Prezıdenttiń aıtýynsha, Úkimet ınvestısııa salasyndaǵy jumysty kúsheıtýi qajet. Áıtpese, ınvestısııa naryǵyndaǵy básekelestik qyzyp turǵan kezeńde zaman aǵymynan kesh qalamyz.
«Bizge sapaly ınvestısııa qajet ekeni anyq. Ozyq tehnologııaǵa negizdelgen jáne syrtqy naryqqa arnalǵan jobalardy ádette shetel ınvestorlary usynady. Byltyrǵy 9 aıda elimizge 12,7 mıllıard dollar tikeleı shetel ınvestısııasy tartyldy. Bul 2023 jyldyń dál sondaı kezeńimen salystyrǵanda 36 paıyzǵa kem», dedi Prezıdent.
Sonymen qatar Aqtóbe, Almaty, Atyraý, Shyǵys Qazaqstan, Jambyl, Pavlodar, Soltústik Qazaqstan oblystarynda jáne Almaty qalasynda tikeleı shetel ınvestısııasyn tartý qarqyny tómendegen. Al jeke ınvestısııanyń azaıýy bıýdjet esebinen ótelip jatyr. Biraq mundaı sharamen uzaqqa bara almaımyz.
«Qazir bıýdjet tapshylyǵy bar ekenin bilesizder. Sondyqtan sapaly ınvestısııa ákeletin jaýapkershiligi joǵary ınvestorlarǵa qosymsha jeńildikter berý máselesin qarastyrǵan jón. Mundaı saıasat meniń el ekonomıkasyn yryqtandyrý týraly strategııama tolyq saı keledi. Bul – mańyzdy sát», dedi Q.Toqaev.
Sondaı-aq Prezıdent Úkimetke ınvestordy izdeýge, qoldaýǵa jáne qorǵaýǵa qatysty jumystyń bárin júıeli júrgizetin birtutas ekojúıe qurýy qajet ekenin aıtty.
«Bul jumys barlyq deńgeıde, ıaǵnı aımaqta, ortalyqta jáne shetelde birdeı atqarylýy kerek. Osy oraıda sheteldik jáne otandyq ınvestorlarǵa qatysty ustanym birdeı bolýy qajet. Memlekettiń qoldaýyna ıe bolǵan kompanııalarǵa tıisti talap qoıylýy kerek. Olar jumys oryndaryn saqtaýǵa, óndiristi jańǵyrtýǵa tıis. Sonymen birge ekologııa talaptaryn múltiksiz oryndaýǵa mindetti», dedi el Prezıdenti.
