Aral aýdanyndaǵy №260 mekteptiń bas esepshisi D.Janalıev óziniń qyzmetin paıdalanyp, 2023 jyldyń qańtar aıy men 2024 jyldyń tamyz aıy aralyǵynda shtattyq kestege sáıkes jalaqydan bólek óziniń esepshotyna negizsiz artyq qarjy aýdaryp, bas paıdasyna jaratyp kelipti.
Qyzylorda oblysy boıynsha ekonomıkalyq tergep-tekserý departamenti mamandary sottalýshynyń bul áreketi ár aı saıyn qaıtalanyp otyrǵanyn anyqtaǵan. Eńbek demalysy kezinde de óziniń esepshotyna aqsha aýdaryp otyrǵan esepshini tergep-tekserý barysynda onyń qylmystyq áreketi saldarynan memleketke jalpy somasy 20 417 530 teńge shyǵyn kelgeni belgili boldy.
Sot sheshimimen bas esepshi Qazaqstan Respýblıkasynyń Qylmystyq kodeksiniń 189-baby 4-bóligi 2-tarmaǵymen kináli dep tanylyp, qarjylyq materıaldy jaýapty qyzmetpen aınalysý quqyǵynan 10 jylǵa aıyrylyp, 7 jyl merzimge bas bostandyǵynan aıyryldy. Ol jazasyn qylmystyq-atqarý júıesiniń ortasha qaýipsiz mekemesinde óteıtin bolady. Sondaı-aq, memleketke keltirilgen 20 417 530 teńge qarajatty úkim zańdy kúshine engen soń 2 aı merzimde óz erkimen memleket paıdasyna óndirý júkteldi.
