Úkimet basshysy birqatar oblysta joldardyń sapasyn jaqsartýdyń ornyna kerisinshe úrdis baıqalyp otyrǵanyn atap ótti.
«Jergilikti joldarǵa da basa mán berý kerek. Oblystyq jáne aýdandyq joldardy kúrdeli jóndeýge qomaqty qarajat bólinýde. Onyń ishinde respýblıkalyq bıýdjetten de qarastyrylǵan. Alaıda, keıbir óńirlerde, jergilikti bıýdjetten qarjylandyrý kólemi jetkiliksiz bolyp otyr. Atap aıtqanda, bul – Batys Qazaqstan, Soltústik Qazaqstan jáne Abaı oblystaryna da qatysty másele. Turǵyndar joldardyń sapasyna narazy», dedi O.Bektenov.
Úkimet basshysynyń aıtýynsha, ótken jyly azamattardan joldar men kósheler máselesine qatysty resmı túrde 40 myńnan astam aryz-shaǵym kelip túsken.
«О́ńirlerde jol ınfraqurylymyn jańǵyrtý jumystarynda qurylys tehnologııalaryn saqtamaý jáne merzimderdi keshiktirý baıqalyp otyr. Ákimder bul máselelerdi baqylaýǵa alýǵa tıis. Kólik aǵynyn basqarý isine zamanaýı IT-tehnologııalar men jasandy ıntellektti engizý qajet», dep atap ótti Oljas Bektenov.
