Infografıkany jasaǵan – Amangeldi Qııas, «EQ»
«Freedom Insurance» SK» AQ basqarma tóraǵasy Azamat Kerimbaevtyń aıtýynsha, «Halyk Life» saqtandyrý kompanııasy 2024 jyldyń 7 aıynda eń kóp syılyqaqy jınap, reıtıngte 166 mlrd teńgemen 1-orynǵa shyqty. «Bul kórsetkish ótken jyldyń sáıkes kezeńimen salystyrǵanda 40%-ǵa artyq. Tikeleı saqtandyrý syılyqaqylary da ósip jatyr – 7 aıda komıssııalyq tólemder boıynsha 825 mlrd teńge, bul 2023 jyldyń sáıkes kezeńimen salystyrǵanda 37%-ǵa kóp», deıdi A.Kerimbaev.
Aıtýynsha, aınalymdaǵy saqtandyrý sharttarynyń sany 9,8 mln-ǵa jetti. Sarapshynyń túsindirýinshe, buǵan avtonaryqta erikti saqtandyrý polısterin satý kóleminiń ósýi áser etti. Kelisimsharttar sanynyń ósýine ómirdi saqtandyrý kompanııalary da óz úlesin qosty. 2024 jyldyń jeti aıynda 192 mlrd teńgege zeınetaqy annýıteti sharttary jasaldy. Saqtandyrýdyń bul túri boıynsha ósim 200%-dy qurady.
Osydan birneshe jyl buryn ǵana ıpoteka, avtokólikti saqtandyrý naryǵymen ǵana baılanystyryp qaraıtyn naryq búgin mıllıard emes, trıllıondarmen esepteıtin deńgeıge jetti. 2024 jylǵy qyrkúıektiń qorytyndysynda saqtandyrý uıymdarynyń jıyntyqty aktıvteri 2,8 trln teńgeden asty. Qarjy naryǵyn retteý jáne damytý agenttigi tóraǵasynyń orynbasary Marııa Hadjıevanyń aıtýynsha, 2024 jyly aınalymǵa engen ónimderdiń biri – «arnaıy áleýmettik tólem» (AÁT). Tólemniń bul túri saqtandyrý kompanııalary esebinen zııandy eńbek jaǵdaılarynda qyzmetkerlerge AÁT tóleýdi zańdastyrdy. Ony alý úshin zııandy jumys atqaratyn adamnyń jasy 55-ke tolýy jáne BJZQ-da keminde 7 jyl kásiptik zeınetaqy aýdarymdarynyń bolýy mindetti. Tólem ekonomıkanyń 19 salasynda júzege asyrylady.
BJZQ málimetinshe, AÁT taǵaıyndaý úshin mindetti sharttarǵa 2024 jyly – 37 myńnan, 2030 jyly – 58 myńnan, 2035 jyly 95 myńnan astam jumysker úmitker bola alady. Sondaı-aq keıinge qaldyrylǵan zeınetaqy annýıteti azamattarǵa 45 jastan annýıtet kelisimshartyn bekitýge múmkindik beredi.
«Mysaly, eriniń zeınetaqy jınaǵy kóp, áıeliniki tym az bolsa, biriktirgen soń, jubaılar 55 jastan keıin ekeýi de ómir boıy ári turaqty zeınetaqy annýıteti tólemderin ala alady. Munyń syrtynda olarǵa memleket te zeınetaqy tóleıdi», deıdi M.Hadjıeva.
Bul ónim de suranysqa ıe. 2024 jyldyń 1 qarashasyndaǵy jaǵdaı boıynsha elde jalpy saqtandyrý syılyqaqysy 655,4 mln teńgeni quraıtyn 106 myń zeınetaqy annýıteti sharty bekitilipti. Taǵy bir ónim – 2024 jyldyń 23 qazanynda medısına qyzmetkerleriniń kásibı jaýapkershiligin saqtandyrý engizildi. Qazaqstan qarjygerleri qaýymdastyǵy saqtandyrýdy damytý ortalyǵynyń dırektory Baýyrjan Naǵmanovtyń aıtýynsha, 2025 jyly parlament mindetti avtosaqtandyrý týraly zań aıasynda túzetýlerdiń úlken paketin qabyldaýy múmkin.
«Bul ónim sońǵy 15 jylda ǵalamdyq ózgeristerge ushyraǵan joq, buǵan onlaın-saqtandyrýdy engizýmen baılanysty tolyqtyrýlar qosylmaıdy. Jaqynda osyǵan baılanysty birqatar usynys engizildi», deıdi ol.
Aıtýynsha, 2024 jyldyń basynan bastap óńirlik koeffısıentterge jyl saıynǵy túzetý engizildi. Iаǵnı jol-kólik oqıǵasyna jıi túsetin óńirlerdiń júrgizýshileri saqtandyrý úshin kóbirek tóleıtin bolady. Eń shyǵyndy óńirlerde tarıfter kóterile bastady, al keıbireýlerinde tómendep jatyr. Biraq tarıfterdiń deńgeıi naryqtyń damýyna keri nemese oń áser ete almaıdy. Bizge anaǵurlym derbestendirilgen tásil qajet deıdi sarapshy.
ALMATY
