Foto: Májilistiń baspasóz qyzmeti
Kezdesý barysynda sport mamandarymen salanyń jetistikteri men kemshilikteri talqylandy. Oblystyq sport basqarmasynyń basshysy Erbolat Sarabekovtyń aıtýynsha, Prezıdenttiń sport salasyn reformalaý jónindegi tapsyrmasyna sáıkes birqatar sharalar júzege asyrylyp jatyr. Buqaralyq, ulttyq jáne olımpıadalyq sport túrlerin damytý boıynsha naqty jumystar qolǵa alynǵan.
«Jastardyń bos ýaqytyn tıimdi uıymdastyrý jáne salaýatty ómir saltyn nasıhattaý maqsatynda shalǵaı aýyldarda sport zaldary ashylyp jatyr. Máselen, byltyr Shelek, Narynqol jáne Qarakastek aýyldarynda tórt sport kesheni paıdalanýǵa berildi. Aldaǵy ýaqytta halyq tyǵyz qonystanǵan eldi mekenderde osyndaı nysandar salý josparlanǵan. Turǵyndarmen kezdesýde «sport keshenderi qajet» degen másele jıi kóteriledi. Jalpy, Almaty oblysyndaǵy sport salasynyń damýyna oń baǵa berýge bolady. О́tken jyly Parıj Olımpıadasynda óńirden bes sportshy lısenzııa alyp, Demeý Jadyraev grek-rım kúresinen kúmis medal jeńip aldy. Bul óte jaqsy kórsetkish. Degenmen, osy jetistiktermen toqtap qalmaı, bolashaqta 1,7 mıllıon halqy bar Almaty oblysynan Olımpıada men álem chempıondary shyǵatynyna senemiz», dedi Danııar Qasqaraýov.
Sonymen qatar depýtat Almaty oblysy Qarasaı aýdanyndaǵy mektep máselelerine de nazar aýdardy. Aýdanda 2024 jyly «Jaıly mektep» baǵdarlamasy aıasynda segiz bilim oshaǵynyń qurylysy júrgizilgen. Eltaı, Qoshmambet, Dolan, Kemertoǵan, Kókózek aýyldary men Qaskeleń qalasyndaǵy mektepterdiń qurylysy aıaqtalyp, paıdalanýǵa berildi.
«Prezıdent tapsyrmasymen salynǵan bul bilim berý mekemeleri zamanaýı úlgide salynyp, tolyq jabdyqtalǵan. Oqýshylardyń sapaly bilim alýyna barlyq jaǵdaı jasalǵan. Sonymen qatar Almalybaq pen Bulaqty aýyldarynda taǵy eki mekteptiń qurylysy júrip jatyr. Olar jańa oqý jylyna deıin paıdalanýǵa beriledi dep josparlanyp otyr. Osyndaı aýqymdy jumystardyń arqasynda aýdandaǵy úsh aýysymmen oqytý máselesi tolyǵymen sheshilip, 15 myń oqýshy jańa mekteptermen qamtylady», dep atap ótti depýtat.
