«Bizdiń bolashaǵymyz – óskeleń urpaqtyń ýaqyt talabyna saı tereń bilim men tárbıe alýyna qolaıly ári óte ádemi mektepter boı kóterip jatyr. Bıyl oblysta «Jaıly mektep» jobasymen 7 mektep paıdalanýǵa berilse, sonyń 6-ýy Qarasaı aýdanynda. О́ıtkeni bul aýdanda halyq óte tyǵyz shoǵyrlanǵan. Balalar sany jyl saıyn artyp otyrǵandyqtan, osy aýdanda salý josparlanǵan. Jaıly mektepte oqýshylarymyz jaqsy bilim alyp, oqý men sporttaǵy jetistikterin eseleı túserine senimdimiz», degen óńir basshysy Marat Sultanǵazıev qurylys jumystaryn ýaqtyly ári sapaly aıaqtaǵan «BI Urban Construction» kompanııasynyń qurylysshylaryna Alǵys hattar tabystady.
Sonymen Qaskeleń qalasynyń irgesinde boı kótergen 1500 oryndyq mekteptiń ashylý saltanatynan soń, Kemertoǵan aýylynda da dál osyndaı «Jaıly mektep» baǵdarlamasy boıynsha irgesi qalanǵan ǵımarat paıdalanýǵa berildi.
«Oblysta úshaýysymdy oqytý máselesin joıý boıynsha bıyl 26 mektep qurylysyn bastadyq. Onyń 10-y qoldanysqa berildi. Kemertoǵan aýylynda da mektep tapshylyǵy óte kúrdeli másele bolǵan edi. Endi osy záýlim ǵımaratta balalar alańsyz bilim alatyn bolady. Munda ınklıýzıvtik ortalyq, kitaphana, ashana, sheberhana, májilis zaldary, sport zaldary bar. Aımaqtaǵy aýyl mektepterindegi oqýshylardyń áleýeti óte joǵary jáne ony damytý úshin jan-jaqty qoldaý kórsetkimiz keledi. Eki jyldan beri oqýshylarymyz «Ulttyq aýyl mektepteriniń» olıpıadasyna qatysyp keledi. Almaty oblysy byltyr 32 júldemen 2-oryn alsa, bıyl 34 júldemen aýyl mektepteriniń arasynda 1-orynǵa shyqty. Qoldanysqa berilgen bul mektepte de biraz oqýshylar kelesi jyly sol olımpıadaǵa qatysýǵa daıyn bolady degen oıdamyn. Bul nátıjege baǵyttalǵan jumystyń jemisi», degen oblys ákimi Marat Eleýsizuly ustazdar ujymy men ata-ana, oqýshylardy qýanyshtarymen quttyqtap, tabysty bolýyn tiledi.
Budan soń ulaǵatty ustaz, «Asyl ana» qoǵamdyq birlestiginiń tóraıymy Ultýsyn Amankeldiqyzy da izgi tilegin bildirdi.
«1500 oryndyq mekteptiń normotıvtik qurylys ýaqyty 22 aı bolsa, bul mektep kóz aldaryńyzda 11 aıda salynyp shyqty. Mundaı mektepter shetelderde joq. Tehnıkalyq jabdyqtalýy da óte joǵary deńgeıde. Ul-qyzdaryńyzdyń qalaǵa baryp oqýynyń qajeti joq. Osyndaı mektepter berilgeli beri balalardyń sabaq úlgerimi artqan eken. Oǵan mekteptiń tehnıkalyq bazasynyń ozyq tehnologııamen jabdyqtalýy sebep. Sondyqtan da aýyl halqy úshin zor qýanysh. Bul – memlekettiń qamqorlyǵy», dedi «Samruk-Kazyna Construction» AQ basqarma tóraǵasy Máýlen Aımanbetov.
Jan jadyratqan jańa mektepke kelgen oqýshy sany 2500-ge jýyqtaǵany týraly mektep dırektorynyń mindetin atqarýshy Dáýren Bolatuly tilge tıek etti. 1200 oryndyq Kemertoǵan orta mektebinde qazirgi tańda 6000-ǵa jýyq bala úshaýysymda bilim alýda eken. Endi mine, «Jaıly mekteptiń» qurylysy aıaqtalyp, oqýshylardyń teń jarymy jańa mektepke aýysyp, sonyń arqasynda júkteme azaıatyn bolady.
Úlken megapolıstiń irgesindegi aýylda ósim bar. Búgingi kúni aýyl mektebinde 11-synypta 200-ge jýyq oqýshy bar bolsa, 2500-den asa bala bastaýyshta bilim alyp jatyr.
Almaty oblysy
