20 qańtarda jasalǵan sanaqqa súıensek, qazir elimizde 120 soǵys ardageri, sondaı-aq Jeńiske úles qosqan 42 545 azamat turady. Onyń ishinde: qorshaýdaǵy Lenıngrad turǵyndary – 67 adam; konslagerlerdiń burynǵy kámeletke tolmaǵan tutqyndary – 139 adam; soǵys kezinde alǵan jaralanýy, kontýzııasy, zaqymdanýy nemese aýrýy saldarynan bolǵan múgedektikpen qaıtys bolǵan adamnyń jubaılary – 743 adam. Sondaı-aq maıdanda qaza tapqan nemese habar-osharsyz joǵalǵan jaýyngerlerdiń jesirleri – 2 adam, al tyl eńbekkerleri – 41 594 adam.
Ardagerler men tyl eńbekkerlerine qamqorlyq jasaý, olardyń ómir súrý sapasyn arttyrý – memlekettiń áleýmettik saıasatynyń basty basymdyqtarynyń biri. Sol sebepti qarttardy áleýmettik qorǵaýdyń túrli sharalary memlekettiń ortalyq jáne jergilikti deńgeılerinen júzege asyrylyp keledi.
Máselen, zeınetaqy jáne ózge de áleýmettik tólemderdiń mólsheri jyl saıyn artyp kele jatqanyn aıtýǵa bolady. Azamattardyń 19 sanatyna (soǵysqa qatysýshylar, tyl eńbekkerleri, aqtalǵan azamattar jáne t.b.) ózge de áleýmettik tólemderge qaramastan arnaýly memlekettik járdemaqy tólenedi. Aıtalyq, osy jyldyń 1 qańtaryndaǵy jaǵdaıǵa sáıkes eseptesek, maıdangerlerge aı saıyn beriletin áleýmettik tólemderdiń jıyntyq mólsheri zeınetaqymen birge 262 334 teńgeni jáne soǵys kezindegi jaraqaty saldarynan múgedektigi bar adamdar úshin – 279 330 teńgeni quraǵan.
Sonymen qatar ardagerlerge qosymsha kómek túrleri de turaqty kórsetilip keledi. Olardyń árqaısy áskerı qyzmetshilerge kórsetiletin quqyqtar men kepildik ıgilikterine ıe. Astana jáne Almaty qalalaryndaǵy mamandandyrylǵan gospıtaldarda bilikti medısınalyq kómek kórsetiledi, sanatorıı nemese kýrorttyq emdeý kýrstary usynylady.
