Otyn 2326 gradýs ystyqta 20 mınýt boıy tolyq qýatta jumys istegen. Synaq NASA-daǵy Marshall ortalyǵynda uıymdastyryldy. Altynshy synaqta oń nátıje shyǵyp, ıadro jylý qozǵaltqyshtaryna arnalǵan otynnyń ekstremal ortaǵa tózimdi ekeni dáleldendi. «General Atomics» basshysy Skott Fornıdiń aıtýynsha, bul jetistik ǵaryshqa saıahattyń jańa dáýirin bastaýǵa negiz bolmaq. Jańa tehnologııa Marsqa ushý ýaqytyn 6–7 aıdan 45 kúnge deıin qysqartady. Bul ekıpajdyń densaýlyǵyna tónetin qaýipti azaıtady.
«EAST» jańa rekord ornatty
Qytaıdyń «EAST» termoıadrolyq reaktory 1066 sekýnd boıy plazmany 100 mln gradýs temperatýrada ustap, jańa rekordqa jetti. Bul kórsetkish 2023 jyly ornatylǵan nátıjeden úsh ese kóp.
Reaktor Qytaıdyń Hefeı qalasynda ornalasqan. Mundaı joǵary temperatýra atom ıadrolarynyń qosylyp, energııa bólýine múmkindik beredi. Bul Jerde termoıadrolyq reaksııany iske qosý úshin qajet, sebebi Kúndegi sııaqty joǵary qysym jer betinde bolmaıdy. Eksperımenttiń basty jetistigi – plazmany uzaq ustap turý ári júıeniń turaqtylyǵyn arttyrý. Tehnologııa bolashaqta sheksiz ári taza energııa kózin óndirýge paıdalanylady.
Sańyraýqulaqtan jasalǵan batareıa
Shveısarııa ǵalymdary elektr qýatyn óndirýge arnalǵan erekshe bıoydyraıtyn batareıa jasap shyǵardy.
Batareıa eki túrli sańyraýqulaqtan jasalǵan. Biri anod ashytqy negizinde jasalyp, elektrondar shyǵarady, al katod aq sańyraýqulaq-trýtovıkti paıdalanyp, arnaıy ferment arqyly elektrondardy qabyldaıdy. Batareıanyń korpýsy bıoydyraıtyn materıaldardan 3D prınterde basylyp shyǵaryldy. Mundaı materıal quramynda sańyraýqulaqtarǵa qajetti qorektik zattar bar. Batareıa 600 mV qýat óndire alady jáne ony aýyl sharýashylyǵynda nemese ekologııalyq zertteýlerde shaǵyn qurylǵylardy qýattaýǵa paıdalanýǵa bolady. Bul batareıa ekologııalyq taza ári qaýipsiz. Qoldanylǵannan keıin tabıǵı jolmen ydyrap, qorshaǵan ortaǵa zııan keltirmeıdi.
