Foto: Aqorda
Prezıdentke elimizde qabyldanǵan keshendi sharalar nátıjesinde byltyr qylmys sany 12,7 myńǵa azaıǵany baıandaldy.
Sońǵy jyldary qylmys deńgeıiniń, ásirese, kisi óltirý, qaraqshylyq, tonaý men urlyq sııaqty asa aýyr qylmys túrleri kórsetkishteriniń aıtarlyqtaı tómendeýi baıqalady. Sonymen qatar tergeýdiń zamanaýı ádisterin engizý arqyly qylmystyń barlyq sanaty boıynsha ashylýy jaqsara túsken.
Erjan Sádenov qylmyskerlerdi izdestirý jumystarynyń nátıjesi týraly aıtty. 2024 jyly polısııa izdeýde júrgen 1949 adamdy ustaǵan.
Memleket basshysyna uıymdasqan, kıber jáne esirtki qylmystaryna qarsy is-qımyl, sondaı-aq quqyq buzýshylyqtardyń aldyn alý jónindegi tapsyrmalarynyń oryndalý barysy tanystyryldy. Sonyń ishinde uıymdasqan qylmystyq topqa qatysqany úshin 264 adam qylmystyq jaýapkershilikke tartylǵan.
Mınıstrdiń aıtýynsha, sońǵy 12 aıda esirtki taratýǵa qatysty aqparat jarııalaǵan 7500-ge jýyq ınternet-resýrs anyqtaldy, 22 tonnaǵa jýyq esirtki aınalymǵa jiberilmedi, 64 esirtki zerthanasy joıyldy. Internet-alaıaqtardyń 65 mıllıon qońyraýy buǵattaldy. Nómirlerdi aýystyrýǵa arnalǵan 48 SIM-box qurylǵysy áshkerelendi. Alaıaqtardyń 2 mıllıard teńgeden astam qarjyny elden shyǵarýyna jol berilmedi.
Vedomstvo basshysy kámelet jasyna tolmaǵandardyń quqyqtaryn qorǵaý, kóshi-qondy baqylaýdy kúsheıtý, jol qaýipsizdigin qamtamasyz etý, qylmystyq-atqarý júıesin jetildirý jónindegi sharalar týraly habardar etti.
Kezdesý sońynda Qasym-Jomart Toqaev eldegi quqyqtyq tártip pen qoǵamdyq qaýipsizdik deńgeıin odan ári arttyrý boıynsha birqatar tapsyrma berdi.
