«Memleket Basshysy óziniń halyqqa Joldaýynda balalarǵa jaqsy jaǵdaı týǵyzyp, orta bilimniń sapasyn arttyrý jóninde aıtqan bolatyn. «Elimizdiń kadrlyq áleýetin arttyrý isinde orta bilim berý júıesi óte mańyzdy ról atqarady. Meniń tapsyrmammen «Jaıly mektep» ulttyq jobasy júzege asyrylyp jatyr. 2025 jyldyń sońyna deıin zamanaýı úlgidegi 217 mektep paıdalanýǵa beriledi dep josparlanǵan. Osy óte mańyzdy jumysty «Samuryq-Qazyna» qory qadaǵalap otyr. Úkimet pen ákimder bul sharýaǵa belsene atsalysýǵa tıis. Depýtattar da ortaq isten shet qalmaıdy dep oılaımyn» degen edi Prezıdent. Sońǵy eki jyl ishinde oblysta jańadan 22 mektep boı kóterdi. Osy «Jaıly mektep» jobasy aıasynda 2025 jyly Batys Qazaqstan oblysynda taǵy 6 mekteptiń qurylysy júredi», dedi óz sózinde Narıman Tóreǵalıev.
Oblys ákiminiń aıtýynsha, kóktemgi sý tasqynynan zardap shegýshilerge kóp úı salynǵan «Juldyz» shaǵynaýdanynda da jańa mektep salynatyn bolady.
Saltanatty jıynǵa «Samruk-Kazyna Construction» aksıonerlik qoǵamy basqarma tóraǵasynyń ulttyq jobalar jáne óńirlik damý jónindegi orynbasary Qýat Jylqybaev, qurylys nysanynyń bas merdigeri «KazConstuction Group» JShS dırektory Muratbek Muhambedıev jáne bilim uıymdarynyń qyzmetkerleri men ardagerler, ata-analar qatysty. Jergilikti turǵyndar tarapynan Qaırolla Aıtqalıuly sóz alyp, osyndaı ǵajaıyp bilim ordasyn tartý etken Memleket basshysyna, qurylysshylarǵa alǵysyn aıtty. Mekteptiń sımvolıkalyq kilti mektep dırektory Jaqsyǵalı Jumabaıǵa tabys etildi.
Jaıly mekteptiń aýmaǵy ádettegi bilim oshaqtaryna qaraǵanda keńirek, al tehnıkalyq jabdyqtalýy 4 ese artyq. Jalpy aýmaǵy – 3 ga, ǵımarattyń aýdany – 2 ga. Mektep úsh qabatty, 10 bloktan turady. Kirip-shyǵý esikterine týrnıket qoıylǵan. Balalar úshin beınebaqylaý júıesi, dybystyq habarlaý jáne basqa da kúsheıtilgen qaýipsizdik sharalary ornatylǵan. О́rt qaýpine qarsy brondalǵan bólme bar.
Mektep oqýshylardyń oqý quralyn, kıimin qoıýǵa arnalǵan jeke shkaftarmen jabdyqtalǵan. Sondaı-aq kitap oqýǵa, balalardyń shyǵarmashylyq damýy men demalýyna tıisti barlyq jaǵdaı jasalǵan. 4 sport zaly, 3 sheberhana, 56 synyp, 18 arnaıy kabınet, kitaphana, májilis zaly, ashana bar. Kabınetterge touch-ekrandar ornatylǵan. Mekteptiń kez kelgen jerinen jyldamdyǵy joǵary ınternetke qosylýǵa bolady. Balalarǵa arnalǵan mýzykalyq aspaptar, sonyń ishinde 50 dombyra da qamtylǵan.
Árıne, jańa ǵımaratta erekshe balalar úshin de kedergisiz qozǵalýǵa arnalǵan pandýstar, lıft, arnaıy dárethana jáne ınklıýzıvti bilim berý kabıneti jasaqtalypty. Mektep aýmaǵynda sportpen shuǵyldanýǵa jáne basqa da is-sharalarǵa arnalǵan alańdar jasalǵan. Mektep ǵımaratyn jobalaýshy – «AQMOL project» JShS barlyq jaǵdaıdy eskergen eken. Qurylystyń jalpy quny 7,8 mlrd teńge ekendigi habarlandy.
Aıta keteıik, ǵımarat úsh qabatty jáne jertólesi bar. Mekteptiń sol qanaty – bastaýysh synyptarǵa, sol qanaty – orta jáne joǵary synyptarǵa arnalǵan, ortańǵy bóliginde jalpy mektep jaılaryna arnalǵan bloktar ornalasqan. Munda sport zaldyń ózi – tórteý, bastaýysh synyp oqýshylary úshin eki zal bolsa, orta jáne joǵary synyptar úshin bólek taǵy sport zaldary bar. Sheberhanalardyń shyǵý esigi bólek. Al 190 oryndyq akt zaly ortalyq bloktyń ekinshi qabatynda ornalasqan. 378 oryndyq ashananyń kiretin esigi úsheý: joǵary jáne bastaýysh synyp oqýshylary bólek qatynaıdy. Úshinshi qabatta ortalyq bólikte kitaphana jáne birneshe kovorkıng alańy bar. Mýzyka synyby men horeografııa kabıneti joǵary jáne kishi býyndar blogynyń túıisken jerinde ornalasqan.
Jańa mektep ashylǵan Derkúl kentinde osy kezge deıin jumys istep kelgen №49 mektep úsh aýysymda bilim beretin edi. Endi onyń júktemesi azaıyp, 1097 oqýshy, 97 pedagog jańa mektepke kóshedi dep josparlanyp otyr.
Batys Qazaqstan oblysy
