Foto: Senat
Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip gazettiń mereıtoıyna arnalǵan «Úlken joldyń kezeńderi» ǵylymı-tájirıbelik konferensııasyna qatysty. Ol Parlament Senatynyń Tóraǵasy Máýlen Áshimbaevtyń konferensııaǵa qatysýshylarǵa, ujymǵa jáne gazet oqyrmandaryna joldaǵan quttyqtaýyn oqyp berdi. Senat Tóraǵasynyń quttyqtaýynda Qazaqstan jýrnalıstıkasyndaǵy dál osy kúnniń mańyzyna toqtala kelip, elimizdiń aqparattyq keńistigin damytý, qoǵamdyq pikirdi qalyptastyrý jáne ulttyq múddeni qorǵaýǵa qosqan gazettiń úlesin atap ótti.
«Kazahstanskaıa pravda» gazeti ǵasyrdan astam ýaqyt boıy el ómirindegi asa mańyzdy oqıǵalardyń jarshysy bolyp keledi. Sizderdiń ujymdaryńyz árdaıym joǵary sapamen, jaýapkershilikpen jáne jýrnalıstiń bıik mádenıetimen erekshelene bildi. «Kazahstanskaıa pravda» – táýelsiz Qazaqstannyń qalyptasý kezeńi men tarıhı jańǵyrtýlar jáne elimizdiń ósip-órkendeýi jolynda qabyldanǵan mańyzdy sheshimder shejire bolyp qattalǵan irgeli basylym. Gazet ujymy qazirgi sıfrlyq tehnologııa dáýirinde de kásibı biliktiliktiń bıiginen kórinip otyr. Sondaı-aq qoǵamnyń ózekti máselelerine jiti nazar aýdaryp, senimdi aqparat kózi retinde ultqa qyzmet etip keledi», delingen Máýlen Áshimbaevtyń quttyqtaýynda.
Nurtóre Júsip óz kezeginde bul kún qorytyndy jasaýmen qatar basylym ujymyn jańa kásibı bıikterge qulshyndyrý múmkindigine aınalyp otyrǵanyn atap ótti. Senator sondaı-aq bizdiń elimizde jáne odan tys jerlerde bolyp jatqan oqıǵalardy shynaıy jáne jan-jaqty saralaı otyryp jarııalaıtyn BAQ ókilderi jumysynyń mańyzy týraly oılaryn ortaǵa saldy.
