Alda ónerkásiptik nysandar tur

Jospar boıynsha 2014-2015 jyldarǵa 492 nysan kózdelgen, onyń ishinde 160 nysan satylyp, 122-si saýda-sattyqta tur. Sondaı-aq, 210 nysan baǵalanyp, ústimizdegi jyldyń sońyna deıin satýǵa shyǵarylady. Bul jóninde Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda Qarjy vıse-mınıstri Rýslan Dálenov málimdedi. Qazaqstan Respýblıkasynyń Úkimeti bekitken Jekeshelendirýdiń 2014-2016 jyldarǵa arnalǵan keshendi josparyna sáıkes jekeshelendirýdiń ekinshi tolqyny 2014 jylǵy shildede bastalǵan bolatyn, dedi vıse-mınıstr. Osy boıynsha qorytyndy baıandamasyn jasaı kele, R.Dálenov ótkizilgen 160 nysannyń 88-i qazirgi birlesip ıelik etýshilerge 22,4 mlrd. teńgege, al 39-y jeke tulǵalarǵa 1,2 mlrd. teńgege satylǵandyǵyn aıtty. Sonymen qatar, 32 nysandy ınvestor kompanııalar 6,2 mlrd. teńgege satyp alǵandyǵyn habarlaı otyryp, taǵy bir nysan «KEGOK» AQ-tyń «Halyqtyq IPO» boıynsha 13,1 mlrd.teńgege halyqtyń qalyń tobyna buıyrdy, dedi. Olardyń jalpy satý somasy 42,9 mlrd. teńgeni quraǵandyǵyn aıtqan R.Dálenov, onyń 730 mln.teńgesi respýblıkalyq bıýdjetke túskendigin atap ótti. Jáne de vıse-mınıstr jergilikti bıýdjet 745 mln. teńgege tolyqty, 2,9 mlrd. teńge áleýmettik-kásipkerlik korporasııaǵa, al 38,6 mlrd. teńgesi holdıngterge tústi degendi qosa aıtty. Nysandar ishinde eń qymbat bolyp turǵan «KEGOK» AQ ekendigi málim. Al budan ári «Qazaqstan temir joly» AQ-tyń 5 nysany bar ekendigine toqtalǵan R.Dálenov olar týraly da aıtyp ótti. Jalpy, usynylǵan ártúrli salalardaǵy 160 nysannyń sany boıynsha qyzmet kórsetý salasy alda keledi. О́nerkásiptik nysandar eń kóp somany – 25 mlrd. teńgeni beredi, dedi vıse-mınıstr. Elmıra MÁTIBAEVA, «Egemen Qazaqstan».