Foto: Aqádil Rysmahan
Resmı derekke júginsek, joba quny 2,8 mlrd teńgeni quraıdy. Sý jańa zaýytta jylyna 20 myń gektarǵa deıingi alqapty tamshylatyp sýarýǵa qajetti jabdyqtar óndirilmek. Qazirgi kezde jańa zaýytta 30 adam turaqty jumyspen qamtylǵan. О́ndiris oshaǵy tolyq qýatynda jumys istegen kezde jumysshylar sany eki esege deıin artpaq.
«Jańa óndiris oshaǵy kelesi vegetasııalyq kezeńge tolyǵymen daıyn dep aıtýǵa negiz bar. Fermerlerge 6000 gektar sýarý jabdyqtary beriledi. Budan bólek uńǵymalardy burǵylaýǵa arnalǵan qural-jabdyqtar der kezinde jetkizildi. Memleket basshysynyń jan-jaqty qoldaýynyń arqasynda óńirge ınvestorlar tartý jumysy júıeli túrde júrgizilip jatyr», deıdi E. Qarashókeev.
Jańa zaýyt «Qaz Kaspıı Gıdro Selhoz Tehnologııa» JShS-niń jobasy ekenin aıta ketken jón. Birshama ýaqyt buryn qolǵa alynǵan qurylys jumysy nátıjeli aıaqtalyp, óndiris oshaǵy jańa jyldan keıin iske kiristi.
Jalpy alǵanda óńirde 181,8 myń gektar sýarmaly alqap bar. Onyń 127,3 myń gektary jerústi ádisimen sýarylsa, 28,5 myń gektar alqapqa jańbyrlatyp sýarý ádisi qoldanylady, 11,5 myń gektar alqapqa tamshylatyp sýarý júıesi paıdalanylady. О́tken jyly 15,2 myń gektar jerge sý únemdeý tehnologııasy ornalastyrylǵan. Osy jyly qosymsha 10 gektar alqapqa jańa tehnologııa engizilmek. Nátıjesinde kórsetkish 64,5 myń gektar alqapqa deıin ulǵaımaq. 
Jambyl oblysy
