Foto: pricom.kz
Ekinshi ret AQSh prezıdenti bolǵan Donald Tramp eldegi zańsyz kóshi-qon saıasatyn retteýge asa den qoıyp otyr. Jańa ózgeristerge saı shtattarda vızasyz júrgen jáne turaqty turýǵa ruqsaty joq azamattar qamaýǵa alynyp ne elden májbúrli túrde shyǵarylady. Olarǵa AQSh-qa qaıta kirýge shekteý engizilip, áleýmettik kómek, jumys isteýge ruqsat beretin qujattar men basqa da áleýmettik jeńildikterdi joıý qarastyrylyp jatyr.
«AQSh bıligi zańsyz negizde júrgen sheteldikterge (qujaty joq, jaramsyz vıza men turaqty turýǵa ruqsaty (Grın Karta) jáne basqa qujattar bolmaýy) elden óz erkimen ketýge múmkindik berip otyr. Bul shara Qazaqstan azamattarynyń deportasııaǵa ushyraý qaýpin azaıtýǵa jáne onyń saldarynan bolashaqta AQSh vızasyna ótinish bergende el aýmaǵyna kirýge tyıym salynýynan saqtanýǵa kómektesedi», delingen Qazaqstan elshiliginiń habarlamasynda.
Elshiliktiń túsindirýinshe, «Meksıkada qalyńyz» saıasaty qaıta engizilgen. Mıgranttar men saıası baspana suraıtyndar mıgrasııalyq sotqa shaqyrǵanǵa deıin Meksıkada qalýǵa mindetteledi.
«Usta da jiber» (catch and release) sharasy toqtatylǵan. Bul ózgeriske oraı AQSh shekarasynan zańsyz ótken mıgranttar isi qaralmaıynsha qamaýda bolady. Olar arnaıy ortalyqtarǵa qamalyp nemese birden kelgen elderine qaıtarylady. Azamattar úshinshi elderge de jiberilýi múmkin (mysaly, «Meksıkada bolý» baǵdarlamasy boıynsha). Sondaı-aq, shartty túrde ýaqytynan erte bosatatyn nemese AQSh-qa kirýge aldyn-ala jeńildikter qarastyrylǵan «CBP One» mobıldik qosymshasy jumysyn toqtatqan.
Konsýldyq quqyqtyq kómek qajet bolǵan jaǵdaıda elshilikke habarlasý kerek ekenin eskertedi.
