Petropavlda jer zańsyzdyǵy órship tur

PETROPAVL. 18 maýsym. Qyzyljar óńirinde zań buzýshylyqtardyń aldyn alý jáne boldyrmaý maqsatynda atqarylyp jatqan yqpal etý sharalaryna qaramastan jer qatynastary salasyndaǵy bura tartýshylyqtar tyıylmaı otyr. Bul týraly oblystyq «Soltústik Qazaqstan» gazeti habarlady. Petropavl qalasy prokýrorynyń orynbasary Jasulan Smaǵulov málimdegendeı jer týraly zań talaptarynyń oryndalýyna baılanysty júrgizilgen tekseris qorytyndylary kóńil kónshitpeıdi.  Jer ýchaskelerin berýde jáne qaıtarýda zańdylyqtardyń qatań saqtala bermeýi saldarynan bıyldyń ózinde ǵana 86 fakt áshkerelengen.  Eki adam tártiptik jaýapkershilikke tartylyp, 5 mıllıon teńge memlekettiń paıdasyna óndirilgen.  Jýyrda 3 mıllıard teńgeniń jer telimi memlekettiń menshigine qaıtarylǵanyn tilge tıek etken ol qala ákimdiginiń Iýjnyı kentindegi jalpy aýmaǵy 235 gektar jer ýchaskesin “Tobyl” áleýmettik-kásipkerlik korporasııasy” ulttyq kompanııasy” aksıonerlik qoǵamynyń jekemenshigine berý týraly qaýlysy zańsyz dep tabylǵanyn jetkizdi. Sóıtip memleket menshigine keri qaıtarylǵan. «Jer telimderin alý úshin kezekte turǵandar sany 5 myńnan asyp jyǵylady.  Endi ol jerlerdi sol azamattarǵa berý kerek. Prokýrorlyq áreket etýdiń arqasynda turǵyndardyń jer telimderine kezegin 24 paıyzǵa kemitýge qol jetti», deıdi J. Smaǵulov. Byltyr jer qatynastaryna jaýapty organdardyń zańǵa qaıshy sheshimderi az bolmapty. Oǵan dálel retinde Petropavl qalasy ákimdiginiń jer ýchaskelerin jáne jyljymaıtyn múlikti májbúrlep ıesizdendirý týraly qaýlysyn keltirdi. Onyń negizinde 77 jer ýchaskesinde ornalasqan qurylys nysandaryn buzý máselesi qarastyrylǵan.  Sebebi, ákimdik belgilegen jer telimderi qalanyń bas josparyna sáıkes úı-jaı qurylystarynyń aýmaǵyna jatatyny anyqtalǵan. Ári atalmysh aýdanǵa salynbaq bolǵan jańa qurylystyń jospary men jobasy jasalmaǵan. Qalalyq jer qatynastary bóliminiń budan basqa da “bylyq-shylyqtary” tolyp jatqan kórinedi. Prokýrorlyq tekseristiń nátıjesinde Ýlıanov kóshesi, 59 mekenjaıyndaǵy jer ýchaskesiniń zańsyz berilgendigi belgili bolǵan. Mamandandyrylǵan aýdanaralyq ekonomıkalyq sot prokýratýranyń Sátbaev kóshesi, 17 “A” mekenjaıynda ornalasqan jer ýchaskesin memleketke qaıtarý týraly talabyn qanaǵattandyrǵan. Oblys ortalyǵynyń bas josparyn belden basa otyra jeke turǵyn úı qurylysy úshin jer ýchaskelerin úlestirgen quzyretti mekemeniń basqa da áreketterine tosqaýyl qoıylǵan. Sot tártibimen quny 1 270 000 teńge bolatyn jer ýchaskesi memleket menshigine qaıtarylǵan. Prokýrordyń aıtýynsha, mundaı zańsyzdyqtar kóp jaǵdaıda sybaılas jemqorlyqqa jaǵdaı týǵyzady. Sol sebept jer máselesinde olqylyqtarǵa oryn bergen tulǵalar  tıisti jazasyn alatyn bolady. О́mir Esqalı. Derek: oblystyq «Soltústik Qazaqstan» gazeti. Sýret: egemen.kz