foto: gov.kz
Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev aýyldyq eldi mekenderdi ınternetpen qamtýdyń jańa ádisiniń artyqshylyqtaryn baǵalap, Sarybaı bı aýylynyń turǵyndarymen áńgimelesti.
Buǵan deıin Sarybaı bı aýylynyń turǵyndary eskirgen ADSL tehnologııasy arqyly ınternetke qosylyp kelgen edi. Bul tehnologııa jyldamdyq pen qosylý sapasynyń shekteýligimen erekshelenedi. Jeli ınfraqurylymyn qurýdyń jańa tásili derekterdi sekýndyna 200-300 Mbıt jyldamdyqpen berýge, úlken aýmaqtardy qamtýǵa jáne qoldanýshylar sanynyń artýyna qaramastan turaqty qosylymdy qamtamasyz etedi.
105 úı jańa tehnologııaǵa qosylyp, onyń artyqshylyqtary men múmkindikterin joǵary baǵalady. Qazirgi ýaqytta turǵyndar belsendi túrde qosylýǵa ótinim berip jatyr.
«Bul tehnologııanyń eń basty artyqshylyǵy – qymbat optıkalyq jelini júrgizýdiń qajettiliginsiz turaqty jáne joǵary jyldamdyqty ınternetke qol jetkizý. Biz búgin Sarybaı bı aýylynda FWA tehnologııasynyń 5G negizinde qanshalyqty tıimdi ári bolashaǵy bar ekenin kórdik. Endi osy aýyldyń jáne basqa da uqsas eldi mekenderdiń turǵyndary qazirgi zamanǵy servıster men onlaın qyzmetterdi paıdalaný múmkindigine ıe bolady dep senemin», dep málimdedi QR sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev.
«Qazaqtelekom» kompanııasy óziniń jańa «Aýyltelekom» enshiles kásiporny arqyly tabysty synaqtardyń qorytyndysy boıynsha osy jobany respýblıkadaǵy basqa aýyldarda da engizýdi josparlap otyr.
Jańa tehnologııa 7 aýylǵa engizilip, 200-den astam úı sharýashylyǵyn qamtydy. 2025 jyly 100-den astam aýyldaǵy 10 000-nan astam turǵyn zamanaýı ınternettiń ıgiligin kóredi.
«Biz enshiles uıymdardyń biriniń jumysyn aýyldyq jerlerde joǵary jyldamdyqty ınternetpen qamtamasyz etýge baǵyttadyq. «Aýyltelekom» qazirgi ýaqytta eń ońtaıly tehnologııalardy anyqtap, aýyl turǵyndaryna sapaly ınternetke qol jetkizý múmkindigin usyný úshin jumys isteýde. Sarybaı bı aýylyndaǵy testileý kórsetkendeı, zamanaýı symsyz tehnologııalar – FWA aýyldyq jerlerde ınternetke joǵary jyldamdyqty qosylý máselesin tıimdi sheshe alady», dedi «Qazaqtelekom» AQ Basqarma tóraǵasy Baǵdat Mýsın.
Sıfrlyq damý mınıstrimen kezdesken birqatar turǵyndar jańa baılanys tehnologııasyna qatysty pikirlerin bildirdi. Dástúrli optıkalyq jelilerdi alys aımaqtarda júzege asyrý qıyn ári qymbat bolǵan jaǵdaıda, FWA tehnologııasy mınımaldy ınfraqurylym shyǵyndarymen ınternetke qol jetkizýge múmkindik beredi.
