Qazaq kilemi – álemdik naryqta

«Bal Tekstıl» fabrıkasy 2013 jyly jumysyn bastap, qysqa ýaqyt ishinde otandyq kilem óndirisiniń kóshbasshysyna aınalyp úlgerdi. Alǵashqy kilemder sol jyldyń qazan aıy­nan bastap shyǵaryla basta­ǵan. Kompanııa endi aıaqqa tur­ǵan kezeńde fabrıkada nebári tórt-aq stanok jumys istep turǵan. Búginde olardyń sany 17-ge jetti. Arada eki jyl ótken soń 2015 jyly polıpropılen jipterin óndiretin seh iske qosyldy. 2023 jyldyń nátıjesi boıynsha fabrıkada jip óndirisi eki ese artty. Osy kúnde kilem toqý kásipornynyń óndiristik qýaty jylyna 6 mln sharshy metr kilem men 7 500 tonna polıpropılen jibin quraıdy. «Bal Tekstıl» kilemderi belgııalyq «Van de Wiele» kompanııasynyń zamanaýı jabdyqtarynda toqylady. Kilem tyǵyzdyǵy 1 sharshy metr­ge 300 myńnan 3,6 mln-ǵa deıingi túıinderden turady.

Fabrıkanyń ónimderi TMD elderine, sondaı-aq basqa da alys-jaqyn shetel­der­ge eksporttalady. Aldaǵy ýaqytta kompanııa eksport­tyq áleýetin arttyryp, kilem­der­di dúnıejúziniń úlken naryq­tarynda satýdy kózdep otyr.

«Bal Tekstıl» «CFE 2025 Carpet and Flooring Expo» kórmesine qatysý arqyly aldyna birqatar maqsat qoıdy. Atap aıtqanda, satylym aıasyn keńeıtý, álemdik kilem óndirisi kóshbasshylaryna otandyq kilem­der­di tanystyrý, álemdik naryqta qazaq kilemi men joǵary sapanyń rámizi retinde «Bal Carpet» brendin qalyptastyrý. Osy kórme barysynda B2B kezdesýler ótkizilip, fabrıkanyń jańa kilem úlgileri tanystyryldy. Odan bólek, qonaqtarǵa kilemniń «Millenium», «Estate», «The MOD» sııaqty premıým sanattaǵy úlgileri usynyldy.

Sondaı-aq kelýshiler «Bomonti», «Graf», «Grant», «Tron», «Viano», «Venus», «Aura», «Eva», «Oscar», «Flora» sekildi kilem túr­lerin tamashalaýǵa múmkindik aldy.

«Ystanbul qalasynda ót­ken ha­lyq­­aralyq kórmede biz qazaq ki­le­min toqýdan sheber­lik qabi­leti­mizdi kórsetip qana qoımaı, olardy shetelge eksporttaý boıynsha da mańyzdy qadam­ jasap qaıttyq. Sonyń ishin­de О́zbekstan, Belarýs, Ázerbaıjan elinen kelgen klıenttermen berik iskerlik baılanys ornattyq. Reseı­lik seriktestermen de kelisim­shart jasasý týraly mańyzdy mámilege qol jetkizdik. Osylardyń nátıjesinde kompanııa ónimine halyqaralyq suranys artyp, jańa naryqqa shyǵýǵa múmkindik ashylady dep senemiz. Biz shetel naryǵynda úlken suranysqa ıe bolatyn brendtik ónimderdi kóbirek shyǵarýymyz kerek. Otandyq kilem ónimderi sol maqsatqa jetýdiń alǵashqy qadamdary bolady degen úmittemiz», deıdi «Bal Tekstıl» basshysy T.Ysqaqov.

Otandyq toqyma fabrıkasy byltyr Astanada ótken Shanhaı yntymaqtastyq uıy­my­nyń mańyz­dy jıynyn­da joǵary mártebeli qonaq­tardy qabyl­daıtyn oryndar men zaldardyń barlyǵyna ózi­niń kilemderin biregeı úlgide ári erekshe sánmen toqyp berdi. El mártebesin asyrý jolynda jasaǵan osy eńbegi úshin kompanııa memleket atynan alǵys pen úlken qurmetke bólendi.

2025 jyly Qytaı naryǵyna jol ashyp, saýda-sattyq baılanysty kúsheıtýdi negizgi jospar men maqsat retinde qarastyryp otyr.

Sonymen birge kásiporyn «Ju­mys­shy mamandyqtar jylyna» oraı qarapaıym eńbekker­lerdi áleýmettik turǵydan qamta­ma­syz etý jumysyn kúsheıte túspek.

ShYMKENT