Foto: gov.kz.
Qorǵanys isteri jónindegi departament bastyǵynyń orynbasary podpolkovnık Jandos Kúlderbaev mereıtoı ıesine Qorǵanys mınıstri general-polkovnık Rýslan Jaqsylyqovtyń quttyqtaý haty men estelik syılyqtardy tabystady.
Zákir Musaev 1925 jyly 1 qańtarda Ońtústik Qazaqstan oblysy Eski Iqan aýylynda dúnıege kelgen. 1943 jyly Zákir Musaev ásker qataryna shaqyrylyp, Petropavlda 44-shi polkte qyzmet etti. Sol jyldyń qyrkúıeginde óz erkimen maıdanǵa attanady. Soǵysta eki ret jaraqat aldy. Otan soǵysy, Qyzyl Juldyz ordenderimen jáne 13 jaýyngerlik medalmen marapattalǵan.
Qorǵanys mınıstrliginiń baspasóz qyzmetiniń málim etýinshe soǵystan keıin Zákir Musaev 1950 jylǵa deıin Drezdendegi NKVD ǵımaratynda kúzet bóliminde qyzmet etti. Týǵan jerine oralyp, aldymen Kalının atyndaǵy kolhozda, sodan keıin partııanyń XXIII sezi atyndaǵy keńshardyń Iqan maqta stansııasynda esepshi bolyp jumys istep, 1985 jyly zeınetke shyqty. Tórt qyz, bir uly bar.
Aıta keteıik, búginde Túrkistan oblysynda ekinshi dúnıejúzilik soǵysyna qatysqan on ardager qaldy.
