Batys Qazaqstanda bultty kúni de qýat óndiretin kún batareıalary ornatyldy

ORAL. 18 maýsym. Batys Qazaqstan oblysy Jańaqala aýdanyndaǵy «Musa» sharýa qojalyǵynyń jetekshisi Tilegen Mýsın qum ishinde áıgili gereford tuqymdy iri qarany ósirýmen aınalysady. Onyń qyzmetiniń basty fenomeni AQSh-tan jetkizilgen bitimi, oty men sýy bólek tekti maldy Naryn qumyna jersindire bilýinde. Sonyń nátıjesinde gereford qumnyń jaıylymyn jatsynbaı qoń jınaı túsýde. Sherdi mal ósirýdegi basty qıyndyq – sý. Qum ishinde ózen, kól bol bermeıdi. Bul týraly egemen.kz tilshisi habarlady. Sondyqtan Tilegen qudyq qazdyryp, sý shyǵarý úshin energııa óndiretin kún men jel taqtaıshalaryn ornatty. Onyń árqaısysy táýligine eń tómengi eseppen 1,5 kVt qýat óndiredi. Jınaqtalyp kelgende – 9 kVt. Bir otbasynyń ortasha eseppen 3-5 kVt tutynatynyn eskersek, bul jetkilikti mólsher. Qajettilikke qaraı 10-12 kVt qýat óndirýge bolady. Taqtaıshalardyń paıdalaný merzimi 25 jyl. «Jóndep, maılap áýre bolmaısyń. Tek anda-sanda shańyn súrtseń bolǵany» deıdi Tilegen. Sondaı-aq, sharýa qojalyǵynyń jetekshisi «Maglev» júıesindegi jel generatory saǵatyna 100 Vt qýat beretinin aıtty. Bul túngi mezgilde akkýmýlıatordy qorektendirý úshin ornatylǵan. Tilegenniń ónertapqyshtyq oı-pikirinen túıgenimiz, biz Kún qýatyna baı ekenbiz. Túnniń qysqalyǵy sonsha, tańǵy raýan sebezdep túskenshe akkýmýlıatordaǵy jınaqtalǵan toq sarqylyp úlgermeıdi. Kún taqtaıshalary bultty kúni de qýat óndiredi. Tek bul ǵajaıyp qondyrǵy kún kúrkirep, naızaǵaı jarqyldaǵan jaǵdaıda ǵana qýat bermeıtin kórinedi. Ony óndirgenimen, jumys jasap turǵan kezde jaı túsip ketý múmkindigi asa joǵary eken. Temir Qusaıyn. Derek: egemen.kz. Sýret: zhaikpress.kz.