Qoǵamda da halyq pikiri ekige jarylǵan. Bireýler kásiporynnyń memleket qaramaǵyna ótýin qalasa, endi basqalary bul bastamaǵa qarsy. О́ıtkeni olardyń pikirinshe, seriktestik kommýnaldyq menshikke ótken jaǵdaıda dál qazirgideı tıimdi menedjerlik basqarý bolmaı qalady. Sebebi «Sý resýrstary-Marketıng» shahardaǵy óz qyzmetin minsiz atqaryp kele jatqan birden-bir seriktestik bolyp sanalady. Osy kúnge deıin ákimdiktiń bul áreketin qoldaıtyndar men jaqtamaıtyn qoǵam belsendileri arasynda petısııa jarııalanyp, soǵan baılanysty eki ret halyqpen talqylaý jıyndary uıymdastyryldy. «Sý resýrstary-Marketıng» JShS-nyń memleket menshigine qaıtarylýyna qarsy petısııa 2024 jyldyń 10 jeltoqsanynda Shymkent qalasy ákimdigine usynyldy. Bul aryz sondaı-aq «E-Petition.kz»-tiń resmı portalynda jarııalandy.
Máselen, jýyrda qoǵam belendisi Begimqul Tólentaevtyń petısııasyn jarııa talqylaý jıyny ótti. Oǵan kásiporyn basshylyǵy men qyzmetkerleri, qala ákimdiginiń ókilderi, tıisti sala mamandary, shahardyń qarapaıym turǵyndary qatysty.
Jergilikti atqarýshy bılik buǵan deıin kásiporynǵa aýyzsý tarıfin negizsiz qymbattatqan degen kiná artqan edi. Sóıtip, ýáj retinde Almaty men Astana qalalaryndaǵy sýdyń tómen baǵasyn mysalǵa kórsetken. Keshegi jıynda «Sý resýrstary-Marketıng» JShS basshysy Anarbek Orman osy aıypqa baılanysty óz málimdemesin jasady. Ol tarıf baǵasynyń arzan, qymbat bolýy tikeleı ákimdiktiń quziretindegi tirlik ekenin jetkizdi.
«Tarıf qymbat deıdi. Al tarıfti retteıtin, bekitetin kim? Árıne, ákimdik pen depýtattar. Eger aýyzsý baǵasy qymbat bolsa, nege olar birinshi ózderi baryp teksermeıdi? Biz bekitilgen tarıf boıynsha atqarǵan jumysymyzǵa tek esep beremiz. Jergilikti atqarýshy bılik tarıfke qatysty Almaty men Astana qalasynyń baǵalaryn aıtyp qoımaıdy. Aınalaıyndar-aý, Almaty qalasy bıýdjetten jylyna aýyzsýǵa dep 13 mlrd teńge sýbsıdııa bóledi. Astana qalasy ákimdiginiń bul maqsattaǵy sýbsıdııa kólemi 9 mlrd teńgeni quraıdy. Al bizde onyń biri de joq. Eger jergilikti ákimdik qala halqyna jany ashysa, nege bıýdjetten aqsha bóldirip, eski qubyrlardy aýystyrmaıdy?» dedi kásiporyn basshysy A.Orman.
Jıyn barysynda qoǵam belsendileri qalyptasqan jaǵdaıǵa baılanysty óz oılaryn ortaǵa saldy. Olardyń kópshiligi kásiporyn jekeniń qolynda qala berýi qajet degen pikirlerin bildirdi. Sebebi erteńgi kúni kommýnaldyq menshikke ótken jaǵdaıda kásiporynda qyzmet sapasy kúrt nasharlap ketýi múmkin. Onyń ústine naryq zamanynda bir qoldan ótken seriktestik ekinshi ınvestordyń menshigine aınalyp ketpesine kim kepil? Keleshekte sýmen jabdyqtaýshy mekemeniń ıesi sheteldik ınvestor bolyp qalýy da kádik. Halyq osyny aıtyp, kúdik-kúmándary bar ekenin jasyrmady. Sonymen qatar qanshama strategııalyq nysan bar. Biraq ákimdik nege eldi sapaly sýmen úzdiksiz qamtamasyz etip otyrǵan kásiporynǵa shúılikti eken dedi jınalǵan kópshilik suraýly júzben.
Deı turǵanmen, qala ákimi Ǵabıt Syzdyqbekov budan buryn da alǵan betinen qaıtpaıtynyn málimdegen. Ol bul sózdi megapolıstiń 2024 jylǵy áleýmettik-ekonomıkalyq damýyna qatysty ortalyq kommýnıkasııalar qyzmetinde bergen brıfınginde osy máselege qatysty qoıylǵan suraqqa jaýap retinde de aıtqan edi. Iаǵnı shahar basshysynyń ustanǵan qaǵıdaty – aýyzsý kózderi strategııalyq nysanǵa jatady, sondyqtan ol memleketke qaıtarylýǵa tıis.
«Petısııadan halyqtyń kópshiligi ákimdiktiń bastamasyn qoldaıtynyn baıqadym. О́ıtkeni strategııalyq nysannyń jalǵyz adamnyń qolynda bolýy memleketke belgili bir deńgeıde qaýip tóndiredi. Jergilikti ákimdik kásiporyndy basybaıly tartyp ala almaıdy. Sebebi bul onyń quziretine kirmeıdi. Bul máselede sońǵy núkteni qoıatyn – sot sheshimi. Al qala ákimdiginiń ustanymy eshqandaı ózgermeıdi. Barlyq strategııalyq obekti memleket menshiginde bolýy kerek», dedi qala ákimi Ǵ.Syzdyqbekov.
Zańger Dinmuhammed Ońǵardyń aıtýynsha, 2003 jyly elimizde Sý kodeksi qabyldanady. Osy zańnyń 25 babynda strategııalyq mańyzdy nysandar jekeshelenýge jatpaıtyny aıtylady. Alaıda megapolıstegi sý qabyldaǵyshtar 1995 jylǵy jekeshelendirý týraly zańnyń aıasynda qabyldanǵan premer-mınıstrdiń qaýlysyna sáıkes jekemenshik nysanǵa ótken. Sóıtip, 1999 jyly ol «Sý resýrstary-Marketıng» JShS quramyna qosylady. Sý kózderin jekeshelendirý strategııalyq nysanǵa qatysty arnaıy zańnan buryn júzege asqan. Demek zańnyń keri kúshi joq degen qaǵıdaǵa súıensek, 2003 jylǵa deıingi jekeshelengen barlyq sý qabyldaǵyshtar sol kezdegi menshik ıesiniń múlki bolyp qalýǵa tıis. Zańger ákimdik pen kásiporyn arasyndaǵy talas-tartysqa baılanysty osyndaı pikir bildirdi.
ShYMKENT
