Al Astanada qalyń qar jaýyp, kommýnaldyq qyzmet táýlik boıy úzdiksiz jumys istep jatyr. Qala kóshelerin qardan tazartýǵa 3 myńǵa jýyq maman men 1 500-ge jýyq tehnıka jumyldyryldy.
Kelesi aptadan bastap elimizdiń birneshe aımaǵynda kún raıy buzylady. "Qazgıdromet" túnde aýa temperatýrasy tómendep, keı óńirde qatty aıaz bolady dep boljap otyr. Al búgin Shyǵys Qazaqstan men Abaı oblystarynda joldar jabylyp, barlyq kólik túrlerine qozǵalys shektelgen. "QazAvtoJol" mamandary júrgizýshilerge alys saparǵa shyqpas buryn saqtyq sharalaryna mán berýdi eskertedi.
- Jol paıdalanýshylarǵa 1403 baılanys ortalyǵy táýlik boıy qyzmet kórsetedi. Baılanys ortalyǵyna habarlasyp, joldyń jaǵdaıyn bilýge bolady. Budan bólek, eger siz respýblıkalyq joldardyń birinde kóligińiz buzylyp qalatyn bolsa, kómek suraýǵa bolady. Biz mamandardy jiberip, kóligińizdi súırep, qoldan kelgenshe kómek beremiz, - dedi "QazAvtoJol" kompanııasynyń resmı ókili Sáken Dildahmet.
Al tótenshelikter jyl bastalǵaly jolda qalǵan 250-den astam adamdy qutqarǵan. Onyń 29-y bala eken. Qutqarýshylar jylytý beketterine 350-ge tarta adamdy aparyp, qar qursaýynan 42 tehnıka shyǵarǵan. Qazir el boıynsha 1 myń 500-den astam jylytý beketi jumys istep tur. Osy kúni respýblıkalyq joldardy on úsh myńnan asa tehnıka men otyz jeti myń maman tazartyp júr.
- 18 oblysta daýyldy eskertý kelip túsip jatyr. Sondyqtan jolǵa shyǵar aldynda júrgizýshilerge aıta ketetinimiz – mindetti túrde sol eskertýlerge mán berý kerek. Odan keıin bizde komandylaq ortalyqta, Tótenshe jaǵdaılar mınıstrliginiń komandalyq ortalyǵynda táýlik boıy respýblıkalyq jedel shtab óz jumysyn atqarady, - dedi QR TJM Tótenshe jaǵdaılardy joıý departamentiniń bas mamany Dıdar Qajykenov.
Elordada tańnan beri toqtaýsyz jaýǵan qar qas qaraıa basyldy. Kommýnaldyq qyzmet mamandary qalany aq ulpadan tazartýǵa kirisip ketken. Tipti shahardaǵy qar kúreý jumystarynyń saldarynan kóshede keptelis bolyp jatyr. Qala bıligi bir túnde 24 myń tekshe metrden astam qar shyǵarylǵanyn aıtty.
