ATYRAÝ. 18 maýsym. Atyraýdyń týmasy, Reseıde turatyn ataqty rejısser, sonymen birge, prodıýsser Tımýr Bekmambetov týǵan jerine kelip, ákesi Nurýahıtke ornatylǵan memorıaldyq taqtanyń ashylý saltanatyna qatysty. Bul týraly egemen.kz tilshisi habarlady.
«Túngi sholǵynshy» fılmimen keńinen tanymal bolǵan Tımýr Bekmambetov týǵan jerine budan on jyl buryn kelgen eken. Sodan keıin Atyraýǵa kelý sapary ákesi Nurýahıtke ornatylǵan memorıaldyq taqtanyń ashylý saltanatymen tuspa-tus keldi. Onyń ákesi energetıka salasynda abyroıly eńbek etken. Balalyq shaǵyn Jaıyq jaǵasynda ótkizgen, osynda mektep bitirgen Tımýr Bekmambetovtiń aıtýynsha, ol qazir sheteldik MGM kınostýdııasynyń «Ben-Gýr» atalatyn iri jobasyndaǵy jumysyn jalǵastyrýda.
«Bul 2000 jyldyq tarıhy bar óte kóne hıkaıa. Onyń ssenarıi Lıý Ýollestiń keńinen tanymal bolǵan «Ben-Gýr» klassıkalyq romanynyń jelisimen jazylǵan. Hıkaıa sıýjetinde aǵaıyndy jigitter týraly baıandalady. Negizgi túıin – kek pen keshirim jaıly. Hıkaıada Morgan Frımen, Djek Hıýston sekildi akterler oınaıdy», – dedi ataqty rejısser «Aqjaıyq» gazetine bergen suhbatynda.
Sonymen qatar, buǵan deıin Tımýr Bekmambetov negizin qalaǵan halyqaralyq «Astana» ekshn-fılmder kınofestıvalinde Qazaqstan tarıhyna negizdelgen birlesken jobalar jóninde de áńgimelep berdi. Onyń aıtýynsha, ssenarııler festıvali ótken. Biraq, onda Qazaqstan tarıhyna qatysty emes, ǵarysh týraly úzdik ssenarıı tańdalypty. Sóıtip, amerıkandyq Braıan Mıllerdiń ssenarıi negizinde «Apollo 18» fılmin túsirýge 5 mln. dollar jumsalǵan. Keıin fılmnen 25,2 mln. AQSh dollary kólemine tabys túsken.
Tımýr Bekmambetov budan bylaı týǵan jerine jıi kelýge bekinip otyr. Ol muny jasynyń ulǵaıǵanymen, sondaı-aq, týǵan jerdiń tartyp turatyndyǵymen túsindiredi.
Joldasbek Shópeǵul.
Derek: egemen.kz.
Sýret: azh.kz.
