О́mirin fotoónermen egiz órgen aǵaıydy Samat, Maqsat, Azamat Qusaıynovtar – elimizdiń beldi basylymdarynda qyzmet etip júrgen tanymal fototilshiler. Búgingi áńgimeniń ózegi fotoóner álemine alǵash qadam basqan úıdiń úlkeni – Samat Qusaıynov. Onyń obektıvine ilingen taqyryptardyń aıasy keń. Qazaq halqynyń ádet-ǵurpy, salt-sanasy, dala dástúri, ulttyq oıyndary men qonaqjaılyǵyn arqaý etken myńdaǵan sýrettiń óne boıynan óz isin qulaı súıgen sheberdiń qoltańbasyn kóresiz. «Ana tili», «Qazaq ádebıeti» «Ádebıet aıdyny», «Saqshy», «Prezıdent jáne halyq», «Almaty aqshamy» gazetterinde, «Parasat», «Aıgólek», «Altyn besik» jýrnaldardarynda tabandy qyzmet etken «Aqparat salasynyń úzdigi» jemisti eńbegi úshin Prezıdenttiń Alǵys hatymen marapattaldy.
Qyraǵy fotograftyń jumystary tek elimizde ǵana emes, Germanııanyń Shtýtgard, Túrkııanyń Ystanbul, Ońtústik Koreıanyń Tegý qalalarynda kórmege qoıylǵan. Qazaq dalasynyń baı tabıǵatyn pash etetin týyndylarynyń taǵy bir legi taıaýda Túrkııanyń «Anadoly órkenıetteri murajaıynda» saltanat qurǵan «Uly dala mádenıeti» kórmesi arqyly týysqan halyqtarǵa jol tartty.
– Meniń maqsatym – qazaq mádenıetin, ulttyq oıyndardy, ádet-ǵurypty sýret óneri arqyly dáripteý. Túrki memleketteriniń yntymaqtastyǵyn tý etken shara TÚRKSOI uıymynyń jáne ózim qyzmet etip júrgen «AIatau Aqparat» medıaholdınginiń qoldaýymen ótti. Sýretterimde túbi bir týysqan halyqtarǵa ortaq qundylyqtardy da kórsetýge tyrystym. Fotosýret – árbir sátti ustaý. Biraz jyl buryn Astanadaǵy Ulttyq kitaphanada «Saıyn dalanyń – salt dástúri» dep atalǵan fotokórmemdi ótkizdim. Sol kórmege kelgen sheteldikterdiń qyzyǵýshylyǵyn kórip, taǵy da shabyt ala tústim. Jýrnalıst árbir maqalany ashý úshin qalaı izdenetin bolsa, fotografııa da úlken izdenisti qajet etedi. Bir sýretpen bir maqalany ashýǵa bolady. Fotoapparattyń ishinen, obektıvtiń ar jaǵynan ómirdi kórip turýyń kerek. Meniń uǵymymda sýretke túsirý – óner. Sýretke túsirgen kezde adamnyń portretinen tiri dúnıe shyǵarýyń qajet. Peızaj ben portret janyma jaqyn janrlar, – deıdi S.Qusaıynov.
Únemi izdenis ústinde júretin fotogerdiń «Sarysýdyń syrly sýreti», «Sarysý saıaly mekenim», «Mereıli ólke – Moıynqum» atty foto jınaqtary kópshilikke jol tartty. Sákeńniń jeke prodıýserligimen jaryq kórgen «30-dan asyp baramyn», «Bizdi kúter bir baqyt» tolyq metrajdy fılmderi de – úlken eńbektiń jemisi. Erdiń jasy elýdi eńsergen áriptesimizge tolaıym tabys tileımiz!
ALMATY
