Sýretti túsirgen – Aqádil RYSMAHAN
Birshama ýaqyt buryn tamshylatyp sýarý júıesin shyǵaratyn óndiris oshaǵyn salýǵa bekingen «Qaz Kaspıı Gıdro Selhoz Tehnologııa» JShS jaqynda sol zaýyttyń resmı ashylý saltanatyn uıymdastyrdy. Resmı derekke zer salsaq, iri jobanyń jalpy quny 2,8 mlrd teńgeni quraıdy. Seriktestik ókilderiniń aıtýynsha, jańa zaýytta jylyna 20 myń gektarǵa deıingi alqapty tamshylatyp sýarýǵa qajetti jabdyqtar óndirý kózdelgen. Qazir jańa kásiporyn 30 azamatty turaqty jumyspen qamtyp otyr. О́ndiris oshaǵy tolyq qýatynda jumys istegen kezde jumysshylar sany eki ese kóbeımek.
«Jańadan boı kótergen zaýyt kelesi vegetasııalyq kezeńge tolyǵymen daıyn. Fermerlerge 6 myń gektarǵa deıingi alqapqa sýarý jabdyqtary beriledi. Budan bólek, uńǵymalardy burǵylaýǵa arnalǵan qural-jabdyqtar aıtylǵan merzimde jetkizilgenin atap ótken jón. Memleket basshysy Qasym-Jomart Toqaevtyń jan-jaqty qoldaýynyń arqasynda óńirge áleýetti ınvestorlar tartý jumysy júıeli túrde júrgizilip jatyr. Al tamshylatyp sýarý júıesin shyǵaratyn jańa zaýyt jambyldyq sharýalardyń da birqatar ózekti máselesin sheshýge den qoıatyny talas týdyrmaıdy», deıdi óńir basshysy Erbol Qarashókeev.
Keıingi jyldarda qalyptasqan úrdiske zer salsaq, fermerlerdiń tamshylatyp sýarý tehnologııasyn paıdalanýǵa degen qyzyǵýshylyǵy ýaqyt ótken saıyn artyp kele jatqanyn baıqaımyz. Atqarylǵan jumystyń nátıjesi de joq emes. Jańa tehnologııaǵa den qoıǵan sharýalardyń esebinen óńirde tamshylatyp sýarý ádisimen sýarylatyn alqap kólemi aıtarlyqtaı ulǵaıǵan.
«2030 jylǵa qaraı sý tapshylyǵynyń kólemi 40 paıyzǵa jetýi múmkin. Sondyqtan biz jańa tehnologııalar men sıfrlandyrý arqyly sý únemdeýge kóshýimiz kerek. Sý tapshylyǵyn joıýdyń basqa joly joq. Bul – asa mańyzdy mindet. Úkimet sý paıdalanýdy retteý jáne ony únemdeý tehnologııasyn engizý jumysyn yntalandyrý úshin naqty sheshimder ázirleýge tıis», degen edi Prezıdent.
Resmı derekke júginsek, Jambyl oblysynda 181,8 myń gektar sýarmaly alqap bar. Onyń 127,3 myń gektary jerústi ádisimen sýarylsa, 28,5 myń gektarǵa jańbyrlatyp sýarý tehnologııasy qoldanylady. 11,5 myń gektar alqapqa tamshylatyp sýarý júıesi paıdalanylady. Byltyr 15,2 myń gektar jerge sý únemdeý tehnologııasy ornalastyrylǵan. Bıyl qosymsha 10 gektar alqapqa jańa tehnologııa engizilmek. Nátıjesinde, kórsetkish 64,5 myń gektar alqapqa deıin ulǵaımaq. Mamandardyń aıtýynsha, jańa tehnologııalardy qoldanýdyń arqasynda eginshilikte sýdy 50 paıyzǵa deıin únemdeýge múmkindik týady. Al tyń ádistiń eń tıimdisi – tamshylatyp sýarý. Onyń avtomattandyrylǵan túri bolsyn, mehanıkalyq túri bolsyn sharýalar úshin barlyq jaǵynan tıimdi desedi.
Jambyl oblysy
