym-ustazdary Qaısar Kóshálıev, Birjan Nurǵalıev jáne Laýra Dýshaeva Qazaqstan boıynsha joǵary oqý oryndary úzdik oqytýshylarynyń tizimine engen.
Bul ǵalymdar ýnıversıtettiń «Veterınarııa jáne agrotehnologııa» ınstıtýtynda qyzmet etedi. Veterınarııa ǵylymdarynyń doktory, professor Qaısar Jalıtuly – 270-ten astam ǵylymı jáne oqý-ádistemelik eńbektiń avtory, sonyń ishinde ǵylymı-zertteý jumystarynyń qorytyndysy boıynsha 5 ónertabys kýáligin alǵan. Ol sońǵy jyldary aqbóken taqyrybyn zerttep júr. Ol «Qazaqstan Respýblıkasynyń ǵylymyn damytýdaǵy qyzmeti úshin» jáne «Bilim berý isiniń qurmetti qyzmetkeri» tósbelgileriniń ıegeri. Aıta keterligi, ǵalym-ustaz 2011 jyly «JOO úzdik oqytýshysy» memlekettik grantynyń ıegeri atanǵan. Demek, mundaı ataqqa Qaısar Jálıtuly ekinshi márte laıyqty dep tanyldy.
Úzdikter qataryna ilikken veterınarııa ǵylymdarynyń kandıdaty, qaýymdastyrylǵan professor Birjan Elýbaıuly – Jáńgir han ýnıversıtetiniń janyndaǵy «Veterınarııa jáne agrotehnologııa» ınstıtýtynyń dırektory. 100-ge jýyq ǵylymı eńbektiń, bes oqý quralynyń jáne alty oqý-ádistemelik nusqaýlyqtyń avtory. Joǵary bilim jáne ǵylym salasyndaǵy qajyrly eńbegi úshin QR Bilim jáne ǵylym mınıstrliginiń Qurmet gramotasymen, «Ǵylymdy damytýǵa sińirgen eńbegi úshin» tósbelgimen marapattalǵan ǵalym-ustaz mal sharýashylyǵy ónimderin veterınarlyq-sanıtarlyq saraptaý baǵytyndaǵy ǵylymı zertteýlermen aınalysady.
Úzdik oqytýshy atanǵan kelesi jas ǵalym – «Veterınarııalyq jáne bıologııalyq qaýipsizdik» zerthanasynyń meńgerýshisi, veterınarııa ǵylymdarynyń fılosofııa doktory (PhD), qaýymdastyrylǵan professor Laýra Janedilqyzy bıyl halyqaralyq «500 ǵalym» baǵdarlamasy aıasynda AQSh-tyń Merılend ýnıversıtetinde molekýlıarlyq epıdemıologııa baǵyty boıynsha ǵylymı taǵylymdamadan ótip keldi. QR Bilim jáne ǵylym mınıstrliginiń Qurmet gramotasynyń, «Ǵylymdy damytýǵa sińirgen eńbegi úshin» tósbelgisiniń ıegeri.
Batys Qazaqstan oblysy
