Memleket basshysy ınvestısııa jáne bıznes salasyndaǵy ahýaldy jaqsartýǵa, kásipkerlik bastamalardy qoldaýǵa aıryqsha nazar aýdaryp keledi.
«Kúzdegi Joldaýymda Úkimetke osyǵan qatysty naqty tapsyrmalar berdim. Byltyr sáýirde kásipkerlerge qolaıly jaǵdaı jasaý úshin bıznesti júrgizý máselesine qatysty zań qabyldadyq. Qazir memlekettik baqylaý júıesin retke keltirip jatyrmyz. Burynǵydaı zańsyzdyqtardy tekserýge emes, onyń aldyn alýǵa kóbirek basymdyq berilip otyr. «Basynan bastap retteý» tásili engizilip jatyr. Keıbir ekonomıkalyq qylmystar qylmys sanatynan shyǵaryldy, ekonomıkalyq quqyq buzýshylyqtyń 29 túri boıynsha qamaýǵa alý jazasyn qoldanýǵa tyıym salyndy. Munyń bári kásipkerlerdiń múddesi úshin jasaldy», dedi Prezıdent.
Memleket sýbsıdııa, jeńildetilgen nesıe jáne kepildendirilgen qaryz berý arqyly shaǵyn jáne orta bızneske qoldaý kórsetip otyr. Shaǵyn jáne orta bıznestiń el ekonomıkasyndaǵy úlesi úzdiksiz artyp keledi. Búginde osy bıznestiń ókilderi 4,3 mıllıon adamǵa, ıaǵnı eńbek etip júrgen azamattardyń teń jartysyna jýyǵyna jumys taýyp berip otyr. Sondyqtan kásipkerlik bastamalar el ekonomıkasynyń negizgi qozǵaýshy kúshine aınalyp keledi dep senimmen aıtýǵa bolady.
«Qazaqstanda óz jumysyna jańa tehnologııalardy engizip júrgen ozyq oıly kásipkerlerdiń jańa býyny paıda boldy. Mundaı kásipkerler álemdik básekege túsýge de qabiletti. Qazir sheteldik bıznestiń Qazaqstanda óz ókildigin ashyp jatqany da kóńil qýantady. Bul jaǵdaı otandyq naryqqa halyqaralyq sıpat berýge, ádil básekeni kúsheıtýge jáne ekonomıkany ártaraptandyrýǵa yqpal etedi. Osy oraıda, Úkimet janynan qurylǵan Investısııalyq shtab «bir tereze» qaǵıdatyna saı áreket etip, sheshimder qabyldap, ózine júktelgen mindetti tolyq atqaryp jatqanyn atap ótken jón», dedi Qasym-Jomart Toqaev.
Prezıdenttiń aıtýynsha, memlekettiń ınvestısııalyq ahýaldy jaqsartý jolyndaǵy jumysy jemisin berip jatyr. Jaqynda Birikken Ulttar Uıymynyń Azııa men Tynyq muhıt elderine arnalǵan ekonomıkalyq jáne áleýmettik komıssııasy ınvestısııa jónindegi baıandamasyn jarııalady. Onda Qazaqstannyń 2024 jyly jańa jobalarǵa 15,7 mıllıard dollar kóleminde tikeleı shetel ınvestısııasyn tartqany kórsetilgen. Bul onyń aldyndaǵy jylmen salystyrǵanda 88 paıyzǵa artyq.
«Biz Soltústik jáne Ortalyq Azııadaǵy eń joǵary kórsetkishke qol jetkizip otyrmyz. Aımaqtaǵy shetel ınvestısııalarynyń úshten ekisine jýyǵy, ıaǵnı 63 paıyzy Qazaqstannyń enshisinde.
Men bıznes ókilderimen, ınvestorlarmen aldaǵy ýaqytta da kezdesetin bolamyn. Olardyń jasampaz bastamalaryn qoldaımyn. Úkimet pen barlyq memlekettik organdardan da osyny, ıaǵnı bızneske qulaq asyp, onymen úılesimdi jumys júrgizýdi, bolashaǵy zor jobalarǵa qarjy salatyn kásipkerler men ınvestorlarǵa qoldaý kórsetýdi talap etemin. Bızneske múlde qysym kórsetilmeýi kerek. Sheneýnikter men kúshtik qurylymdardyń qyzmetkerlerin mundaı áreketteri úshin jazalap jatyrmyz, aldaǵy ýaqytta da jaýapkershilikke tartatyn bolamyz. Al kásipkerler alaıaqtyq jasamaı, zań aıasynda jumys isteýge tıis», dedi Memleket basshysy.
