Úreı

«Egemen Qazaqstannyń» menshikti tilshisi Gúlaıym Shyntemirqyzynyń 27 mamyrdaǵy «Seni qalaı qorǵaımyz, búldirshin qyz?» atty maqalasyn oqyǵan árbir ata-ana, búkil el, tek bizdiń elde emes, búkil dúnıejúzinde oryn alyp otyrǵan osynaý jantúrshigerlik oqıǵany – búldirshinderdi zorlaý men qorlaýdy aıýandyqpen iske asyryp júrgen azǵyndar – pedofılderdi tuzaqqa túsirý jóninde ashynǵan janaıqaılaryn jetkizýde. Qorqynyshtysy sol – bul maqala shyqqannan bergi bir aıǵa jetpeıtin az ýaqyttyń ishinde elimizdiń birqatar óńirlerinde pedofılııa kórinisteri oryn aldy. Adam dep ataýǵa bolmaıtyn, tipti, haıýandar da óz tuqym­dastaryna istemeıtin mundaı asa sumdyq áreketterdi iske asyrýshy pedofılder degen kimder, bul laǵnet atqan sóz qaıdan shyqqan degen oımen qolymda bar barlyq sózdikterdi qarap shyqtym. Álgi aty óshkir sóz ol kitaptardyń birde-birinde bolmaı shyqty. Sózdikterdi jasaý­shylar bul sózdi bilmegen nemese tárjimalaı almaǵan deı almaımyz. Osyǵan qaraǵanda, qasqyrdy qasqyr dese kóbeıip ketedi dep qorqyp, bóri dep ataýdy usynyp otyratyn atalarymyz tárizdi álgi jeksuryn sózdi ádeıi aýyzdaryna almady-aý dep oılaımyn. Qalaı degende de, pedofılderdiń barlyq jerde, álemniń barlyq elinde ash, qorqaý qasqyrlardaı órip júrgenderi qorqynyshty-aq. Bul kesapatqa tosqaýyl bolarlyq kúshterdiń álsizdiginen, qazir ǵana jaınap ósip-órkendep, ul-qyz ósirip otyrǵan otbasynyń bir mezette jáne oıda joq jerden orny tolmas qasiret-qaıǵyǵa ushyraýynyń jıileýinen halyqtyń úreıi óse túsýde. Osydan baryp jas urpaqtyń ómirge degen kózqarasy, búkil sana-sezimi ýlanýda. Jastardyń ózine ózi qol jumsaýlarynyń bir sebebi de úreıli ómirinen týyndap otyr dep bilýge bolady. Ata-analar tıisti qamqorlyqty zań shyǵarýshy organdardan kútedi. Dúısenbi ÁRIPULY, Mańǵystaý oblysynyń qurmetti azamaty. AQTAÝ.