«Qalıbek Qýanyshbaev atyndaǵy Qazaq ulttyq mýzykalyq drama teatrynyń Halyq aspaptar ansambliniń múshesi Álibek Qaıyrbek Afrıkanyń eń bıik shyńy – Kılımandjaro taýynda qazaqtyń qasıetti dombyrasyn áýeletti. Bul – ulttyq ónerimizdiń erekshe únin taý shyńynda tanytqan biregeı sát. Álibek Qaıyrbekti osy jetistigimen barsha teatr ujymy atynan shyn júrekten quttyqtaımyz!», delingen habarlamada.
Ekspedısııa 2025 jyldyń 6-11 qańtary aralyǵynda ótti, al Álibek Ýhýrý shyńyna 11 qańtar kúni tańerteń barǵan.
Aıta keteıik, bul Álibektiń birinshi jetistigi emes. 2024 jyldyń tamyz aıynda ol Eýropadaǵy eń bıik taý Elbrýs shyńynda kúı oryndaǵan. Qazaqstandyq «Álemniń jeti shyńynyń» barlyǵyn baǵyndyryp, árqaısysynda qazaq kúılerin oryndap, ulttyq mádenıettiń baılyǵyn álemge pash etýdi aldyna maqsat etip qoıǵan.
«Men Elbrýs pen Kılımandjarony baǵyndyrdym. Endi qaı shyńǵa shyǵý kerektigin anyqtaý úshin taý gıdterimen aqyldasyp jatyrmyn», dedi ol óz josparlarymen bólisip.
Álibek atap ótkendeı, «Álemniń jeti shyńyna» kelesi taýlar jatady:
- Elbrýs (5642 metr, Eýropa);
- Kılımandjaro (5895 m, Afrıka);
- Denalı (6190 metr, Soltústik Amerıka);
- Akonkagýa (6961 metr, Ońtústik Amerıka);
- Vınson (4892 metr, Antarktıda);
- Kostıýshko (2228 metr, Avstralııa) nemese Pýnchak Djaıa (4884 metr, Okeanııa);
- Everest (8849 metr, Azııa).
