Qazaq kúresi konfederasııa quramyna kirdi

ASTANA. 18 maýsym. Qazaq kúresi federasııasy resmı túrde  sporttyq jekpe-jek jáne kúsh qoldanylatyn sport túrleri konfederasııasynyń quramyna kirdi. Bul týraly konfederasııanyń baspasóz qyzmeti habarlady. Konfederasııanyń BAQ jáne qoǵammen baılanys jónindegi qyzmettiń úılestirýshisi Jiger Ázbergenniń aıtýynsha, mamyr aıynda Qazaq kúresi federasııasynyń esep berý konferensııasynda konfederasııanyń quramyna kirý týraly sheshim qabyldandy. Bul sheshimdi konfederasııanyń jalpy jınalysynda onyń músheleri biraýyzdan quptady. Osylaısha Qazaq kúresi federasııasy konfederasııanyń altynshy múshesi bolyp otyr. Aıta keteıik, sporttyq jekpe-jek jáne kúsh qoldanylatyn sport túrleri konfederasııasy 2012 jyly qurylǵan bolatyn. Onyń tóraǵasy Tımýr Qulybaev. Qazirgi tańda boks, grek-rım, erkin jáne áıelder kúresi, dzıýdo, taekvondo (WTF) jáne aýyr atletıka federasııalary uıymnyń músheleri. Konfederasııany qurýdaǵy maqsat - úlken nátıjege qol jetkizý úshin kásipqoı, kadrlyq jáne qarjy resýrstarynyń basyn biriktirý. Bes federasııanyń basyn biriktirip otyrǵan uıymnyń mindeti: buqaralyq sportty damytý, olardy keńinen tanystyrý, dene shynyqtyrý men salamatty ómir saltyn nasıhattaý. Konfederasııa sondaı-aq, álem chempıonattarynda jeńiske jetýge qabiletti atletterdi daıyndaý máselelerin sheshýde kóp resýrstyq shyǵyndy jáne keshendi, júıelik jumysty talap etetin joǵary jetistikter sportyn damytýmen, dene shynyqtyrý men salamatty ómir saltyn nasıhattaý sııaqty máselelermen aınalysady. Dastan Kenjalın. Derek: Sporttyq jekpe-jek jáne kúsh qoldanylatyn sport túrleri konfederasııasy. Sýret: egemen.kz