AQTО́BE. 18 maýsym. Aqtóbe óńirinde Keńes Odaǵynyń Batyry Álııa Moldaǵulovanyń 90 jyldyq mereıtoıy aıasynda kóptegen mádenı sharalar uıymdastyrylýda. Sonyń biri – Ǵazıza Jubanova atyndaǵy oblystyq fılarmonııada ótkizilgen «Jerim meniń» patrıottyq ánder baıqaýy. Bul týraly egemen.kz tilshisi habarlady.
Baıqaýdy qazylar alqasynyń tóraǵasy, kompozıtor, Qazaqstannyń eńbek sińirgen óner qaıratkeri Keńes Dúısekeev qysqasha sóz sóılep ashyp, óner dodasyna qatysýshylardy quttyqtady. Oblysta bıyl ekinshi ret jáne alǵash ret halyqaralyq deńgeıde uıymdastyrylyp otyrǵan kórnekti kompozıtor, Aqtóbe óńiriniń týmasy Beıbit Oralulynyń ánderin oryndaýshylardyń baıqaýyna sáttilik tiledi. Beıbit Oraluly týraly jyly lebiz bildire kelip, jas oryndaýshylarǵa ónerde óz bıikterin baǵyndyrýǵa degen izgi nıetin bildirdi.
Baıqaýǵa elimizdiń barlyq aımaǵynan jáne Reseı, Ázerbaıjan, Qyrǵyzstannan 17 jas oryndaýshy qatysty. Baıqaýdyń sharty boıynsha olar Beıbit Oralulynyń bir ánin jáne óz qalaýy boıynsha taǵy bir án oryndady. Qatysýshylardyń ónerin qazylar alqasynyń tóraǵasy, kompozıtor Keńes Dúısekeev, músheleri – kompozıtor Beıbit Oraluly, kompozıtor, Ázerbaıjannyń eńbek sińirgen óner qaıratkeri Sardar Faradjev, «Daryn» memlekettik jastar syılyǵynyń laýreaty, Qazaqstannyń eńbek sińirgen qaıratkeri Altynaı Jorabaeva, kompozıtor, prodıýser Renat Ǵaısın, «Daryn» memlekettik jastar, «Tarlan» memlekettik syılyqtarynyń laýreaty Asylbek Eńsepov, sondaı-aq, ánshi Gaýhar Qaspaqova baǵalady.
Baıqaý shymyldyǵyn aqtóbelik Sábıt Begman Beıbit Oralulynyń «Mahabbatym ómirdegi meniń» ánimen ashty. О́ner saıysyna úkili úmitpen kelgen jas ánshiler kezegimen sahna tórine kóterildi. Nátıjesinde baıqaýdyń gran-prı júldesin Qaraǵandy oblysynan kelgen ánshi Araılym Jókenova jeńip aldy. Birinshi oryndy Batys Qazaqstan oblysynyń ánshisi Aıymbek Sartyqov ıelendi. Aqtóbelik Nurjan Orazov pen Ázerbaıjan Respýblıkasynyń jas talanty Fahrı Kazım-Nıdjat ekinshi orynǵa taban tiredi. Ońtústik Qazaqstan oblysynyń «Semser» toby men jas ánshi Gúlhan Jýashbaevǵa, aqtóbelik Laýra Taýsarovaǵa úshinshi oryn buıyrdy.
Jas ánshilerdiń sheberligin shyńdaǵan baıqaý Qazaqstan kompozıtorlar odaǵynyń múshesi Beıbit Oralulynyń 60 jyldyq mereıtoıyna arnalǵan «Aýylym – aq besigim» atty shyǵarmashylyq keshke ulasty. Merekelik sharaǵa aqyn-dramatýrg Iran Ǵaıyp, aqyn, aýdarmashy Shómishbaı Sarıev, Qazaqstannyń eńbek sińirgen qaıratkeri, kompozıtor Keńes Dúısekeev, Qazaqstan Respýblıkasy mádenıet salasynyń úzdigi, aqyn Asylbek Abdrahmanov jáne basqalary qatysty. Kesh barysynda mereıtoı ıesi atyna jyly lebizder aıtylyp, jergilikti bılik kompozıtor Beıbit Oralulyna syı-sııapat jasady. Konserttik baǵdarlamada Qazaqstan estrada juldyzdarynyń oryndaýynda mereıtoı ıesiniń tanymal ánderi men shyǵarmalary oryndaldy.
Satybaldy Sáýirbaı.
Derek, sýret: egemen.kz.
