Foto:Ashyq derekkóz
QR Úkimetiniń 2024 jylǵy 12 maýsymdaǵy № 454 qaýlysymen «Densaýlyq saqtaý ınfraqurylymyn damytýdyń 2024 – 2030 jyldarǵa arnalǵan tujyrymdamasy» bekitilip, respýblıka boıynsha densaýlyq saqtaý ınfraqurylymy obektileriniń tozý dárejesin 2023 jylǵy 49,3% - dan 2030 jylǵa deıin 30 % - ǵa deıin tómendetý mejesi belgilendi.
Depýtattyń pikirinshe, búginde qoldanystaǵy aýdandyq aýrýhanalar ınfarkt, ınsýlt, jaraqat jáne basqa da jaǵdaılar kezinde «altyn ýaqyt» qaǵıdatyn saqtaı otyryp shuǵyl medısınalyq kómekti, sondaı-aq iri qalalarǵa barý qajettiliginsiz mamandandyrylǵan jáne joǵary tehnologııalyq medısınalyq kómekti tolyqqandy kórsete almaıdy.
«Jambyl oblysy boıynsha qoldanystaǵy 10 aýdandyq aýrýhananyń tozyǵy ábden jetip, aýyl halqyna sapaly medısınalyq kómekti tıisti deńgeıde kórsete almaı jatyr. Máselen, oblys ortalyǵynan shalǵaıda ornalasqan Moıynqum aýdanynyń 110 tósek – orynǵa arnalǵan ortalyq aýrýhanasy 1954 jyly salynsa, oblystaǵy eń jańa 198 tósek orynǵa arnalǵan aýdandyq ortalyq aýrýhana ǵımaraty Shý aýdanynda 2011 jyly qoldanysqa berilgen. Qazirgi ýaqytta zamanǵa saı halyqaralyq medısınalyq standarttardyń ózgerýine jáne óńirlerdegi aýyl halqynyń artýyn eskersek, barlyq aýdandyq aýrýhana ǵımarattary qaıta jańǵyrtýdy qajet etedi», dedi Muqash Eskendirov.
Májilismen Jambyl oblysy ákimdigi tarapynan iske asyrý quny 38,7 mlrd. teńgeni quraıtyn 4 aýdandyq aýrýhana ǵımaratyn qaıta qurý jáne qosymsha ǵımarat salý úshin jobalar ázirlenip jatqandyǵyn atap ótti. Biraq, tómende kórsetilgen jobalar bıýdjetten qoldaý tappaı otyr. Atap aıtsaq:
- Jambyl oblysy Jambyl aýdanyndaǵy 115 tósek orynǵa arnalǵan ortalyq aýrýhana ǵımaratyn qaıta jańǵyrtý jobasyna – 2 611,5 mln.teńge (04.09.2024 j. №19-0307/24);
- Jambyl oblysy Jýaly aýdanynda 100 tósek orynǵa arnalǵan ortalyq aýrýhana jáne 250 tósek orynǵa arnalǵan emhana ǵımaratyn salý jobasyna – 29 969,5 mln.teńge (20.08.2024 j. №19-0349/24);
- Jambyl oblysy T.Rysqulov aýdanyndaǵy 129 tósek orynǵa arnalǵan ortalyq aýrýhana ǵımaratyn qaıta jańǵyrtý jáne japsarlas ǵımarat salý jobasyna – 3 561,5 mln.teńge (05.09.2023 j. №19-0313/24);
- Jambyl oblysy Talas aýdanyndaǵy 140 tósek orynǵa arnalǵan ortalyq aýrýhana ǵımaratyn qaıta jańǵyrtý jáne japsarlas ǵımarat salý jobasyna – 2 609,5 mln.teńge (10.05.2024 j. №19-0186/24).
Alaıda, Qazaqstan Respýblıkasy Qarjy mınıstriniń 2015 jylǵy 25 aqpandaǵy «nysanaly damý transfertterin qaraý jáne irikteý qaǵıdalaryn bekitý týraly» № 126 buıryǵynyń 5-1 tarmaǵyna sáıkes, respýblıkalyq bıýdjet esebinen qýattylyǵy keminde 200 tósektik kóp beıindi jáne týberkýlezge qarsy uıymdardyń, keminde 200 tósektik perınataldyq ortalyqtar men perzenthanalardyń jáne aýysymyna keminde 250 adam qabyldaıtyn qýattylyǵy bar emhanalardy salýǵa, rekonstrýksııalaýǵa, keńeıtýge jáne jańǵyrtýǵa arnalǵan shyǵystar qarjylandyrylady.
Sonymen qatar, Qazaqstan Respýblıkasy Úkimetiniń 2023 jylǵy 28 naýryzdaǵy «Qazaqstan Respýblıkasynyń aýyldyq aýmaqtaryn damytýdyń 2023 – 2027 jyldarǵa arnalǵan tujyrymdamasyn bekitý týraly» № 270 qaýlysyna sáıkes, «Aýyl – El besigi» jobasy aıasynda densaýlyq saqtaý salasynyń tek alǵashqy medısınalyq-sanıtarııalyq kómek obektilerin salý, rekonstrýksııalaý, keńeıtý jáne kúrdeli jóndeý shyǵyndary qarjylandyrylady.
Májilismenniń pikirinshe, Densaýlyq saqtaý salasynyń ınfraqurylymdaryn damytýdy kózdeıtin shyǵyndar qomaqty qarajatty talap etedi. Sondaı-aq respýblıkalyq bıýdjettiń qoldaýynsyz qordalanǵan máseleni shıratý jergilikti bıýdjetke aýyrtpashylyq túsirip jatyr. Alaıda, qoldanystaǵy zańnama atalǵan máselelerge respýblıkalyq bıýdjetten qajetti qarajatty baǵyttaýǵa óz kedergisin keltiredi.
Muqash Eskendirov jańa Bıýdjet kodeksine sáıkes oblystyq bıýdjetten korporatıvtik jáne jeke tabys salyǵynyń túsimderi tolyqtaı aýdandyq deńgeıge berilgenimen densaýlyq saqtaý jáne bilim salasynyń shyǵyndary oblystyq deńgeıde qarjylandyrylatynyn da atap ótti.
«Joǵaryda atalǵan júıeli máseleni sheshý úshin, óńirlerdegi ortalyq aýrýhana ǵımarattaryn qaıta jańǵyrtý, kúrdeli jóndeý jáne keńeıtý jumystaryna respýblıkalyq bıýdjetten qarjylandyrý múmkindikterin qarastyrý maqsatynda «Qazaqstan Respýblıkasynyń aýyldyq aýmaqtaryn damytýdyń 2023 – 2027 jyldarǵa arnalǵan tujyrymdamasyn bekitý týraly» № 270 qaýlysyna jáne Qazaqstan Respýblıkasy Qarjy mınıstriniń 2015 jylǵy 25 aqpandaǵy «nysanaly damý transfertterin qaraý jáne irikteý qaǵıdalaryn bekitý týraly» № 126 buıryǵyna tıisti tolyqtyrýlar men ózgerister engizýge yqpal etýińizdi suraımyz» dedi M.Eskendirov.
