Qamshybektiń el sportyna sińirgen eńbegi eren. Boıy qarsylastarynan áldeqaıda qysqa bolǵanymen, asa aýyr salmaqta aıqasqan Syr boıynyń sańlaǵy kóptegen baıraqty básekelerde el namysyn abyroıly qorǵady. Tarqatyp aıtsaq, Azııa chempıonatynda tórt ret kúmis medaldi moınynda jarqyratty. Bul tabystarǵa Tashkentte (2017), Bangkokta (2019), Dýbaıda (2021), Ammanda (2022) qol jetkizdi. 2022 jyly Hanchjoýdaǵy Azııa oıyndarynda da dál sol mejeden kórindi. 2017 jyly Gambýrgte, 2019 jyly Ekaterınbýrgte uıymdastyrylǵan álem chempıonattarynda da kúmispen kúpteldi.
Qazaq alybynyń sporttyq mansabyndaǵy eń iri tabysy – 2021 jyly Tokıoda alaýy tutanǵan Olımpııa oıyndarynyń qola medali. Kúnshyǵys elinde Qońqabaev úsh jekpe-jek ótkizdi. Alǵashqy aınalymdarda Afrıka oıyndarynyń jeńimpazy, Afrıka chempıony, mysyrlyq Iýsrı Hafez ben reseılik Ivan Verıasovtan basym tústi. Jartylaı fınalda onyń jolyn amerıkalyq Rıchard Torres bógedi. Báseke barysynda aýyr soqqy alyp qalǵan qandasymyz jekpe-jekti jalǵastyra almady.
Syr boıy sańlaǵynyń dúbirli dodalarda bas júlde alýyna kóbine-kóp kedergi keltirgen Olımpıada men álemniń eki dúrkin chempıony Bahodır Jalolov ekenin jankúıerler jaqsy biledi. Desek te onyń О́zbekstannyń alybyn utqan kezderi de joq emes. Álemniń eń myqty qos boksshysy ózara 10 márte judyryqtasqan eken. Sonyń úsheýinde Qamshybek basym tússe, jeteýinde Bahodır jeńiske jetti. Sonymen qatar qandasymyz kásipqoı rıngte de kúsh synasty. Barlyǵy bes kezdesý ótkizgen ol barlyǵynda jeńis toıyn toılady. Tórt qarsylasyn nokaýtqa jiberdi. Sóıtip, Qońqabaev birinshi aýyr salmaqtaǵy WBO Asia men WBA Gold nusqalary boıynsha chempıondyq belbeýlerdi ıelendi.
Bıylǵy Parıj Olımpıadasynda jankúıerler Qamshybekten júlde kútken edi. Fınalda onyń joly qaıta Jalolovpen qıysatyn shyǵar dep topshyladyq. Alaıda Fransııanyń bas shaharynda qazaq boksshysynyń asyǵy alshysynan túspedi. Ol tusaýkeser kezdesýinde oıda-joqta ıspanııalyq Aııýb Gadfaǵa ese jiberdi. Sodan keıin Qamshybek biraz ýaqyt kópshilik nazarynan tys qaldy. Mine, endi 33 jastaǵy ataqty bylǵary qolǵap sheberiniń úlken sportpen qosh aıtysqany málim boldy.
