Halyqaralyq «THE» baǵalaıtyn 11 baǵyttyń ishinde atalǵan joǵary oqý ornynyń 9 baǵdarlamasy úzdik 500-ge endi. Sondaı-aq NU bilim salasyndaǵy álemdegi úzdik 200 ýnıversıtettiń qataryna kirdi. Negizinen, bul reıtıngke kirý ońaı emes. Onyń óz krıterııi bar. Máselen, ýnıversıtetter oqytý, ǵylymı qyzmet, zertteý sapasy, óndirispen yntymaqtastyq jáne ınternasıonaldandyrý dárejesi boıynsha baǵalanady.
Budan eki jyl buryn NU alǵash ret bedeldi «THE» reıtıngine enip, 501-600 dıapazonynda oryn alǵan edi. Sodan bastap, joǵary oqý ornynyń bilim salasyndaǵy baǵdarlamalary 251-300-den 176-200-ge deıin birden kóterildi. Al medısına jáne densaýlyq saqtaý baǵdarlamalary ornyn 501-600-den 401-500-ge deıin jaqsartty. Sonymen qatar úzdik 500 baǵdarlamanyń qatarynan ýnıversıtettiń ınjenerııa, áleýmettik jáne gýmanıtarlyq ǵylym baǵdarlamalary da kórindi.
NU prezıdenti doktor Vakar Ahmad joǵary oqý orynnyń alǵan asýlaryna kóńili tolatynyn jetkizdi.
«Men muny ýnıversıtetimizdiń akademııa jáne zertteý salasynda joǵary deńgeıge umtylyp otyrǵanymyzdyń birden-bir dáleli der edim. Árıne, bul oqý orny ujymynyń bir kisideı jumylǵan eńbeginiń nátıjesi. Sondaı-aq áriptesterimniń óz isterine degen adaldyǵynyń belgisi. Buǵan maqtanamyz. Biraq munymen toqtap qalmaımyz. Odan ári damı beremiz», dedi NU prezıdenti.
Shyndyǵyn aıtqanda, bul jetistikter – NU-dyń joǵary bilim berý men medısına mektebiniń atqarǵan jumystarynyń nátıjesi. 2012 jyly irgetasy qalanǵan Joǵary bilim berý mektebi «University of Cambridge jáne University of Pennsylvania» sııaqty bilim salasyndaǵy álemdik kóshbasshylarmen jaqyn baılanysyp, jaqsy jumys istedi. Osy mektepti ashylǵan kúnnen basqaryp kele jatqan Aıda Saǵyntaeva bul – elimizdegi bilim salasyn damytýda qansha alǵa jyljyǵanymyzdyń belgisi ekenin aıtady.
«Bir jaǵynan, osyndaı jetistikke jetý jolynda oqytýshylar, qyzmetkerler, stýdentter kóp eńbek sińirdi. Endi sonyń nátıjesin kórip otyrmyz. Shyn máninde, halyqaralyq bilim arenasynda salmaǵy bar oıynshyǵa aınaldyq. Osy elde týǵan azamat retinde men muny jeke jetistigim dep bilemin. Biz óz ereksheligimizdi saqtap, álemdegi akademııalyq qaýymdastyqqa úles qosyp jatyrmyz», dedi ol.
Joǵary bilim berý mektebiniń zertteýleri tórt negizgi taqyrypqa baǵyttalǵan. Olar: joǵary bilimdi transformasııalaý, ınklıýzıvti bilim, til, mádenıet jáne saıasat, bilim salasyndaǵy ózgerister men kóshbasshylyq.
Sondaı-aq biregeı oqý orynnyń úzdikter qatarynan oryn alýyna Medısına mektebiniń de qosqan úlesi zor. 2015 jyly «University of Pittsburgh» medısına mektebimen seriktestikte qurylǵan NU Medısına mektebi elimizdegi densaýlyq saqtaý júıesin jaqsartýǵa aıtarlyqtaı yqpal etip otyr. Atalǵan mektep qurylǵannan bastap, ǵylymı zertteýler men osy saladaǵy tyń jańalyqtardy engizý arqyly medısınalyq qyzmet kórsetý modelin ázirledi.
Endi Nazarbayev University 2030 jylǵa qaraı «Times Higher Education» reıtıngi boıynsha álemniń eń úzdik 300 joǵary oqý ornynyń qataryna kirýdi maqsat etip otyr. Nesi bar, bul bıikten de kórinetin kún alys emes sekildi.
