Ulttar birligi ómirden osylaı kórinis tabýda

Qazir elimizdiń túkpir-túkpirinde Qazaqstan halqy Assambleıasynyń 20 jyldyǵyna oraı túrli is-sharalar ótip jatyr. Sondaı mádenı ıgi is jýyrda Almaty qalalyq sotynda da uıymdastyryldy. «Máńgilik el: bir el – bir taǵdyr» atty sharaǵa Almaty qalasynyń barlyq aýdanynyń ákimshilik, ekonomıkalyq, qylmystyq sottarynyń mamandary tegis qatysty. Mundaı shara sot mamandaryna elimizdegi túrli ulttar men ulystardyń ádet-ǵurpyn tanyp-bilýine kómektesedi. Ári Qazaq elinde tatý-tátti turyp jatqan túrli halyqtar arasyndaǵy bereke-birlikti bekite túsýge de sep. Osyndaı maqsatta uıymdastyrylǵan sharada Medeý aýdanynyń sot qyzmetkerleri – orys ultynyń, Naýryzbaı aýdany – uıǵyr ultynyń, Bostandyq aýdany – cheshen ultynyń, Almaly aýdany – grýzın ultynyń, Medeý aýdany tájik ultynyń salt-dástúrlerin sahnalyq kórinister arqyly pash etti. Án-jyr men kóńildi bıge de kezek tıdi. Shara barysynda sóz alǵan Almaty qalalyq sotynyń tóraǵasy Aqjan Eshtaı áriptesterin Assambleıanyń 20 jyldyǵymen quttyqtady. Jańa qurylǵan Naýryzbaı aýdandyq sotynyń qyzmetkerleri Assambleıanyń 20 jyldyǵyna arnalǵan merekelik jıynǵa erekshe daıyndalǵan eken. Uıǵyr ultynyń «qyz uzatý» jáne «kelin túsirý» dástúrin sahnalaǵanda qol soqpaǵan adam qalmady. Sebebi, syrttan qaraǵan adamǵa olardyń sot qyzmetkerleri ekeni esh baıqalmaıdy. Quddy, teatr ártisteri sekildi. Ásirese, kúıeý jigittiń beınesin somdaǵan Jiger Ázimbaev pen qyz qurbysynyń rólindegi Gúlmıra Qalymbetovanyń óneri jurt kóńilinen shyqty. Bas qudany somdaǵan Erkin Esenbaev ta eldiń razylyǵyna bólendi. Tipti, naýryzbaılyq sot mamandary uıǵyr ultynyń saz aspaptarynda oınap, jıylǵan kópti tańǵaldyrdy. – Eldiń birligi men qoǵamnyń turaqtylyǵynan artyq baılyq joq. Bul – Elbasymyz eńbeginiń jemisi. Alaıda, ony ári qaraı damytý, elimizdegi túrli etnos­tar arasyndaǵy dostyq peıil, aǵaıyndyq nıetke dáneker bolar sharalarǵa atsalysý – árqaısymyzdyń azamattyq paryzymyz. Sol sebepten de bul merekege aı buryn daıyndaldyq. Ol eńbegimiz aqtaldy, – deıdi Naýryzbaı aýdandyq sotynyń tóraǵasy Ulan Esbergenov. Jıyn sońynda merekelik sharaǵa qonaq retinde qatysqan almatylyq túrli etnos ókilderi sóz alyp, ıgi iske uıytqy bolǵan uıymdastyrýshylarǵa alǵys bildirdi. Sansyzbaı JÁKEN. ALMATY.