Zaýyt dırektory Pavel Saenkonyń aıtýynsha, óndiristiń aıaqtan turýyna «Damý» kásipkerlikti damytý qorynyń óńirlik fılıaly arqyly berilgen 2,7 mlrd teńge qoldaý bolǵan.
«Osy qarajatty óndiris alańdaryn keńeıtýge jumsadyq. Oǵan kásiporyn qarjysynan 1 mlrd teńge qosyp, Italııadan zamanaýı qondyrǵylar satyp alyp, №2 sehty túgel jabdyqtadyq. Jabdyqtar jetkizgen kompanııa jumysshylarymyzdy oqytyp berdi. Zamanaýı jabdyqtar men jumysshylar biliktiliginiń artýy eńbek ónimdiligin arttyrdy. Zaýytta 100 jumysshy eki aýysymmen jumys isteıdi Aldaǵy jyly 20 myń tonna metall qubyr men buıymdar shyǵarý josparymyzda bar», deıdi Pavel Pavlovıch.
Jabdyqtar men qondyrǵylar Túrkııa men Qytaıdan ákelingen. О́ndiris alańdary tolyq jabdyqtalyp, jańa sehtyń №4 jáne №5-jelileri iske qosylǵan soń, 3 aýysymdyq jumys tásiline kóship, taǵy 200 adamdy jumysqa qabyldaıdy.
«Qubyrlarymyzdy negizinen otandyq kompanııalar satyp alady. Sońǵy kezde О́zbekstannan kóp tapsyrys túsip, sol jaqqa jóneltip jatyrmyz. Kóp suranysqa ıe ónimimiz – jylyjaı qańqasyn turǵyzýǵa qajetti ıilgish temirler. Kóppáterli úılerdiń jertólesine sý jáne gaz ótkizgende mindetti túrde metall qubyrlar salynady. Apatty jaǵdaılardyń aldyn alý úshin adam tyǵyz qonystanatyn turǵyn úılerdiń sý ne gaz qubyryn ortaq taratý jelisine plastık nemese metall plastık qubyrlar salýǵa bolmaıdy. Bular úlken qysymǵa shydamaı, jarylyp ketýi múmkin. Sondyqtan eń senimdisi – ótkizý qabileti joǵary ári berik metall qubyrlar», deıdi P. Saenko.
Metall quımalary túrindegi shıkizat «Arselor Mıttal Temirtaý» kompanııasynan jetkiziledi. Metall quımalary sehta túrli qalyppen, túrli ólshemmen kesilip, sehtarǵa jóneltiledi. Qazir óndiris ornynda sharýashylyqta kóp qoldanylatyn dıametri 120 mm, 159 mm-lik, 10h10 sm-lik qubyrlar kóptep daıyndalady. Taǵy bir sehta óndiriske, ǵımarat qurylysyna paıdalanylatyn dıametri 120h120 sm ólshemdegi tikburyshty qubyrlar da ázirlenedi.
«Zaýyttan ákelingen ártúrli qalyńdyqtaǵy quımany qalypqa salyp, túrli ólshemde kesemiz. Biz kesip bergen materıaldan ártúrli pishinde qubyrlar shyǵarylady. Jabdyqtar avtomattandyrylǵan. Adam tek jumys barysyn úzdiksiz qadaǵalaıdy. О́te sırek jaǵdaıda ǵana qolmen jóndeımiz. Qazir tórtburyshty, dóńgelek pishindegi qubyrlar daıyndap jatyrmyz. Jumys barysynda eńbek qaýipsizdigi tolyq saqtalady. Arnaýly kıim, kaskalarymyz bar. Jumysym tańǵy saǵat 8-de bastalyp, keshki 8-ge deıin sozylady. Túngi aýysymǵa basqa top keledi», deıdi jabdyqtardy retteýshi Nurjan Tájbenov.
«Damý» kásipkerlikti qoldaý qory AQ-nyń óńirlik fılıalynyń dırektory Aınagúl Baıdáýletovanyń aıtýynsha, osy jyly Aqtóbe oblysy boıynsha 1 930 joba memlekettik qoldaýǵa ıe bolǵan. Sonyń biri – osy Aqtóbe metall qubyrlar zaýyty.
Aqtóbe oblysy
