Elbasy Astananyń bas josparyndaǵy birqatar jobamen tanysty

ASTANA. 18 maýsym. Elbasy «Astana Bas jospary» ǴZJI» jaýapkershiligi shekteýli seriktestiginde boldy. Bul týraly akorda.kz habarlady. Munda Memleket basshysyna Astana qalasynyń 2030 jylǵa deıingi bas josparyna engizilgen túzetýler men astanalyq aglomerasııa qalyptastyrý jobasy jóninde, sondaı-aq, elordanyń jańa kólik júıesin qurý barysy baıandaldy. Budan bólek, Qazaqstan Prezıdentine Orynbor kóshesin, jańa temirjol vokzaly aýdanyn salý tujyrymdamasy jáne Nurly jol býlvarynyń ekinshi kezeginiń jobasy týraly aıtyldy. Sondaı-aq, Nursultan Nazarbaevqa elordada qurylysy josparlanǵan taǵy birqatar jobalar tanystyryldy. BAQ ókilderine arnalǵan brıfıngte Memleket basshysy elordanyń qurylysy is júzinde 10 jyl ishinde júzege asqanyn atap ótti. «Qalaǵa qajettiniń bári 2008 jylǵa deıin salyndy, odan keıingi kezeńde Astananyń damýy jeke ınvestorlardyń qatysýymen jalǵasty. Qazirgi kezde jan basyna shaqqandaǵy eń kóp ınvestısııa elordaǵa tıesili. Astananyń el ekonomıkasyn damytýǵa qosqan úlesi jyl saıyn ósip keledi. Búginde elorda barsha qazaqstandyqtardyń maqtanyshy sanalady, qonaqtaryn tánti etedi. Halqynyń sany 900 myń adamǵa jetti, buryn muny boljaýdyń ózi qıyn bolatyn. Qala elimizdiń shyn mánindegi ákimshilik, mádenı, iskerlik, bilim jáne medısına ortalyǵyna aınaldy», – dedi Qazaqstan Prezıdenti. Nursultan Nazarbaev Astanany salý jáne abattandyrý jumystary jalǵastyrylatynyn aıtty. «Qandaı kemshilikter bar ekenin, sonyń ishinde kólikter turaǵyna qatysty másele týraly da bilemiz, onyń bári mindetti túrde sheshiledi. Taıaýdaǵy mol jaýyn sý sorǵy kárizderine qatysty túıtkilderdiń bar ekenin kórsetti. Onymen de jumys júrgizý qajet. Sonymen qatar, balabaqshalar men mektepter salý máselesine de nazar aýdarý kerek. Qalanyń ári qaraı damý keleshegi EKSPO-2017 aýmaǵy men onyń aınalasyndaǵy kósheler qurylysyn, Sýly-jasyl jelekti býlvardy abattandyrý, jańa saıabaqtar, sonyń ishinde 100 gektar aýmaqta botanıkalyq baq salý josparyn qamtıdy. Bul jumystardyń barlyǵy elimizdiń týra ortalyǵynda múlde jańa megapolıstiń qalyptasýyna negiz qalaıdy, ol barsha qazaqstandyqtardyń ıgiligine qyzmet etetin bolady», – dedi Memleket basshysy. Elaman Qońyr. Derek, sýret: akorda.kz.