Foto: Oqu-agartu ministrligi
Jyl qorytyndysyna qaraǵanda, paıdalanýǵa berilgen oqýshy orny rekordtyq kórsetkishke jetken. Qurylysy aıaqtalǵan 257 mektep – úsh aýysymdy 42 mekteptiń jáne 148 eldi mekende ornalasqan 20 apatty mektep pen oryn tapshylyǵy máselesin sheshýge múmkindik berip otyr.
Oqý-aǵartý mınıstrliginiń baspasóz qyzmeti málim etkendeı, úsh aýysymdy oqytý jáne apatty mektepter máselesin sheshý boıynsha bıýdjet qarajaty men ınvestısııa esebinen júıeli jumystar júrgizilip jatyr.
Memleket basshysy bastamashylyq etken «Jaıly mektep» ulttyq jobasy sheńberinde oqý jylynyń basynan 254 myń oqýshy ornyna arnalǵan 105 mektep paıdalanýǵa berilgen, onyń 40%-dan astamy aýyldyq jerlerde ornalasqan.
Bilim berý ınfraqurylymyn qoldaý qory boıynsha 27 myń oqýshy ornyna arnalǵan 25 mektep qoldanysqa berildi. Qosymsha taǵy 5 mektep pen 3,3 myń oryndyq ınternat qurylysy júrip jatyr. Bilim berý nysandarynyń basym bóligi Jetisý, Qyzylorda, Batys Qazaqstan, Aqmola oblystarynda jáne Almaty qalasynda salynyp jatyr. Barlyǵy jemqorlardan tárkilengen qarajat esebinen jalpy sany 100 myń oqýshy oryndyq 89 mekteptiń qurylysy qarjylandyrylǵan.
Sondaı-aq respýblıkalyq jáne jergilikti bıýdjet qarajaty men jeke ınvestısııalar tartý esebinen 92 myń oqýshy ornyna arnalǵan 127 mektep qurylysy júrgizildi.
Jańa nysandardy iske qosýmen qatar qoldanystaǵy ınfraqurylymdy jaqsartý boıynsha aýqymdy jumystar júrgizildi:
• 254 orta oqý orny kúrdeli jóndeýden ótti;
• 967 mektepke arnalǵan 1621 zamanaýı pándik kabınet satyp alyndy;
• zamanaýı standarttarǵa sáıkes 1 myń aýyl mektebi jańǵyrtyldy;
• 10 myńnan astam bilim berý uıymynyń qaýipsizdik júıeleri men tehnıkalyq jaraqtandyrylýy jaqsartyldy.
