Úsh júz saıajaıǵa aýyl mártebesi berildi

Iesizdiń kúıin keshken halyqtyń zar-muńyna qulaq túrgen Májilis depýtaty, «Amanat» partııasy fraksııasynyń múshesi Maqsat Tolyqbaı Almaty oblysyndaǵy halyq tyǵyz qonystanǵan saıajaı­lardyń ózekti máselelerin qozǵap, Úkimetke saýal joldaǵan bolatyn.

«Qonaev qalasy, Qarasaı, Eńbekshiqazaq, Talǵar, Jambyl, Ile aýdanynyń ózinde 674 saıajaı bar. Turǵyndarynyń sany bes júz myńǵa jaqyndaǵan. Bul derektiń ózin de naqty aıtý qıyn. Sebebi, azamattar turǵylyqty mekenjaıy boıynsha tirkele almaǵan soń, járdemaqy men memlekettik kómek alý úshin Almaty qalasyna tirkelýge májbúr. Halyq qysy-jazy turǵynjaı etip otyrǵan júzdegen saıajaıda mektep, ba­labaqsha, qoǵamdyq kólik qaty­nasy, medısınalyq járdem kórsetý, asfalt, poshta, baılanys pýnkteri áleýmettik qyzmet ın­fraqurylymy, áleýmettik nysandar atymen joq. Elektr qýatyna deıin jekeniń qolynda. Eki ese tarıfpen tóleýge májbúr. Oqý jyly bastalǵaly balalar birneshe shaqyrym jerdegi mektepke bal­shyqtap jaıaý baryp, keıde ıtterge talanyp jatyr. Aıta bersek, mundaı mysaldar óte kóp», – degen depýtat saıajaılarǵa «aýyl» már­tebesin berý – turǵyndardyń basty talaby ekenin ashyp aıtqan edi.

Túıtkildi másele túbirimen sheshilmese de jartysyna jýyǵy, ıaǵnı búgingi kúnge 330 saıajaıǵa «aýyl» mártebesi berilgeni týraly jaqynda Almaty oblysyna kelgen issapary barysynda depýtat Maqsat Tolyqbaı habardar etti.

Solardyń qatarynda bıyl Qonaevtaǵy birqatar saıajaıǵa «shaǵyn aýdan» mártebesi berile­tindigin súıinshileý artyq etpes. Bul týraly Qonaev qalasy­nyń ákimi Ashat Berdihanov má­limdedi. Onyń sózinshe, byltyr Stroıtelnaıa saıajaıyna shaǵyn aýdan mártebesi berilip, ataýy Qury­lysshy bolyp ózgertildi. Jańa ataýǵa ıe shaǵyn aýdanda 8 274 adam turaqty mekendeıdi. Ondaǵy oqýshylar mektepke qalaaralyq №4, 7, 2 avtobýs­tarmen qatynasyp, oqıdy.

Munda birqatar jumys at­qarylǵan. Atap aıtqanda, sha­ǵyn aýdannyń elektr jelileri toly­ǵymen «Alataý Jaryq Kom­pa­nııasy» AQ ıeligine ótti. Nátı­jesinde, halyq elektr energııasyna aqyny tabıǵı monopolııalardy retteý departamentimen bekitilgen tarıf­pen tólep otyr. Sondaı-aq yqsham aýdanǵa aýyzsý, káriz q­ubyrlaryn tartý úshin jobalyq-smetalyq qujattary ázirlenip jatyr. «Ha­lyq qatysatyn bıýdjet» jobasy aıasynda kósheni jaryqtandyrý baǵanalary aýystyrylyp, fýtbol alańy salynyp jatyr. Bul yńǵaıly qala­lyq orta quryp, balalar men jasóspirimderdiń ýaqy­tyn tıimdi paıdalanýǵa septigin tıgizedi.

Shahar basshysynyń málime­tinshe, bıyl birneshe saıajaıǵa shaǵyn aýdan mártebesin berý jos­parlanǵan. Búginde Qurylysshy shaǵyn aýdanynyń tájirıbesine súıene otyryp, 7-saıajaıdaǵy transformatorlar men elektr jelilerin TÚKSh bólimine ótkizý úderisi júrip jatyr. Bul is-sha­ra­lardan soń jeliler «Alataý Jaryq Kompanııasy» AQ-ǵa senim­gerlik basqarýǵa beriledi. Atalǵan kompanııa kútip ustaýǵa jaýapty bolady. Nátıjesinde, jaryqtyń jıi óshýi túbegeıli sheshiledi.

Budan bólek, Qonaev qalasy­nyń keshendi damý josparyna sáıkes, barlyq saıajaılardy gaz­dandyrýdyń jobalyq-sme­talyq qujaty daıyndalyp jat­qany da kóńilge qýanysh uıalatady.

A.Berdihanov Bas josparǵa qatysty atqarylyp jatqan ju­mystarmen de bólisti. «Qala aýma­ǵynda 7 saıajaı qaldy. Qazirde sáýlet jáne qala qurylysy bó­limi kooperatıvterdiń basshyla­rymen birlese otyryp, jerdi, ǵı­marattardy, ınje­ner­lik je­liler men kólik ınfra­qury­ly­myn túgendeý jumys­taryn júr­gizip jatyr. Bas josparǵa saıa­­jaı­­larǵa qatysty túzetýler engizildi. Endi ony Úkimet bekitýge tıis. Qujatqa sáıkes, qazirgi saıa­jaılar aýmaǵynda ákimshilik, áleý­mettik nysandar, kásipkerlik ǵıma­­rattaryn, kópqabatty tur­ǵyn úıler salý kózdelgen», dedi qala ákimi.

Saıajaılardaǵy ınfraqury­lymdy damytý baǵytyndaǵy ju­mystar birneshe jyl boıy júr­gizilip, túıtkilderdiń túıini kezeń-kezeńimen tarqatylady dep josparlanyp otyr.

«Biz bul qýanyshty sátti asyǵa kúttik. Saıajaıdyń aýyzsý, elektr jelileriniń ábden tozyǵy jetken. Lúp etken jel tursa, jaryq «jalp» etip sónip qala beretin. Endi mine, qıyndyq ataýlynyń bári artta qalyp keledi. Erteńgi kúnnen úmitimiz zor. Bıýdjetten qarjy qarastyrylyp, mektep, FAP salynyp, kórkeıetin bolady. Búginniń ózinde qala ákiminiń qoldaýymen balalardyń oıyn alańy, fýtbol alańy salynyp, paıdalanýǵa berildi. Jaryq quny tómendetildi. Aýyzsý da qala­lyq sý júıesine ótip jatyr. Saıa­jaıda 1 500 tútin bar. Árqaı­sysynan keminde 2-3 bala Qonaev qalasyndaǵy mektepterge barady. Qalalyq marshrýtpen qamtamasyz etilgen. Degenmen balalardyń erteli-kesh qoǵamdyq kólikke tolyp, qysylyp qalatyny bar. Sondyqtan marshrýttardyń sany artsa artyq etpes edi», deıdi shaǵyn aýdan turǵyny, qoǵam belsendisi Qarlyǵash Ahmetova.

Bas jospar boıynsha keleshekte munda mektep salynady. Meshit qurylysy aıaqtalýǵa ja­qyn. Sondaı-aq 40 shaqty kóshe tegistelip, keńeıtilip jatyr. Kezi kelgende asfalttalady. Kóshe­lerge elektr baǵandary tarty­lyp, jaryq jelileri iske qosylýǵa daıar. Jan jadyratqan ıgi isterdiń barlyǵy da yqsham aýdan atalǵaly beri alǵa basyp kele jatqanyna turǵyndar kózaıym bolyp otyr.

Almaty oblysy