«Marhabat Baıǵuttyń týǵanyna 80 jyl» jobasynyń jetekshisi, «Medıakratııa» qoǵamdyq birlestiginiń tóraǵasy Ǵalymjan Elshibaıdyń aıtýynsha, bul qalamgerdiń 80 jyldyǵy aıasyndaǵy dúnıelerdiń bastamasy ǵana. Qalamynan qanshama kórkem shyǵarma týǵan jazýshy atyn urpaqtar jadynda saqtaý úshin bastamanyń mańyzy erekshe. Jýrnal ult ádebıeti men mádenıetiniń damýyna septigin tıgizip, taqyrypta, jańashyl shyǵarmalar jarııalaýǵa den qoıady. Sonymen birge ádebıet, rýhanııat taqyrybyndaǵy máselelerdi qaýzap, tanylmaı júrgen jas talanttarǵa qoldaý bildiredi.
Markhabat.kz aqparattyq portalynda jazýshynyń jeke fotoarhıvi, suhbattary, áńgime, povesteri, qalamger týraly jazylǵan dúnıeler jarııalanady. Astanadaǵy L.N.Gýmılev atyndaǵy Eýrazııa ulttyq ýnıversıtetinde belgili ǵalym, akademık, alashtanýshy Dıhan Qamzabekuly jetekshilik jasaıtyn dıssertasııalyq komıssııada Marhabat Baıǵuttyń shyǵarmashylyǵyn zertteýge arnalǵan eki kandıdattyq dıssertasııa qorǵaldy. Bul da kóńildi jadyratarlyq jańalyq. Iаǵnı marhabattaný jolǵa qoıyldy deýge negiz bar. «Aldaǵy ýaqytta qazaq ádebıetindegi irgeli salanyń birine aınalatynyna senimimiz mol» dedi joba jetekshisi Ǵ.Elshibaı.
«Marhabat» jýrnalynyń bas redaktory bolyp belgili qalamger, jýrnalıst Oralhan Dáýit taǵaıyndaldy. Basylym redaktorynyń aıtýynsha, «Marhabat» buǵan deıin jaryq kórip kelgen «Turan-Túrkistan» jýrnalynyń jalǵasy. Sebebi «Turan-Túrkistannyń» dúnıege kelip, oqyrmanǵa jol tartýyna jazýshy Marhabat Baıǵut tikeleı atsalysqan. Jýrnaldyń ár nómiri 2 myń danamen taraıdy.
Keshte Shymkent qalalyq máslıhatynyń tóraǵasy Bahadyr Narymbetov sóz alyp, qalamgerdiń qazaq ádebıetine ǵana emes, túrki ádebıetine de ózindik qoltańbasyn qaldyrǵanyn atap ótti. Kezinde Marhabat Baıǵuttyń qolastynda qarapaıym maman bolyp jumysyn bastaǵan ol Mahańnyń sharapatyn kóp kórgenin jetkizdi. Máslıhat tóraǵasy jazýshynyń órkenıetti jastar kóbeıip keledi, biraq kórkem nıetti jastar azaıyp barady degen sózin mysalǵa keltirip, óskeleń urpaqtyń nıeti kórkem bolý úshin qalamgerdiń áńgimelerin oqýǵa shaqyrdy.
Túrkistan oblysy ákiminiń orynbasary Ertaı Altaev ákimdik tarapynan jazýshynyń 80 jyldyǵyn atap ótýge baılanysty is-sharalar jospary qabyldanǵanyn aıtty. Sondaı-aq túrki dúnıesine tanymal shyǵarmalaryn «Marhabat» jýrnaly arqyly nasıhattaýdyń, dáripteýdiń múmkindigi týǵanyn málimdedi. Ákim orynbasary sóz sońynda oblys ákimdigi atynan jazýshynyń jary Qyzdarkúl apamyzǵa qurmet kórsetip, ıyǵyna qamzol, basyna oramal japty.
Jambyl oblysy Sh.Murtaza atyndaǵy rýhanııat jáne tarıhtaný ortalyǵynyń dırektory Jasulan Ábdihalyq jańa basylymnyń jaryq kórýine oraı óńir basshysy Erbol Qarashókeevtiń quttyqtaý hatyn jetkizdi. Ortalyq jetekshisi óz sózinde oblysta qolǵa alynǵan «Áýlıeata – kitap oqıtyn óńir» jobasy aıasynda qalamger shyǵarmalary da báıgege qosylatynyn baıandady. Shyǵarmashylyqta shekara bolmaıdy degen ol ulttyq deńgeıge kóterilgen Sherhan Murtaza men Marhabat Baıǵuttaı qos jazýshynyń shyǵarmalaryn birdeı nasıhattaý kerek degen oı bildirdi.
Shymkent qalasy ákiminiń orynbasary Sársen Quranbek ońtústikten shyqqan talantty qalamger Marhabat Baıǵut izgiliktiń, ádildiktiń úlgisin kórsetken, týyn tikken daryndy tulǵa bolǵanyn atap ótti.
«Qarymdy qalamgerdiń 80 jyldyǵyna oraı qalalyq ákimdik aýqymdy is-sharalar josparyn ázirlep otyr. Sonyń ishinde jazýshynyń ómiri men shyǵarmashylyǵyna arnalǵan ǵylymı konferensııa da bar. Prezıdent Qasym-Jomart Toqaevtyń bastamasymen iske asyp jatqan «Ádiletti Qazaqstan», «Adal azamat» tujyrymdamalaryn túsindirý úshin kórkemsóz sheberi Marhabat Baıǵuttaı jazýshynyń shyǵarmalaryn oqytý kerek. Mahań kózi tirisinde elim dep eńirep, jurtym dep tolǵanyp ótken birtýar azamat edi» dedi qala ákiminiń orynbasary S.Quranbek.
Jıynda sondaı-aq qalamgerdiń jary Qyzdarkúl apamyz sóz sóılep, Mahańnyń úıde de, túzde de ózgermeıtin birqalypty qarapaıym bııazylyǵy týraly oı tolǵady. Jazýshynyń zamandasy, aqyn Narmahan Begaly da daraboz qalamgerdiń ádebıetke sińirgen eńbegi týraly aıtty.
Marhabat Baıǵut jazýshylyǵymen qatar kóptegen tyń bastamalardyń, qoǵamda keńinen qoldaý tapqan tamasha ıdeıalardyń avtory, bastamashysy boldy. Máselen, «Yrys aldy – yntymaq» jobasy ońtústik óńirdegi eń aıtýly rýhanı jobalardyń biri retinde tanyldy. «Taýpisteli taǵylymy», «Bozaryqtan Boztorǵaıǵa deıin» sekildi is-sharalary da qoǵamdyq oı-pikirdiń dúr silkinýine úlken qozǵaý saldy.
ShYMKENT
