Sýretti túsirgen – Valerıı Býgaev
«ERG Service» JShS quramyna enetin Pavlodar mashına jasaý zaýytynda taý-ken-metallýrgııa, munaı-gaz salalaryna arnalǵan metall qurylymdar men standartty emes tehnologııalyq jabdyqtar, sondaı-aq júk kótergishi 10 tonnadan asatyn krandar shyǵarylady.
«Mashına jasaý zaýytynyń ónimderi arasynda túrli maqsatta qoldanylatyn dánekerlengen metall qurastyrma, greıfer, jalpy jáne arnaıy maqsatta qoldanylatyn, tirekti kran túrleri asa suranysqa ıe. Jylyna 12 myń tonna metall quımasy men 34 myń metall ılemderin shyǵaramyz. Buǵan qosa júk kóterimdiligi 10 tonnadan asatyn 8 kran, júk kóterimdiligi 10 tonnaǵa deıingi 40 kran qurastyramyz. О́nimderimiz Qazaqstannyń óndiris oryndarymen qatar Reseıdiń iri kásiporyndaryna da jóneltiledi. Munda 2,5 myńǵa jýyq jumysshy eńbek etedi. Zaýyttaǵy ortasha eńbekaqy – 360 myń teńge», dep áńgimeledi «ERG Service» seriktestiginiń bas dırektory Sergeı Perepechın.
Negizi mashına jasaý zaýyty 1995 jyly qurylǵan. 2015 jyly «ERG Service» quramyna endi. Atalǵan kompanııaǵa búginde pavlodarlyq zaýyttan bólek, Qostanaıdaǵy jóndeý-mehanıkalyq jáne ılemdeý zaýyty, Rýdnyı qalasy men Pavlodar oblysyndaǵy jóndeý kásiporyndary kiredi.
Pavlodarlyq zaýyt óndiristik jabdyqtar parkin jańartýdy júıeli túrde júrgizip keledi. 2014 jyly «О́nimdilik 2020» memlekettik baǵdarlamasy aıasynda mehanıkalyq seh jańartýdan ótken. Sıfrlyq baǵdarlamalyq basqarýdaǵy stanoktar satyp alynyp, seh jumysy avtomattandyryldy. Investısııalyq baǵdarlamany paıdalanyp, metaldy bytyra aǵynmen tazartatyn mashına alyndy. Nátıjesinde, joǵary sapaǵa ıe materıaldy daıyndaý úderisi aıtarlyqtaı jetile tústi. Al 2017 jyly óndiriske engizilgen metaldy plazmaly jáne gaz-ottegimen kesetin jańa qondyrǵy kórsetkishterdi eseleı túsip otyr.
Atalǵan qondyrǵy túrli pishindegi bólshekterdi az ýaqyt ishinde ázirleýge, metall qurastyrma men júk kóteretin tehnologııalyq mashınalar óndirisin arttyrýǵa jol ashty. Sehtarda qolmen júrgizilip kelgen jumystar azaıyp, metaldy avtomatty plazmamen kesý jolǵa qoıyldy. Kompanııa byltyr kúzde «Kazakhmys Smelting» jáne «Qazsınkmash» kompanııalarymen ımport almastyrý jónindegi memorandýmǵa otyrdy. Onyń aıasynda kásiporyndar buǵan deıin syrttan satyp alyp kelgen keıbir shıkizat pen daıyn ónim túrlerin almasady.
PAVLODAR
