Foto: N.Baıbýlın
Máýlen Áshimbaev azamattardyń ál-aýqatyn arttyrý jáne damyǵan, ınklıýzıvti, ashyq Qazaqstan qalyptastyrý úshin qolǵa alynǵan sharalardy iske asyrý jolynda barlyq el azamattarynyń kúsh-jigerin biriktirý mańyzdy ekenin aıtty. Sondaı-aq ol Memleket basshysynyń reformalar baǵdaryn zańnamalyq turǵydan qamtamasyz etý Senat qyzmetiniń negizgi basymdyǵy bolyp qala beretinin aıtyp, Palata jumysynyń aldaǵy basym baǵyttaryna nazar aýdardy.
«Prezıdentimiz Qasym-Jomart Kemeluly Toqaev Úkimettiń keńeıtilgen otyrysynda elimizdiń aldaǵy jyldardaǵy áleýmettik-ekonomıkalyq damýyna qatysty mańyzdy baǵyttardy belgilep berdi. Memleket basshysy bergen tapsyrmalar qatarynda salyq-bıýdjet saıasatyn reformalaýdy kózdeıtin jańa Bıýdjet jáne Salyq kodeksteri bar. Sondaı-aq Parlament Jer qoınaýyn paıdalanýshylardyń biryńǵaı platformasyn zańnamalyq turǵydan qamtamasyz etý jáne sıfrlyq aktıvterdi qoldaný aıasyn keńeıtý úshin ınfraqurylym qurý jóninde túzetýler qabyldaýǵa tıis. Osy sessııanyń sońyna deıin mindetti áleýmettik medısınalyq saqtandyrý júıesin jetildirý týraly zań jobasyn da pysyqtaýymyz kerek. Júktelgen mindetterdi iske asyrý jolynda naqty sheshimder men júıeli jumys qajet», dedi Senat Tóraǵasy.
Palata otyrysynda senatorlar mańyzdy máselelerge qatysty depýtattyq saýaldaryn da joldady.
Nurtóre Júsip elimizde erte júktiliktiń jáne jasóspirimder arasynda týý kórsetkishiniń artýyna alańdaýshylyq bildirdi. Osyǵan baılanysty ol reprodýktıvti densaýlyq saqtaý salasyndaǵy jumysty ulttyq deńgeıde júıeleý jáne balalar men jasóspirimder arasynda tıisti túsindirý jumystaryn kúsheıtý qajet ekenine toqtaldy.
Al Andreı Lýkın Túrkistan oblysynyń taýly aýdandarynda tótenshe jaǵdaıdyń aldyn alýǵa arnalǵan jumysty uıymdastyrý jáne habarlandyrý júıesimen qamtý tómen deńgeıde ekenin ortaǵa saldy. Atalǵan máseleni sheshý úshin senator birqatar shara usyndy. Olardyń qatarynda habarlandyrý júıeleriniń jaı-kúıine monıtorıng júrgizý úshin biryńǵaı sıfrlyq platforma qurý syndy usynystaryn jetkizdi.
Ǵalıasqar Sarybaev jasandy ıntellekt áleýetin keńinen paıdalaný jáne úlken derektermen jumys isteý baǵytyndaǵy mańyzdy mindetterge Úkimettiń nazaryn aýdardy.
Janna Asanova elde telefon alaıaqtaryna qatysty oqıǵalardyń kóbeıgenin aıtyp, dabyl qaqty. Senatordyń aıtýynsha, uıaly nómirlerdi jasyryn paıdalanýdy boldyrmaý úshin SIP-telefonııany lısenzııalanatyn qyzmet túrleriniń tizimine qosý jáne SIP-telefonııa men SIM-boks mashınalaryn lısenzııasyz paıdalanǵany úshin jaýapkershilikti qatańdatý qajet.
Sáken Arýbaev mal sharýashylyǵyna, onyń ishinde teri men júndi qaıta óńdeý salalaryna qatysty ózekti máselelerge toqtaldy. Depýtat shaǵyn jáne orta kásiporyndarǵa arnalǵan sýbsıdııa men jeńildikpen beriletin nesıelerdiń qoljetimsizdigi, memleket tarapynan júıeli qoldaý baǵdarlamalarynyń bolmaýy jáne shıkizat sapasynyń tómendigi salanyń damýyna qolbaılaý bolyp otyrǵanyn baıandady.
